Ngaahi Fatongiá

ʻOku tokoni ʻa e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ki he kau finemuí ke nau hoko ko ha kau ākonga ʻa Sīsū Kalaisi ʻi he kotoa ʻo ʻenau moʻuí ʻi heʻenau fakahoko mo tauhi ʻa e ngaahi fuakava toputapú mo fakaloloto ʻenau uluí. ʻI he ngaahi kalasi mo e ngaahi fakataha ʻa e kau finemuí, ʻoku nau tokoniʻi e niʻihi kehé, fakahoko honau ngaahi fatongia ʻi he fuakavá, langaki ʻa e uouangatahá pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá, 11.1.1.)

ʻE tataki ʻe he kau palesiteni fakakalasí ʻa e ngaahi feinga ʻa e kalasí ke kau ʻi he ngāue ʻa e ʻOtuá ki he fakamoʻuí mo e hakeakiʻí, feinga ke ʻiloʻi mo tokoniʻi ʻa e finemui takitaha, palani mo tataki ʻa e ngaahi fakataha fakakalasi ʻo e Sāpaté mo e ngaahi ʻekitivitī kehé, kau ʻi he ngaahi ngāue ʻa e uōtí ke vahevahe ʻa e ongoongoleleí, mo kau ʻi he ngaahi ngāue fakatemipalé mo e hisitōlia fakafāmilí (vakai, 11.3.4.2). ʻE tokoni kiate ia hono ongo tokoní.

ʻE fakataha maʻu pē ʻa e kau palesitenisī fakakalasi ʻo e Kau Finemuí pea ʻoku nau kau fakataha mo e kakai lalahi ʻoku taki ʻi he Kau Finemuí kuo vahe ke poupouʻi kinautolú. ʻI he lolotonga ʻo e ngaahi fakatahá ni, te nau fealēleaʻaki fakataha mo lotua ha fakahā fekauʻaki mo e finangalo ʻa e ʻEikí ki heʻenau kalasí. ʻE lava ke kau ʻi he ngaahi fakataha ko ʻení ha ngaahi fealēleaʻaki ki hono tokoniʻi ʻo e kau mēmipa ʻo e kalasí, tokanga makehe ki hono poupouʻi ʻo e kau mēmipa foʻoú mo tokoniʻi ʻa e kāingalotu māmālohí, pea mo palani ʻa e ngaahi fakataha fakakalasí, ngāue tokoní, mo e ngaahi ʻekitivitií. (Vakai, 11.3.4.3.)

ʻE aleaʻi ʻe he fakataha alēlea fakauooti ʻa e toʻu tupú ha ngaahi founga ke tokoniʻi ai ha niʻihi kehe ke langaki ʻenau fakamoʻoní, maʻu ʻa e ngaahi ouau faifakamoʻuí, tauhi e ngaahi fuakavá, pea hoko ko ha kau muimui ʻo Sīsū Kalaisi kuo fakatapui. Te nau fealēleaʻaki fakataha ki he ngaahi fiemaʻu ʻa e kau finemui mo e kau talavou ʻi he uōtí. Te nau lava ʻo aleaʻi ha ngaahi ʻekitivitī ke feau ʻa e ngaahi fiemaʻu ko ʻení. (Vakai, 11.3.4.4.)

Ke maʻu ha ngaahi fakahinohino mo ha ngaahi tuʻutuʻuni lahi ange, vakai ki he vahe 11.6 ʻi he Tohi Tuʻutuʻuni Fakakātoá.