Kalatia 5

• O a ni auala e pei ai lou olaga o se tosoga-maea?

I lana tusi i tagata Kalatia, sa faamatala ai e le Aposetolo o Paulo ni malosiaga faatautava se lua e mafai ona tosoina i tatou i itu eseese. Faitau le Kalatia 5:16–17, ma vaavaai mo le fautuaga a Paulo e faatatau i nei malosiaga.

• O a malosiaga faatautava sa e iloaina mai nei fuaiupu?

O “tuinanau o le tino” (fuaiupu 16) o faaosoosoga tatou te oo i ai.

• O a nisi o faaosoosoga faaletino (tuinanau o le tino) e oo i ai tagata talavou?

Faatusatusa au tali i le lisi a Paulo i le Kalatia 5:19–21.

Faaalu sina taimi e mafaufau le leoa ai pe faapefea ona ono tupu i lou olaga lenei tosoga-maea a le Agaga e faasaga i tuinanau o le tino. O a ni auala e te ono tauivi ai e tetee atu i tuinanau o le tino? E faapefea ona faamanuiaina oe a o e mulimuli i le taitaiga a le Agaga? A o faaauau ona e suesue, ia nofouta i uunaiga faaleagaga ia e mafai ona fesoasoani ia te oe e iloa ai soo se fetuunaiga e mafai ona e faia ia o le a fesoasoani ia te oe e faatoilalo ai faaosoosoga o loo feagai ma oe.

Faitau le Kalatia 5:21, ma vaavaai pe aisea e taua ai le aloese mai tuinanau o le tino.

• O le a se mea na e aoaoina e uiga i le mafuaaga e tatau ai ona tatou aloese mai nei faatinoga?

• O le a se mea e mafai ona faigata ai ona aloese mai tuinanau o le tino, e tusa lava pe tatou te iloa e sese?

Na aoao mai Elder David A. Bednar o le Korama o Aposetolo e Toasefululua:

I le avea ai o ni atalii ma afafine o le Atua, ua tatou maua ai gafatia paia mai ia te Ia. Ae o loo tatou nonofo i le taimi nei i se lalolagi pau. O elemene tonu lava sa foafoaina mai ai o tatou tino, o lo latou natura lava o le pau ma e aafia lava i le aave o le agasala, o mea piopio, ma le oti. O le mea la lea, o le Pau o Atamu ma ona taunuuga faaleagaga ma faaletino ua aafia tuusao ai lava i tatou e ala i o tatou tino faaletino. …

Talu ai o se tino faaletino e matua totonugalemu i le fuafuaga o le fiafia a le Tama ma lo tatou atinaega faaleagaga, ua saili ai Lusifelo e faalavelaveina lo tatou alualu i luma e ala lea i le faaosoosoina o i tatou e faaaoga ma le faaletatau o tatou tino. O se tasi o faafeagai tupito o le faavavau e faapea, o le fili, o lē ua matuai faanoanoa lava ona e leai sona tino faitino, na te faaosoosoina i tatou ia tatou i ai ma ia i lona malaia e ala i le faaaogaina faaletatau o o tatou tino. O le meafaigaluega tonu lava e le o iā te ia o le taulaiga autū lenā o ana taumafaiga e maileia i tatou i le faaumatiaga faaleagaga.

(David A. Bednar, “Matou te Talitonu i le Nofo Mama,” Liahona, Me 2013, 42–43)

• O a ni upu po o ni fasifuaitau mai lenei faamatalaga sa tumatila mai ia te oe? Aisea?

Toe faitau le Kalatia 5:16 ma vaavaai mo aoaoga a Paulo e uiga i le ala e mafai ai ona tatou faatoilaloina faaosoosoga o le tino.

O se tasi o mataupu faavae e mafai ona tatou aoao mai le Kalatia 5:16 o le a o tatou savavali i la le Agaga, o le a sili atu ona mafai ona tatou gafatia le faatoilaloina o faaosoosoga o le tino. 

• O le a lou manatu i le uiga o le “savali i la le Agaga”?

• O le a sou manatu e mafai faapefea e le savali i la le Agaga ona fesoasoani ia te oe e faatoilalo ai faaosoosoga o le tino?

Faitau le Mosaea 3:19 ma le Mataupu Faavae ma Feagaiga 11:12, ma vaavaai mo aoaoga e mafai ona fesoasoani e te malamalama atili ai i le taua o le savali i la le Agaga.

Sa faailoa mai e Paulo le tele o faamanuiaga e mafai ona tutupu i o tatou olaga pe a tatou faalogo ma mulimuli i le Agaga Paia. Sa ia faasino i nei faamanuiaga o “fua o le Agaga” (Kalatia 5:22).

Faitau le Kalatia 5:22–23, ma vaavaai mo fua o le Agaga na faailoa mai e Paulo.

O Iesu Keriso, o le sa faia i taimi uma le finagalo o le Tama Faalelagi (tagai i le 3 Nifae 27:13), o le faataitaiga atoatoa lea o le ola ai i se auala e faatoilalo ai le faaosoosoga ia faia le agasala. E ui ina sa puapuagatia o Ia i ituaiga uma o faaosoosoga o le tino (tagai i le Eperu 4:15; Alema 7:11), na Ia “le gauai atu ia te i latou” (Mataupu Faavae ma Feagaiga 20:22).

Mafaufau mo sina taimi pe faapefea ona e taumafai e mulimuli i le faataitaiga a Iesu Keriso ma faaaoga upumoni sa e suesueina i le asō. Mafaufau i soo se uunaiga ua uma ona e mauaina, ma fai se fuafuaga e faatatau i mea o le a e faia e savali atoatoa atili ai i la le Agaga ma faatoilalo ai faaosoosoga. Faamaumau ou manatu i lau api talaaga mo suesuega.