2 Peteru 1

Avea e faapei o Iesu Keriso

Sa tusi atu Peteru i soo o Iesu Keriso o e sa malolosi i lo latou faatuatua. Ina ua tulata i le iuga o lona soifua, sa manao Peteru e fesoasoani i nei Au Paia ia manatua faamanuiaga maoae na folafola atu i e faamaoni. Sa ia uunaia le Au Paia e atiina ae uiga o Iesu Keriso. O lenei lesona ua faamoemoe e fesoasoani ia te oe e faia laasaga ia avea atili ai e faapei o Iesu Keriso.

O le fesoasoani i tagata aoao ia malamalama i uiga auaumama o le Faaola. A o aoao tagata aoga e uiga i le Faaola, fesoasoani ia i latou e o i talaatu o le aoao e uiga i mea na Ia fetalai mai ai ma faia ma aoao pe o ai o Ia. O se tasi o auala e faia ai lenei mea o le taulai atu lea i Ona uiga auaumama.

Sauniuniga a le tagata aoga: Valaaulia tagata aoga e mafaufau pe o le fea o aga auaumama e sili ona latou faamemelo i ai e faatatau ia Iesu Keriso ma pe aisea.

Gaoioiga e ono Mafai Ona Aoao Ai

Ausiaga o laasaga taitasi

O le a se sini anoa e te manao e ausia?
O le a lau mea o fai e ausia ai lenei sini?

Sa faasoa mai e Elder Scott D. Whiting o le Fitugafulu se lesona sa la aoaoina ma lona faletua i se aafiaga na la maua a o la a‘ea le Mauga o Fuji i Iapani. O le lesona na la aoaoina e mafai ona fesoasoani ia te oe e galue agai atu ai i au sini.Atonu e te manao e matamata le vitio o le “Avea Faapei o Ia” o loo maua i le ChurchofJesusChrist.org, mai le faailotaimi 2:35 i le 3:09, pe faitau le faamatalaga lenei:

10:21

Mt. Fuji, in Japan, rises up majestically in the background on a late autumn evening. The last glimpses of sunlight can be seen on the west facade of the snow capped slopes. Lake Kawaguchi is in the foreground with the town of Fujikawaguchiko nestled in between the lake and mountain. Light snow has blanked the town and the nearby trees.

I ni nai tausaga ua mavae, sa ma tutu ai ma lo’u toalua i le amataga o se alasopo o le mauga aupito maualuga o Iapani, o le Mauga o Fuji. A o amata ona ma a’ea’e atu i luga, sa ma tilotilo atu i le mamao o le tumutumu ma taumate pe mafai ona ma oo i ai.

A o ma agai pea i luga, sa oo mai lagona o le vaivai, tiga o maso, ma aafiaga o le maualuga o le alitiuta. I le mafaufau, na avea ma mea taua mo i ma’ua ona taulai atu i le na o le la’a e sosoo ai. Sa ma faapea ane, “Atonu e le vave ona ou oo i le tumutumu, ae e mafai ona ou faia le isi la’a i le taimi nei lava.” I le faasologa o le taimi sa i’u lava ina mafai ona ausia le galuega fita —i lea la’a ma lea la’a.

(Scott D. Whiting, “Avea Faapei o Ia,” Ensign po o le Liahona, Nov. 2020, 12)

O lenei faataitaiga e mafai ona faatatau i le ausiaina o le tele o sini eseese. O le a se mea e mafai ona fesoasoani tatou te malamalama ai e uiga i le sini o le avea e faapei o Iesu Keriso?

Faaaoga sina taimi e mafaufau loloto ai i mea sa e faia ma o loo e faia ia avea ai e faapei o Iesu Keriso.

O le a le mea e faigata i le taumafai ia avea atili e faapei o Iesu Keriso?
O le a se mea na fesoasoani ia te oe e alualu ai i luma i le avea atili e faapei o Iesu Keriso?

Manatua e taua le vaai atu i lou alualu i luma e avea atili ai e faapei o Iesu Keriso o se faagasologa faifai malie, faasolosolo i lea laasaga ma lea laasaga. A o e suesueina lenei lesona, vaavaai mo mea e mafai ona e faia i le fesoasoani a le Faaola e fai ai le isi laasaga.

