Mataio 11:28-30
“O A’u Foi E Malolo Ai Outou”
I le taimi o Lana galuega, sa aoao atu e le Faaola le tulafono maualuga o le talalelei ma faamalolo i e mamai. A o faateleina le faatautee e faasaga i le Faaola ma Ana aoaoga, sa Ia ta’usalaina le amio leaga ma folafola atu le malologa mo i latou uma e o atu ia te Ia. O lenei lesona e mafai ona faateleina ai lou talitonuga o le a fesoasoani mai le Alii i ou luitau ma avega mamafa.
O au avega ma luitau
Tusi se ata o se faatagata faafasilaau e faatusa i se tagata talavou. Tusi se ata o se ato faafafa i le patua o lenei ata e faatusa i avega ma popolega o feagai ma tupulaga talavou i aso nei. Tusi i lalo ni avega po o popolega e le sili atu i le lima le aofai i totonu, i luga, po o autafa ane o lenei ato faafafa.
-
I se fua mai le tasi agai i le lima, o le lima e faatusaina i le lelei tele a o le tasi e faatusaina i le leaga tele, o le a le manuia ua e lagona e tusa ai ma lou taulimaina o au avega ma mea tutupu e faapopoleina ai oe?
Afai e lei maea ona e faia, mafaufau e faaaoga sina taimi e talosaga ai le Tama Faalelagi e fesoasoani ia te oe ia maua ni mataupu faavae e fesoasoani ia te oe i au avega faapitoa o loo e tauaveina i le taimi nei. Faitau i le Mataio 11:28–30, ma vaai mo upumoni sa aoaoina mai e le Faaola e ono fesoasoani i se tagata ua taotaomia e ni avega mamafa.
O leMataio 11:28–30 o se fuaitau o le atamai i aoaoga faavae. Mafaufau e faailoga fuaitau o le atamai i aoaoga faavae i se auala tulaga manino ina ia mafai ai ona e maua gofie.
-
O a ni upumoni na e maua?
-
E faapefea ona ono fesoasoani nei upumoni i se tagata o loo lofituina i se taimi faigata?
“Ia outou amoina la’u amo”
O nisi taimi e mafai ona faigata ai ona malamalama i upu po o fasifuaiupu i tusitusiga paia. O le iloaina o uiga o upu ma fasifuaiupu e mafai ona fesoasoani tatou te aoaoina ai mea e finagalo le Faaola tatou te iloa. Faataitai lenei [fautuaga] e faaaoga ai le fasifuaiupu “Ia outou amoina la’u amo” (Mataio 11:29).
O le amo o se “meafaigaluega lea e tuu faalava i ua o manuvaefa po o tagata e fusi faatasi ai i latou” (Taiala i Tusitusiga Paia, “Amo,” scriptures.ChurchofJesusChrist.org). O manuvaefa i lenei ata o loo i ai le amo.
Na faasoa mai e Elder Edward Dube o le Fitugafulu le aafiaga lenei:
I a Tesema 2015 i Madziva, Zimbabwe, sa ma vaaia ai ma Naume [lo’u toalua] se tamaloa o loo suaina le eleele ma ni manu se lua. Sa ou ofo e vaai atu o le tasi o manu o se pulu tele lava ao le isi e nao se pulu laititi. Sa ou popole. Sa ou mafaufau leotele, “Pe aisea e faaaoga ai e se faifaatoaga ni manu e le tutusa i le amo e tasi?”
O le tina o Naume, o le sa tutu latalata mai, sa faasino atu i le amo. Sa ou toe autilo lelei i ai ma na ou vaaia ni fusi [o manoa po o filifili] e fesootai ai le amo i le pulu. O le pulu lapoa o loo amoina le tele o le mamafa, ae o le pulu laititi o loo aoao atu ina ia iloa sua le eleele.
(Edward Dube, “Faaaoao ia te A’u,” Liahona, Oke. 2020, Itulau o le Lotoifale i Aferika Sautesasa’e, ChurchofJesusChrist.org)
-
Pe faapefea ona tutusa le tatou mafutaga ma le Faaola ma le mafutaga a le pulu lapoa ma le pulu laititi?
-
E faapefea e le iloaina o le uiga o le amo ona faaloloto ai lou malamalama e uiga i lagona o Keriso mo oe?
Na saunoa Elder David A.Bednar o le Korama a Aposetolo e Toasefululua:
O le osia ma le tausia o feagaiga paia e tuufaatasia ai i tatou ma le Alii o Iesu Keriso.
(David A. Bednar, “Tauave ma le Faigofie a Latou Avega,” Liahona, Me 2014, 88)
-
O a ni auala e te manatu o le osia ma le tausia o feagaiga e amo ai i tatou ia, ma faatasi ma le Faaola?
Sa faamalamalama mai e Elder Dube:
Pe a tatou amo faatasi ma Iesu Keriso, o Ia e amoina le avega, ae tatou te fefaasoaai i le olioli o le galulue. O le valaau a le Alii ia i tatou taitoatasi e aoao ia te Ia e nao le pau lea o le punavai e aumaia le filemu, olioli ma tuuina mai tali i le mafaufau le mautonu.
