Seminare
2 Korinito 1; 4

2 Korinito 1; 4

“Faamafanafanaina e le Atua”

E toalua tamaitai talavou o loo nonofo faatasi i luga o se nofoa umi. O se tasi o tamaitai talavou e foliga mai e le fiafia, faanoanoa, pe o popole i se mea. O le isi tamaitai talavou o loo faaalia le popole i ai ma e foliga mai o loo taumafai e faamafanafana atu i le isi.

Tatou te oo uma lava i le lototiga ma le faanoanoa, faafatiatamai ma faalavelave, ma logo i tiga ma le ma’i. Ina ua feagai tagata o Korinito ma faigata, sa tusi atu Paulo i tagata o le Ekalesia iina e ofo atu le lagolago faifai pea ma fautuaga. Sa ia molimau atu e uiga i le mafanafana ma le filemu o loo avanoa mo i latou e ala mai i le Tama Faalelagi ma Iesu Keriso (tagai i le 2 Korinito 1:3–4). O lenei lesona e mafai ona fesoasoani ia te oe e malamalama ai i nisi o auala e tuuina mai ai e le Atua le faamafanafanaga i Ana fanau ma faailoa ai auala e mafai ona e faasoa atu ai Lana faamafanafanaga i isi tagata.

O le a se mea na te aumaia ia te oe le mafanafana?

  • O le a ma po o ai foi e te tapa atu i ai mo se faamafanafanaga i taimi faigata?

  • O le a ma po o ai foi e tuuina atu ia te oe le faamafanafanaga sili? Aisea?

Tusitusi i luga o se fasipepa i se peni po o se penitala. 1. Faamae’a le gaoioiga lenei i lau api faamaumau mo suesuega:

Fai se lisi o tulaga o le olaga o i ai nei po o le lumanai atonu e te manaomia ai se fesoasoani ma se faamafanafanaga e te manuia ai.

Mafaufau loloto i fesili nei:

  • Aisea e mafai ai ona e faatuatuaina o le a faamafanafanaina oe e le Tama Faalelagi ma Iesu Keriso e ala i le meaalofa o le Agaga Paia i taimi faapenei?

  • O le a le lelei o lou lagona e te iloa ma maua ai le mafanafana lea e ofoina mai e le Tama Faalelagi ma Iesu Keriso e ala mai i le Agaga Paia?

  • E ono mafai faapefea ona e faasoa atu i isi le faamafanafanaga Laua te ofoina mai?

Saili mo tali i fesili na muamua atu a o e suesue i lenei lesona.

Sa manao Paulo e faamafanafana i le Au Paia i Korinito i o latou tofotofoga

A o i ai i Maketonia, sa maua e Paulo se tala mai se soo e igoa ia Tito e faapea o lana tusi muamua na taliaina lelei e le Au Paia i Korinito (tagai i le 2 Korinito 2:13; 7:5). Sa aoao foi Paulo e uiga i luitau tumau o nei Au Paia ma tusia ai se isi tusi (2 Korinito) e ofo atu ai ia i latou le faamafanafanaga ma tautalagia ai o latou faafitauli.

  • O le a se mea e te manatua e uiga ia Korinito ma faigata o le Au Paia iina?

Faitau le 2 Korinito 1:1–4, taula’i toto’a i le auala na faatomua ai e Paulo lana tusi lona lua i le Au Paia i Korinito.

  • O le a se mea na sili ona e maitauina i le faatomuaga a Paulo i le Au Paia?

  • O a igoa po o faalagiga na faaaoga e Paulo mo le Tama Faalelagi na e gauai atu i ai?

  • O a ni mea ua aoao mai e na igoa po o faalagiga ia te oe e uiga i le Tama Faalelagi?

  • O le a le upumoni na aoao mai e Paulo i le fuaiupu 4?

Mauaina o le faamafanafanaga mai le Tama Faalelagi ma fesoasoani i isi ia latou maua foi lea lava faamafanafanaga

Atonu na e faailoa maia se upumoni mai le fuaiupu 4 e pei o lenei: A tatou maua le faamafanafanaga a le Tama Faalelagi i taimi o o tatou tofotofoga, e mafai ona sili atu ona tatou fesoasoani i isi ia latou mauaina foi.