Natura paia

I se tusi i tagata o le Ekalesia o e ua iai lo latou faatuatua ia Iesu Keriso, sa faaalia ai e le Aposetolo o Peteru lona manao mo i latou ia maua faamanuiaga o le iloaina o le Tama Faalelagi ma Iesu Keriso ma o La natura paia.

Faitau le 2 Peteru 1:2–4 , ma vaavaai mo faamanuiaga e mafai ona oo mai ia i tatou e ala i lenei malamalama.

O le a sou manatu i le uiga o le “ia tofusia faatasi i le amio Atua”? ( 2 Peteru 1:4).

Ua tofu i tatou ma se natura paia aua o i tatou taitoatasi o “se atalii po o se afafine agaga faapelepele a ni matua faalelagi” (“ O Le Aiga: O Se Folafolaga i le Lalolagi ,” ChurchofJesusChrist.org). E mafai e Iesu Keriso ona fesoasoani ia i tatou e atiina ae ma faaleleia uiga faa-Keriso a o tatou taumafai e mulimuli i Lana faataitaiga atoatoa ma faalagolago ia te Ia e fesoasoani ia i tatou ia suia.

Mafaufau e tusi se ata faigofie o se mauga i luga o le laupapa.

I lau api faamaumau mo suesuega, tusi ai se ata faigofie o le Mauga o Fuji po o se isi mauga o lau filifiliga. I luga o lau mauga, tusi ai nisi o uiga auaumama o Iesu Keriso.

Mafaufau e valaaulia ni nai tagata aoga e lisi uiga faa-Keriso i luga o le ata o se mauga i luga o le laupapa. E mafai ona valaaulia tagata aoga e tomanatu i a latou sauniuniga mo le vasega a o latou faailoa mai uiga paia o le Faaola.

O fea o uiga o Iesu Keriso e sili ona e faamemelo i ai? Aisea?

Faitau le 2 Peteru 1:5–7 , ma vaavaai mo uiga faa-Keriso o loo lisi mai e Peteru. Faaopoopo atu nei uiga i uiga na e tusia i luga o lau mauga i lau api faamaumau.

Faaaoga sina taimi e mafaufau ai pe atonu o le a le uiga o le tala a Peteru i le fasifuaitau “ia outou matua faamalosi ai lava” ( fuaiupu 5).

E ono faapefea ona e faapupulaina lenei mea i lau ata?

Mafaufau e faapupula le taua o le filigā i luga o le ata i luga o le laupapa e ala i le tusia o se ‘aū o loo alu ae i luga o le mauga, e fesootai ma le upu filigā (tagai i le ata ua uma ona tusia mulimuli ane i le lesona mo se faataitaiga pe mafai faapefea ona faia lenei mea).

Faitau le 2 Peteru 1:8–11 , ma vaavaai mo mea na ta’u atu e Peteru i le Au Paia o le a tupu pe afai latou te atiina ae nei uiga auaumama.

O le a se upumoni ua e aoaoina mai nei fuaiupu?

Atonu e ta’ua e tagata aoga ni upumoni eseese, e aofia ai ma lenei: A o o‘u atiina ae uiga paia, e mafai ona ou iloa Iesu Keriso ma maua le folafolaga o le ola faavavau.

Mafaufau e uiga i mea e mafai ona e faaopoopo atu i lau ata ona o mea o loo e aoaoina. Atonu e te manao e faaopoopo se ulutala i luga ae o lau mauga o loo taaofa‘i ai se upumoni taua o e aoaoina e uiga i lou iloaina ai o Iesu Keriso.

O le a se mea e mafai ona tatou faia ina ia atiina ae ai uiga faa-Keriso?
E faapefea ona e manatu o le atiina ae o uiga paia e fesoasoani tatou te iloa ai Iesu Keriso ma avea atili ai e faapei o Ia?

O le atiinaeina o uiga faa-Keriso

O le savaliga o le atinaeina o uiga faa-Keriso e mafai ona amata i le laasaga faigofie muamua o le filifili o se uiga se tasi ma aoao atili e uiga i ai. Amata lenei savaliga i le asō i le filifilia o se tasi o uiga o loo lisiina i le 2 Peteru 1:5–7 ma tusi i luga o lau ata o le mauga.

O se tasi o auala e mafai ona e aoao atili ai i le uiga ua e filifilia o le faaaoga lea o le Taiala i Tusitusiga Paia, o le Taiala mo Autu po o le vaega o sailiiliga i le Potutusi o le Talalelei e sue ai mau po o faamatalaga e faatatau i lena uiga.