(Edward Dube, “Faaaoao ia te A’u,” Liahona, Oke. 2020, Itulau o le Lotoifale i Aferika Sautesasa’e, ChurchofJesusChrist.org)
-
Na faapefea e le aoao e uiga ia Iesu Keriso i lenei tausaga ona fesoasoani ia te oe e tauave lau avega ma aumai ai ia te oe le filemu ma le fiafia?
O mai ia Keriso ma maua Lona malologa
1. Faamaea a le o le gaoioiga A po o le E i lau api talaaga mo suesuega. Mulimuli i faatonuga e o faatasi ma le gaoioiga ua e filifilia.
Gaoioiga A: “O mai ia te au” (Mataio 11:28). E mafai faapefea ona ou sau ia Keriso?
Ina ia maua le fesoasoani a le Faaola ma le malologa ua Ia ofoina mai, e ao ona tatou o atu ia te Ia.
-
Afai e fesili atu se tasi ia te oe po o le a le uiga o le o atu ia Keriso, o le a sau tali?
Sa faailoa mai e Elder Richard G. Scott (1928–2015) o le Korama a Aposetolo e Toasefululua ni auala e mafai ai ona tatou o atu ia Keriso.
A tatou tatalo e le aunoa i le taeao ma le po, suesue a tatou tusitusiga paia i aso uma, fai afiafi faaleaiga faalevaiaso, ma auai soo i le malumalu, o loo tatou tali atu ma le naunautai i Lana valaaulia ia “o mai ia te Ia.”
(Richard G. Scott, “Ia Avea le Faaaogaina o le Faatuatua ma Mea E te Faamuamuaina,” Liahona, Nov. 2014, 94)
Mafaufau e matamata le “O Mai ia Keriso: Pese Autu o le 2014” (4:48) e vaai ai i faataitaiga o auala e mafai ai e se tasi ona sau i le Faaola. O loo maua lenei vitio i le ChurchofJesusChrist.org.
2. Tali fesili nei i totonu o lau api faamaumau mo suesuega:
-
O a ni mea ua e faia ina ia e latalata atili atu ai ia Iesu Keriso? (E mafai ona aofia ai ni feagaiga na e osia ma tausia.)
-
O le a se mea e te lagona e mafai ona e faia ina ia atili atoatoa ai lou alu atu ia Keriso ma maua ai Lana fesoasoani paia?
Gaoioiga E: “O A’u foi e malolo ai outou” (Mataio 11:28). E ono faapefea ona sii ese e Keriso a’u avega?
O loo tusifaamaumauina i le Tusi a Mamona se faataitaiga mamana o le tuumamaina e le Faaola o avega. Sa ave faatagaotaua ia Alema ma lona nuu, sa faafaigaluega faamalosi, ma sa matua sauaina.
Faitau i le Mosaea 24:12–16. Atonu foi e te manao e matamata le vitio “Mataupu 17: Ua Sosola Alema ma Lona Nuu” mai le faailotaimi 0:01 e oo i le 1:29. O loo maua lenei vitio i le ChurchofJesusChrist.org.
3. Tusifaamaumau au tali i fesili nei ma le uunaiga e tusitusi i lau api talaaga mo suesuega.
-
O le a se mea sa e aoaoina e uiga i auala e mafai e le Faaola ona fesoasoani ai ia te oe i le amoina o au avega?
-
O a ni mea na fai e tagata o Alema ina ia maua ai le fesoasoani a le Faaola?
-
E mafai faapefea e le malamalama i lo tatou matafaioi o le aapa atu i le Faaola ona fesoasoani i se tasi o loo feagai ma luitau?
Mafaufau i ou lava aafiaga po o ni aafiaga o isi tagata ua e iloaina, ma faamau i lalo se taimi na sii ese ai e le Faaola se avega. Ia mautinoa e aofia ai le mea na e faia, pe na fai e le isi tagata e aapa atu ai i le Faaola ma le auala sa Ia fesoasoani atu ai.
Tuu i le faitalia: O e Manao e Aoao Atili?
E faapefea ona fesoasoani mai Iesu Keriso ia i tatou a o tatou o atu ia te Ia?
Sa faamatala e Elder John A. McCune o le Fitugafulu nisi o faamanuiaga e mafai ona oo mai a o tatou o mai ia Iesu Keriso.
Ao tatou taliaina le valaau a le Faaola e “o mai ia te au,” (Mataio 11:28) o le a Ia tuuina mai le lagolago, faamafanafanaga ma le filemu e manaomiaina. … E oo lava i o tatou tofotofoga sili ona loloto, e mafai ona tatou lagona le opo mafanafana o Lona alofa pe a tatou faalagolago ia te Ia ma talia Lona finagalo.
(John A. McCune, “O Mai ia Keriso—Ola o ni Au Paia o Aso e Gata Ai,” Liahona, Me 2020, 36)
O le vitio “Living with Depression” (3:13) o loo tuuina mai ai se faataitaiga o le ala e mafai ona fesoasoani ai Iesu Keriso ia i tatou e tusa lava pe afai e le laveaiina i tatou mai tofotofoga faigata.