1 Korinito 12

Meaalofa Faaleagaga

O se vaega o alii talavou ma tamaitai talavou e fiafia e mafuta le tasi ma le isi a o latou talatalanoa faatasi i Pale Farani.

Sa tusi Paulo i le Au Paia i Korinito e fesoasoani ia latou iloa e tatau ona latou tasi ia Keriso. Sa ia aoao atu foi pe a faapea e mafai e tagata uma ona iloa ma faaaoga meaalofa faaleagaga sa maua mai i le Alii, e mafai ona avea i latou e pei o vaega eseese o le tino e galulue faatasi i le loto gatasi. O lenei lesona e faamoemoe e fesoasoani atu e te iloaina ai meaalofa faaleagaga ua tuuina atu e le Alii ia te oe ina ia faamanuia ai isi ma faamalosia Lana Ekalesia.

Meaalofa faaleagaga. Ua faamanuia e le Alii tagata uma o Lana Ekalesia i meaalofa faaleagaga ma gafatia. Taumafai ia iloa, atiae, ma faalautele nei meaalofa faaleagaga e tautua atu ai mo tagata aoga seminare taitoatasi, ma uunaia tagata aoga ia faapea foi ona latou faia.

Sauniuniga a le tagata aoga: Valaaulia tagata aoga e faailoa mai se tasi pe lua o meaalofa faaleagaga na tuuina atu ia i latou. E mafai ona latou talosaga i tagata o o latou aiga po o isi tagata faatuatuaina e pele ia i latou e fesoasoani i lea gaoioiga. Fesili i tagata aoga e manatunatu i a latou meaalofa ma auala ua latou faaaogaina ai e faamanuia ai isi.

Gaoioiga E Ono Mafai Ona Aoao Mai Ai

Mauaina o meaalofa

Mafaufau e aumai se meaalofa ua afifi i le vasega ma faaali atu a o faagasolo lenei talanoaga.

O le a se meaalofa taua sa e mauaina?
O le a se aafiaga o lenei meaalofa i lou olaga? O le a se mea na mafai ona e faia ona o lenei meaalofa?
O le a ni ou lagona mo le tagata sa foaiina atu lenei meaalofa?

Ao e suesue i le 1 Korinito 12, o le a e aoao ai e uiga i meaalofa faaleagaga e foaiina mai e le Tama Faalelagi mo Lana fanau. Vaai pe aisea ua Ia foaiina mai ai nei meaalofa, ma saili ni musumusuga mai le Agaga Paia e fesoasoani ia te oe ia iloa se meaalofa ua tuuina atu ia te oe.

E foaiina mai e le Alii meaalofa faaleagaga ia i tatou

“O meaalofa faaleagaga o ni faamanuiaga po o tomai e tuuina mai e le Atua i Ana fanau e ala mai le mana o le Agaga Paia” (Autu o le Talalei, “Meaalofa Faaleagaga,” topics.ChurchofJesusChrist.org).

Atonu e aoga mo tagata aoga le galulue i ni vaega a o latou suesueina nei fuaitau o mau. E mafai ona faitau e sui taitoatasi o le vaega fuaiupu eseese ma toe lipoti atu i a latou vaega mea ua latou aoaoina.

Aoao e uiga i meaalofa faaleagaga e ala i le faitauina o le 1 Korinito 12:3-11 . (Matau o le upu “taitasi” i le fuaiupu 11 o lona uiga o le “taitoatasi” po o le “auauai.”)

O a nisi o meaalofa faaleagaga o lisiina i nei fuaiupu?

E tele ituaiga eseese o meaalofa faaleagaga. Ia aoao e uiga i isi meaalofa, faitau le Moronae 10:8-18 ; Mataupu Faavae ma Feagaiga 46:11-26 ; ma le saunoaga lenei a Elder Marvin J. Ashton (1915-94) o le Korama a Aposetolo e Toasefululua:

O le a ou tauina atu nisi o meaalofa e tau leiloa pe matua iloga ae peitai e matua taua tele … : o le meaalofa o le ole atu; o le meaalofa o le faalogo; o le meaalofa o le lagonaina ma le faaaogaina o le leo filemu, ma itiiti; o le meaalofa e mafai ai ona fetagisi; o le meaalofa e mafai ona alo ese ai mai i finauga; … o le meaalofa o le saili i le amiotonu; o le meaalofa o le le faamasino tagata; o le meaalofa o le vaai i le Atua mo taitaiga; … o le meaalofa o le tausiga o isi; o le meaalofa o le mafai ona mafaufau loloto; o le meaalofa o le tuuina atu o tatalo; o le meaalofa o le mauaina o se molimau mamana.

(Marvin J. Ashton, “There Are Many Gifts,” Ensign, Nov. 1987, 20)

Pe a uma ona tuu atu se taimi mo tagata aoga e suesue ai, valaaulia i latou e faasoa mai mea moni ua latou aoaoina e uiga i le Alii ma meaalofa ua Ia finagalo e faamanuia ai i tatou.