Tusi ni faamatalaga i lau api faamaumau mo suesuega, ma mafaufau e faailoga fasifuaitau taua i mau na e faitauina.

Tuu atu i tagata aoga se taimi ia lava e faamaea ai le gaoioiga. Fesoasoani ia i latou ia maua punaoa latou te mananao e faaaoga faaeleteonika, pe saunia ni kopi o anomea.

Mo nisi manatu i le auala e fesoasoani ai i tagata aoga e suesue ma atiina ae uiga faa-Keriso, tagai i le vaega o le “Tala Auiliili ma Faamatalaga o Talaaga” o le lesona.

Mafaufau e faaaoga ni isi po o fesili uma nei e avatu ai i tagata aoga se avanoa e faasoa mai ai mea ua latou aoaoina.

O le fea o uiga na e filifili e taulai i ai?
O le a se mea na e aoaoina e uiga ia Iesu Keriso ma lenei uiga mai au suesuega?
E mafai faapefea ona faaleleia lou olaga e ala i le atiina ae o lenei uiga faa-Keriso?
O a ni taumafaiga ua e naunau e fai ia avea atili ai e faapei o le Faaola e ala i le atiina ae o lenei uiga?

Mafaufau e tuuina atu se molimau i le finagalo ma le gafatia o le Faaola e fesoasoani ia i tatou ia avea ai e faapei o Ia. E mafai ona tuuina atu i tagata aoga ni avanoa i lesona i le lumanai e lipoti mai ai le alualu i luma o loo latou faia i le atiina ae o uiga faa-Keriso ua latou filifili e galulue ai.

Tala Auiliili ma Faamatalaga o Talaaga

O le a se mea o le a manaomia ina ia ou atiina ae ai uiga faa-Keriso?

Na faamatala mai Elder Scott D. Whiting o le Fitugafulu e faapea:

Ina ia mafai ona iloa le alualu i luma moni, o le a manaomia ai ona e faatinoina se taumafaiga faaauau. E faapei lava o le a’ea o se mauga e manaomia ai tapenaga a o le’i faia, ma le tumau ma le onosai i le taimi e a’ea ai, e faapena foi i lenei faigamalaga e manaomia ai taumafaiga moni ma le ositaulaga. O le faa-Kerisiano moni, lea tatou te tauivi ia avea ai faapei o lo tatou Matai, e manaomia ai lava e le aunoa a tatou taumafaiga aupito silisili. …

Ou te iloa o le avea e faapei o Ia e ala i Lana fesoasoani ma le malosiaga faalelagi e mafai ona ausia i lea la’asaga ma lea la’asaga. Pe ana leai, semanu Na te le tuuina mai ia i tatou lenei poloaiga [tagai i le 1 Nifae 3:7].

(Scott D. Whiting, “Avea Faapei o Ia,” Ensign po o le Liahona, Nov. 2020, 14)

O le a le mea e tupu a o ou taumafai ai e maua uiga faa-Keriso?

Na faamalamalamaina e Elder Robert D. Hales (1932–2017) o le Korama a Aposetolo e Toasefululua:

11:7

O uiga paia o le Faaola, e pei ona tatou malamalama i ai, e le o se tusiga taua‘o e mulimulitaia po o se lisi e siaki ua mae‘a. O ni uiga ua lalaga felavasai, e faaopoopo atu le tasi i le isi, lea e atiinae i totonu o i tatou i ni auala fesootai. I se isi faaupuga, e le mafai ona tatou mauaina se uiga faa-Keriso se tasi e aunoa ma le mauaina ma le aafiaina ai foi o isi. A faasolo ina malosi se tasi o uiga, o le a faapena foi le tele o isi.

(Robert D. Hales, “Avea o se Soo o lo Tatou Alii o Iesu Keriso,” Ensign po o le Liahona, Me 2017, 46)

Na aoao mai Elder David A. Bednar o le Korama a Aposetolo e Toasefululua e faapea:

E maua le fesoasoani mai le Faaola mo le malaga atoa o le olaga nei—mai le leaga i le lelei i le lelei sili atu ma ia suia ai o tatou lava natura.

(David A. Bednar, “O Le Togiola ma le Malaga i le Olaga Faitino,” Ensign, Ape. 2012, 42; Liahona, Ape. 2012, 14)