Atamai i Aoaoga Faavae: Mataio 5:14–16
“Ia Faapea ona Pupula Atu lo Outou Malamalama i luma o Tagata”
Sa poloaiina e le Faaola Ona soo ia avea i latou ma faataitaiga mo isi e ala lea i le mulimuli atu ia te Ia. O lenei lesona e mafai ona fesoasoani ia te oe e faaaoga mataupu faavae mo le mauaina o le malamalama faaleagaga ina ia avea ma faataitaiga mo isi ina ia latou latalata atili atu i le Faaola.
Tauloto ma faamatala
Faitau le Mataio 5:14–16.
Tusi se ata o le fasifuaitau autu “Ia faapea ona pupula atu lo outou malamalama i luma o tagata” ma lona mau faasino Mataio 5:14–16. Ao tusi lau ata, mafaufau i auala e faaaofia ai le mau faasino e fesoasoani e te manatua ai.
Ao e tilotilo i le ata sa e tusia, faitau soo le mau faasino ma le fasifuaitau autu o le mau. Ona tilotilo ese lea, ma taumafai e toe fai tauloto soo le mau faasino ma le fasifuaitau autu o le mau mai lou manatuaga.
Mafaufau e faaali atu lau ata i se tasi o lou aiga po o sau uo ma faamatala i ai le upumoni mai le fuaitau.
Faataitai le fa’aaogaina
I lenei faataitaiga o le faaaogaina, o le a e faaaogaina mataupu faavae o le mauaina o le malamalama faaleagaga e filima’oti ai pe faapefea ona avea ma se faataitaiga mo isi ma valaaulia ai i latou e faalatalata atili i le Faaola.
Toe faamanatu ia parakalafa 5-12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).
1. I totonu o lau api talaaga mo suesuega, aotele i ni fuaiupu se lua pe tolu ia mataupu faavae taitasi mo le mauaina o le malamalama faaleagaga.
Faitau le ata faataitai lenei, ma mafaufau pe mafai faapefea ona e tali atu pe afai ua e i ai i le tulaga a Raul.
O Raul, o se ositaulaga ua faatoa faauuina, o loo i ai faatasi ma ana uo ma ua amata ona fai e nisi ni tausuaga mataga ma tautatala le mafaufau i se tasi e iloa e Raul. Ua le nofo lelei Raul ma ua ia iloaina le sese o mea ua latou faia. Ao ia mafaufau po o le a se mea e fai, sa faasaga mai lana uo o Iese, o se tasi e ese lana lotu ma o se tagata e fiafia i ai Raul, ma fai atu ia Raul, “Ei, o le a le mea ua loloto ai lau pupula?”
Mafaufau i mataupu faavae taitasi mo le mauaina o le malamalama faaleagaga e fesoasoani e atiae ai lau tali atu.
Iloilo manatu faavae ma fesili faatasi ma se vaaiga e faavavau
Filifili se tagata e tasi mai le ata faataitai (O Iese po o le tagata o loo faatauemu i ai).
2. Tali fesili nei i totonu o lau api faamaumau mo suesuega:
-
O le a sou manatu i se lagona o le Alii i le tagata ua e filifilia?
-
E ono faapefea e le vaai atu i le tagata lea e faapei ona silasila i ai le Alii ona aafia ai le tali a Raul i le fesili a Iese?
Saili le malamalama atili e ala i punavai paia ua atofaina
3. Tali fesili nei i totonu o lau api faamaumau mo suesuega:
-
E ono faapefea e le manatuaina ma le faaaogaina o mataupu faavae i le Mataio 5:14–16 ona fesoasoani mo Raul?
-
O a ni isi punaoa paia ua atofaina e te manatu e mafai ona fesoasoani atu ia Raul?
Faatino i le faatuatua
4 Tali fesili nei i totonu o lau api faamaumau mo suesuega:
-
Aisea e ono faigata ai ia Raul ona faatino lona faatuatua i lenei tulaga?
-
O le a se mea e te fautuaina ai Raul e mafai ona ia faia e faatino ai i le faatuatua?
Mafaufau i se tulaga e tai pei o le tulaga o Raul o loo feagai ma oe i le taimi nei pe mafai ona oulua fetaiai i le lumanai.
-
E mafai faapefea e mea ua e aoaoina i le asō ona fesoasoani atu ia te oe e avea ai ma faataitaiga mo isi?