Ngaahi Fatongiá

ʻOku tokoni ʻa e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ki he kau finemuí ke nau hoko ko ha kau ākonga ʻa Sīsū Kalaisi ʻi he kotoa ʻo ʻenau moʻuí ʻi heʻenau fakahoko mo tauhi ʻa e ngaahi fuakava toputapú mo fakaloloto ʻenau uluí. ʻI he ngaahi kalasi ʻa e kau finemuí, ʻoku nau tokoniʻi ʻa e niʻihi kehé ke fakahoko honau ngaahi fatongia ʻi he fuakavá, langaki ʻa e uouangatahá, pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá, 11.1.1.)

ʻE poupouʻi ʻe he sekelitali fakakalasi ʻo e Kau Finemuí ʻa e kau palesitenisī fakakalasí mo e kau taki ʻo e Kau Finemuí ke nau tokoni pe ngāue fakaetauhi ki he kau mēmipa ʻo e kalasí. Te ne teuteu ha ʻasenita ki he ngaahi fakataha fakapalesitenisií, hiki fakamatala, mo muimuiʻi ʻa e ngaahi ngāue naʻe vahé mo e maʻulotu ʻi he ngaahi fakataha ʻo e Sāpaté (11.3.4.2).

ʻE fakataha maʻu pē ʻa e kau palesitenisī fakakalasi ʻo e Kau Finemuí pea ʻoku kau ki ai ʻa e sekelitali fakakalasí mo e kau taki kakai lalahi ʻo e Kau Finemuí naʻe vahe ke poupouʻi kinautolú. ʻE fealēleaʻaki fakataha ʻa e kau takí mo lotua ha fakahā fekauʻaki mo e finangalo ʻa e ʻEikí ki heʻenau kalasí. ʻE lava ke kau ʻi he ngaahi fakataha ko ʻení ha ngaahi fealeaʻaki ki hono tokoniʻi ʻo e kau mēmipa ʻo e kalasí, ʻo tokanga makehe ki hono poupouʻi ʻo e kau mēmipa foʻoú mo tokoniʻi ʻa e kāingalotu māmālohí, pea mo palani ʻa e ngaahi fakataha fakakalasí, ngāue tokoní, mo e ngaahi ʻekitivitií. (Vakai, 11.3.4.3.)

Ke maʻu ha ngaahi fakahinohino mo ha ngaahi tuʻutuʻuni lahi ange, vakai ki he vahe 11.6 ʻi he Tohi Tuʻutuʻuni Fakakātoá.