O ai e faamanuia e le Alii e ala i nei meaalofa faaleagaga?
O le a se mea e mafai ona fesoasoani ia te oe e malamalama ai e uiga i le Alii?

O se tasi o mea moni atonu ua e iloa e faapea e foaiina e le Alii i tagata taitasi o Lana Ekalesia se tasi pe sili atu foi o nei meaalofa faaleagaga e faamanuia atu ai i isi.

Valaaulia tagata aoga e toe tomanatu i a latou meaalofa faaleagaga. Afai na valaaulia i latou e faia sauniuniga a tagata aoga mo le vasega, valaaulia i latou e mafaufau i a latou talanoaga sa fai ma se tagata o lo latou aiga po o se tasi ese na latou talanoa e uiga i a latou meaalofa faaleagaga.

O a ni ou lagona i le Tama Faalelagi ma Iesu Keriso, ina ua e iloa ua Laua faamanuiaina oe i se meaalofa faaleagaga?
E mafai faapefea e le iloa ua tuuina mai ia te oe se meaalofa faaleagaga ona aafia ai lau vaai i lou faasinomaga paia?
Aisea e te manatu ua tuuina mai ai e le Atua meaalofa faaleagaga i tagata taitasi o le Ekalesia ae le na o ni isi o tagata?

E finagalo le Alii ia tatou faamanuia atu le tasi i le isi

A o aoao tagata aoga e uiga i itutino eseese o le tino ma o latou aoga taitasi, mafaufau e valaaulia tagata aoga e faamaea se faatinoga e aofia ai ni sui mai le vasega, e pei o le siiina o se meafaitino tele i totonu o le potuaoga. O se isi filifiliga o le faatagaina lea o tagata aoga e faaaoga na o se lima e tasi a o latou galulue faatasi e fausia se faatusa laiitiiti, saesae ni fasi pepa, pe faatino foi se isi gaoioiga.

Faitau le 1 Korinito 12:14-20 e sue ai le faatusatusaga sa faaaoga e Paulo e fesoasoani tatou te iloa ai le taua o o tatou sao taitoatasi.

O le a le mea e faaaoga e Paulo e faatusatusa i ai le Ekalesia i lenei fuaitau? O le a se mea ua aoao atu e lenei faatusatusaga ia te oe e uiga i meaalofa faaleagaga?
Na faapefea ona faamanuiaina oe e ala i meaalofa faaleagaga a isi?

Ina ia vaai i se faataitaiga o se tagata sa faasoaina atu a latou meaalofa faaleagaga i isi, e mafai ona e matamamata i le vitio “With All Your Heart” (3:26), e maua i le ChurchofJesusChrist.org, o loo faamatala atu ai e uiga i se alii talavou sa valaauina e faaaoga se meaalofa mai le Alii sa ia faatoa iloaina. A o e matamata, maitau lelei musumusuga a le Agaga Paia e uiga i le auala e te faaaogaina ai au meaalofa e faamanuia ai isi.

NaN:NaN

Mafaufau e valaaulia ni volenitia e faasoa mai meaalofa faaleagaga ua latou vaaia ia i latou lava, i tagata o le vasega, po o isi o le latou tupulaga, ma uunaia i latou e faamatala pe faapefea ona faamanuia ai isi i nei meaalofa. I lou tulaga faafaiaoga, mafaufau pe i ai ni tagata aoga e aoga mo i latou pe a tau i ai, i le taimi o le vasega pe faalilolilo, po o a ni meaalofa faaleagaga e manino lea ia i latou.

Mafaufau loloto pe faapefea ona faaaoga meaalofa faaleagaga ua faamanuiaina ai oe e faamanuia ai lou aiga, uarota po o paranesi, ma isi. E te ono manao e tusi i totonu o lau api faamaumau mo suesuega ni musumusuga a le Agaga Paia sa e mauaina e uiga i au meaalofa.

Talanoaina na o nisi po o fesili uma nei pe valaaulia tagata aoga e tali atu i fesili i totonu o a latou api faamaumau mo suesuega.

O le a se mea e te manatu e finagalo le Alii ia e malamalama i ai e faatatau ia oe lava ia ma au meaalofa faaleagaga?
O le a se faamalosiau e te tuuina atu i se isi ua lagona ua leai ni a latou meaalofa faaleagaga?
O le a se meaalofa faaleagaga ua e naunau i ai? O a ni mea e mafai ona e faia e sailia ai lenei meaalofa? (Ua valaaulia i tatou e le Alii e tatou te sailia meaalofa faaleagaga; tagai i le 1 Korinito 12:31 ; 14:1 ; Mataupu Faavae ma Feagaiga 46:7–9 .)
O a nisi o auala e mafai ona e faaaogaina ai au meaalofa faaleagaga e faamanuia ai i isi? E faapefea e lenei mea ona fesoasoani ia i tatou ia avea atili ai e faapei o le Faaola?