  • O le a sou manatu i le uiga o le “faamafanafana atu ia te i latou ua i ai i soo se faalavelave”? (fuaiupu 4).

  • Aisea e te manatu ai o lenei faamoemoega mo soo o Iesu Keriso?

Tusitusi i luga o se fasipepa i se peni po o se penitala. 2. Tali fesili nei i totonu o lau api faamaumau mo suesuega:

  • O anafea na e maua ai po o se tasi e te iloa le fesoasoani ma le faamafanafanaga mai le Tama Faalelagi i le taimi o se tofotofoga?

  • O le a se mea na e aoaoina pe na latou aoaoina mai lena aafiaga?

  • O le a sou manatu i se mea e mafai ona e faia e maua atili ai le faamafanafanaga a le Atua pe a e manaomia?

Faitau le saunoaga lenei mai ia Peresitene Spencer W. Kimball (1895–1985).

Atatosi vali o Peresitene Spencer W. Kimball.

E amanaia i tatou e le Atua, ma na te leoleo ia te i tatou. Ae e masani lava ona auala mai i se isi tagata lona taulimaina o o tatou manaoga. O le mea lea, o se mea taua tele lo tatou auauna atu i le tasi ma le isi i le malo o le Tama Faalelagi.

(Aoaoga a Peresitene o le Ekalesia: Spencer W. Kimball [2006], 82)

Afai o iai, matamata le vitio “God Will Lift Us Up” (4:58) i luga o le ChurchofJesusChrist.org. O loo faamatala ai le tala i se tamaitai talavou e igoa ia Brittany lea na maua le mafanafana i le auauna atu i isi ma le faalagolago i le Alii nai lo le taulai atu i lona lava faaletonu faalesoifua maloloina.

4:58

  • Aisea e te manatu ai e masani ona faaaoga i tatou e le Tama Faalelagi e fesoasoani ai i isi tagata i taimi o o latou tofotofoga e lagona ai Lona alofa ma le faamafanafanaga?

Mafaufau i se tasi e te iloa o loo feagai nei ma se faigata. Mafaufau ma le agaga tatalo pe ono mafai faapefea ona e fesoasoani ia i latou ia lagona le faamafanafanaga ua ofoina mai e le Tama Faalelagi a o e faia mea nei:

  1. Mafaufau i mea ua e aoaoina mai le 2 Korinito 1:1–4 e ono mafai ona fesoasoani ai i lenei tagata.

  2. Faitau ni seti se lua pe sili atu o fuaiupu nei, o loo i ai aoaoga faaopoopo a Paulo i Korinito e uiga i tofotofoga. Sue se fasifuaitau po o se fuaiupu e te lagona o le a aoga i le tagata na e filifilia.

    • 2 Korinito 1:8–11

    • 2 Korinito 4:6–10

    • 2 Korinito 4:14–18

  3. Fai se mea i le taimi nei e fesoasoani ai i lenei tagata ia lagona le faamafanafanaga a le Tama Faalelagi. Mafaufau e tatalo mo i latou e pei ona sa tatalo le Au Paia i Korinito mo Paulo (tagai i le 2 Korinito 1:11). E le gata i lea, e mafai ona e tusi atu i lenei tagata se savali faamalosiau e pei ona sa faia e Paulo i Korinito, e ui atonu o lau savali o se tesi, imeli, po o sina faamatalaga nai lo o se tusi. (Mafaufau e faaaofia ai mea na e aoaoina i lenei lesona mai le 2 Korinito 1; 4 faapea foi ma soo se aafiaga patino e mafai ona fesoasoani i ai.)

  4. Fai ni fuafuaga faaopoopo e fesoasoani ai i lenei tagata. Atonu e uunaia oe e le Tama Faalelagi e fai nisi faatinoga faaopoopo, e pei o le asiasi atu ia i latou po o le auauna atu ia i latou i nisi o auala. Ia mautinoa e tusi i lalo soo se fuafuaga e te mafaufau i ai i se nofoaga o le a faamanatu atu ai ia te oe e te tulitaulai i ai, e pei o lau kalena, i luga o lau telefoni feaveai, po o luga o se fasi pepa o le a e tilotilo i ai i se taimi mulimuli.

