Te mau hōpoi’a

E tauturu te autahu’ara’a a Melehizedeka i te mau tamari’i a te Atua ’ia fa’aineine ia rātou i te ho’i atu i mua i tōna aro. E ’ohipa ’āmui te mau melo nō te pupu peresibutero, nō te tauturu ’ia rave fa’aoti i te ’ohipa nō te fa’aorara’a ’e te fa’ateiteira’a a te Atua. E tāvini rātou ia vetahi ’ē, e rave fa’aoti i te mau hōpoi’a a te autahu’ara’a, e patu i te hō’ēra’a ’e e ha’api’i mai ’e e ora i te ha’api’ira’a tumu (hi’o Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hōp’ea nei, 8.1).

E ha’api’i te peresideni nō te pupu peresibutero i te mau melo o te pupu i tā rātou mau hōpoi’a o te autahu’ara’a. Tei roto ato’a i tāna mau hōpoi’a te tāvinira’a i roto i te ’āpo’ora’a pāroita ; te fa’anahora’a i te mau tauto’ora’a ’e te peresidenira’a o te Sōtaiete Tauturu ; ’e te hi’opo’ara’a i te aupurura’a, te mau ’ohipara’a, te mau parau fa’a’ite, te mau pu’e parau ’e te faufa’a moni. E tauturu tōna nā tauturu ’e te pāpa’i parau iāna (hi’o 8.3.3.2).

E ruru tāmau te peresidenira’a nō te pupu peresibutero ’e te pāpa’i parau. Te tauturura’a i te mau peresibutero tauāmuri nei ’ia fa’aineine ia rātou nō te fa’ari’i i te autahu’ara’a a Melehizedeka, ’o te hō’ē ïa teie o te mau ’ohipa mātāmua roa a te peresidenira’a (hi’o 8.4).

E fa’aau te mau peresidenira’a nō te pupu peresibutero ’e te Sōtaiete Tauturu i te mau tonora’a o te aupurura’a ’e e tauturu i te arata’i i te ’ohipa hiero ’e te ’ā’amu ’utuāfare, ’oia ato’a te mau tauto’ora’a nō te ani i te tā’āto’ara’a ’ia fa’ari’i i te mau ha’amaita’ira’a o te ’evanelia. E ti’ara’a faufa’a roa ato’a tō rātou i roto i te ha’api’ira’a i te mau melo o te pāroita i te mau parau tumu o te aupurura’a, te uiuira’a nō te aupurura’a, te orara’a i te ture nō te ha’apaera’a mā’a, te fa’ananeara’a i te fa’arava’ira’a iāna iho ’e te fa’aineinera’a iāna iho ’e te ’utuāfare (hi’o 22.6.2).

E putuputu te mau pupu peresibutero i te piti ’e te maha o te sābati o te ’āva’e nō te fa’arahi i te fa’aro’o, nō te patu i te hō’ēra’a ’e nō te ha’apūai i te mau ’utuāfare ’e te mau nohora’a. Nā roto i te pure, e mā’iti te peresidenira’a nō te pupu peresibutero i te mau a’ora’a nō roto mai i te ’āmuira’a rahi i tupu iho nei, nō te ’āparau ’ia au i te mau hina’aro o te mau melo (hi’o 8.2.1.2).

E nehenehe te mau peresidenira’a nō te pupu peresibutero e fa’anaho i te mau ’ohipara’a nō te ha’apūai i te mau melo o te pupu ’e e hōro’a ia rātou i te mau rāve’a nō te tāvini ’āmui (hi’o 8.2.1.3).

E ’āparau te ’episekōpo ’e te peresideni nō te pupu peresibutero nō te tahi atu ā mau pi’ira’a mai te mea e hina’arohia (hi’o 8.3.5).