Valaaulia tagata aoga e faasoa mai se mea sa latou tusia. Mafaufau e faasoa atu se aafiaga patino po o se molimau e uiga i meaalofa faaleagaga.

Manatu ma Talaaga o Faamatalaga

E mafai faapefea ona ou faaaogaina au meaalofa faaleagaga e auauna atu ai i isi?

Sa faasoa mai e Peresitene Dieter F. Uchtdorf, a o i ai i le Au Peresitene Sili, le ala e mafai ona tatou mulimuli ai i le faataitaiga a Iesu Keriso:

17:23

Pe a ou mafaufau i le Faaola, e tele lava ina ou vaai faalemafaufau ia te Ia ma Ona aao mafola; o aapa mai e faamafanafana, faamalolo, faamanuia, ma alofa. Ma e talanoa o Ia i taimi uma faatasi, ma e le vaai maualalo i, tagata. E alofa o Ia i e lotomaualalo ma e agamalu ma savavali faatasi ma i latou, ma auauna atu ia i latou ma ofoina atu le faamoemoe ma le faaolataga. 

O le mea lena na Ia faatinoina i le taimi o Lona soifuaga faaletino; o se mea foi Na te faia pe ana faapea o loo Ia soifua faatasi ma i tatou i le taimi nei; ma o le mea e ao ona tatou faia i le avea ai ma Ona soo ma ni tagata o Le Ekalesia a Iesu Keriso o le Au Paia o Aso e Gata Ai. … 

Ao tatou mulimulitai i Lana faataitaiga atoatoa, o le a mafai ona avea o tatou lima ma Ona aao; o o tatou mata, ma Ona fofoga; o tatou loto, mo Lona finagalo. 

(Dieter F. Uchtdorf, “O Outou o O’u Lima, Ensign po o le Liahona, Me 2010, 68)

Na aoao mai Elder David A. Bednar o le Korama a Aposetolo e Toasefululua e faapea:

Tatou te mauaina meaalofa faaleagaga ina ia faamanuia atu i isi tagata. Afai o le tatou naunautaiga o le mauaina o se meaalofa ona o le manao, e masalo ailoga e tatou te mauaina lena. A o tatou saili e auauna atu i isi e tusa ai ma aoaoga a Iesu Keriso, e faamanuiaina i tatou i meaalofa faaleagaga ma gafatia faateleina e faataunuu ai na auaunaga.

(David A. Bednar, i le “Malamalama i le Fuafuaga a le Tama Faalelagi,” ChurchofJesusChrist.org/prophets-and-apostles/unto-all-the-world/understanding-heavenly-fathers-plan)

O le a se mea e mafai ona ou faia pe afai ou te le o lagonaina e i ai sa‘u meaalofa faaleagaga taua?

O se fautuaga mai ia Elder Jeffrey R. Holland o le Korama a Aposetolo e Toasefululua o loo maua i le vitio “Songs Sung and Unsung” (mai le faailotaimi 0:57 i le 2:57). O loo maua lenei vitio i le ChurchofJesusChrist.org.

2:56

Sa faasoa mai e Elder John C. Pingree Jr. o le Fitugafulu se faataitaiga o se tuafafine sa iloaina sa ia te ia se meaalofa faaleagaga ae sa ia lei amanaiaina:

I se tasi aso, sa aioi atu ai se tina lotovaivai, “Le Alii e, o le a la’u auaunaga patino?” Sa Ia tali mai, “Ia iloa isi tagata.” O se meaalofa faaleagaga! Talu mai lena taimi, sa ia maua le olioli i le iloaina o i latou e masani ona faagaloina i le tele o taimi, ma sa galue le Atua e ala ia te ia e faamanuia ai le toatele. E ui o nisi o meaalofa faaleagaga atonu e le lauiloa i tulaga masani o le lalolagi, ae e taua i le Atua ma Lana galuega.

(John C. Pingree, Jr., “Ua ia te A’u Se Galuega mo Oe, Ensign po o le Liahona, Nov. 2017, 33-34)

O le a le mea ou te faia pe afai ua ou lagonaina lou le agavaa mo galuega atofaina a le Ekalesia?

Sa aoao mai Peresitene Dieter F. Uchtdorf, a o i ai i le Au Peresitene Sili:

Atonu tou te manatu faapea o loo i ai isi e sili atu ona gafatia ma sili atu le atamamai e mafai ona faataunuuina o outou valaauga ma tofiga i se tulaga e sili atu nai lo outou, ae ua tuuina atu e le Alii ia te outou o outou tiutetauave mo se mafuaaga. Atonu e i ai ni tagata ma ni loto ua na o oe lava e mafai ona aapa ma pai atu i ai. Atonu e leai se isi e mafai ona faia i lena lava ala e tasi.

(Dieter F. Uchtdorf, “Faamaualuga Le Mea E Te Tu Ai,” Ensign po o le Liahona, Nov. 2008, 56)