Tusitusi i luga o se fasipepa i se peni po o se penitala. 3. Aotele mea na e aoaoina i le taimi o lenei lesona ma mea ua e fuafua e fai i le taimi nei.

Tuu i le Faitalia: O e Manao e Aoao Atili?

2 Korinito 1:4. Aisea ua faamoemoe mai ai le Alii ia te au e aapa atu ma faamafanafana i tagata o loo manaomia le fesoasoani?

Na aoao mai Elder Gary E. Stevenson o le Korama a Aposetolo e Toasefululua le mea lenei:

15:11
O le atatosi aloaia o Elder Gary E. Stevenson o le Korama o Aposetolo e Toasefululua, 2015.

Mai le taimi na tatou tutu a’e ai mai le vai o le papatisoga, na faatagaina ai i tatou i lenei galuega. Tatou te aapa atu i le alofa i isi ona o le mea lena na poloaiina i tatou e lo tatou Faaola e fai. … Soo se taimi lava e oo ai o tatou tuaoi i ni mafatiaga faaletino pe faaleagaga, tatou te taufetuli atu e fesoasoani. Tatou te tauave avega a le tasi ma le isi ina ia māmā. Tatou te faanoanoa faatasi ma i latou o ē faanoanoa. Tatou te faamafanafana ia i latou o e manaomia le faamafanafanaga. Ua faamoemoeina ma le alofa e le Alii lenei mea mai ia i tatou. Ma o le a oo mai le aso o le a tatou tali atu ai ia te Ia mo le tausiga o loo tatou faia e auauna atu i Lana lafu.

(Gary E. Stevenson, “Leoleoina o Agaga,” Liahona, Nov. 2018, 111)

2 Korinito 4:17. O le a le uiga o le manatu o Paulo ina ua ia faasino i o tatou luitau faaletino o se “puapuaga mamasagia”?

Na aoao mai e Elder Paul V. Johnson o le Au Peresitene o Fitugafulu e faapea:

11:30
Ua pueina se atatosi o Elder Paul V. Johnson o le Korama a Fitugafulu, 2021.

I le totonugalemu o faafitauli, e toetoe lava a le mafai ona iloa atu, o faamanuiaga o loo agai mai e sili atu ona maoae nai lo le tiga, faalumaina, po o le lotomomomo lea tatou te ono oo iai i lena taimi. … Na aoao mai le Aposetolo o Paulo, “Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau” [2 Korinito 4:17]. E manaia le faaaogaina e Paulo o le faaupuga “puapuaga mamasagia.” O le upu lenei e sau mai se tagata sa fasia, fetogia, malaia i folauga , faafalepuipuiina, ma sa oo i le tele o isi tofotofoga. Ailoga e ta’ua e le toatele o i tatou o tatou puapuaga e mamasagia. Ae pe a faatusa atu i faamanuiaga ma le tuputupu ae tatou te mauaina mulimuli, i lenei olaga ma le faavavau, e moni lava e mamasagia o tatou puapuaga. …

O nisi taimi tatou te mananao ai ia tatou tuputupu ae e aunoa ma ni luitau ma ia atiina ae le malosi e aunoa ma se tauiviga. Peitai e le mafai ona oo mai le tuputupu ae i le uia o se auala faigofie. Ua tatou malamalama lelei o se tagata taalo afeleti e musu i toleniga faigata ma malolosi o le a le avea lava ma se tagata afeleti iloga i le lalolagi. E tatau ona tatou faaeteete ia aua ne’i o tatou inoino i mea tonu lava ia e fesoasoani tatou te maua ai le amioatua .

(Paul V. Johnson, “Ua Tatou Manumalo A’ia’i, Ona o Ia Ua Alofa Mai Ia Te i Tatou,” Liahona, Me 2011, 79–80)