Li k’a’ru teneb’anb’il

Li ch’uut reheb’ li Saaj Ixq naxtenq’aheb’ lix raarookil rab’in li Dios chixkawresinkil rib’ chi sutq’iik rik’in a’an. Naxtenq’aheb’ li saaj ixq chixtaaqenkil li Jesukristo chiru chixjunil lix yu’ameb’ naq neke’xk’uleb’ ut neke’xpaab’eb’ li loq’laj sumwank ut neke’jala xch’ool. Sa’eb’ lix tzoleb’aal ut naq neke’xch’utub’ rib’, eb’ li saaj ixq neke’k’anjelak chiruheb’ li ras riitz’in, neke’xb’aanu li teneb’anb’il xb’aaneb’ lix sumwank, neke’xnimob’resi li junajil, ut neke’xtzol ut neke’xyu’ami li tzol’leb’. (Chi’ilmanq Jolomil K’anjenel Hu, 11.1.1.)

Li awa’b’ej re li tzoleb’aal naxb’eresi xtz’aqonik li tzoleb’aal sa’ lix k’anjel li Dios re li kolb’a-ib’ ut re li taqenaqil loq’al, naxnaw ru ut nak’anjelak chiru li junjunq chi saaj ixq, naxk’uub’eb’ ut naxb’eresiheb’ li tzoleb’aal sa’ domingo ut xkomoneb’ chik li k’anjel, natz’aqon sa’ xk’anjel li teep re xwotzb’al li evangelio, ut natenq’an sa’ li k’anjel re li santil ochoch ut li resilal li junkab’al (chi’ilmanq 11.3.4.2). Eb’ laj tenq’ aj k’ehol na’leb’ neke’xtenq’a.

Eb’ li awa’b’ejil re xtzoleb’aaleb’ li Saaj Ixq neke’ch’utla chi kok’ aj xsa’, ut neke’oken ajwi’ jolominel reheb’ li Saaj Ixq li ak ninqeb’ li taqlanb’ileb’ chixtenq’ankileb’. Neke’xk’uub’ xna’leb’ sa’ komonil ut neke’xsik’ xk’utb’esinb’il na’leb’ chirix li rajom li Qaawa’ choq’ re lix tzoleb’aaleb’. Sa’eb’ li ch’utam a’in naru neke’xk’uub’ k’anjelak chiruheb’ li komon sa’ li tzoleb’aal, jo’eb’ ajwi’ li ak’ komon ut li ink’a’ neke’wulak, ut naru neke’xk’uub’eb’ li ch’utam reheb’ li tzoleb’aal ut eb’ li kok’ k’anjel. (Chi’ilmanq 11.3.4.3.)

Li jolomil ch’utam re li teep na’aatinak chirix xtenq’ankil chixjunil chixtawb’al xnawom xch’ool, chixk’ulb’al li k’ojob’anb’il k’anjel re li kolb’a-ib’, chixk’uulankileb’ lix sumwank, ut chi ok choq’ tz’aqal tzolom chiru li Jesukristo. Neke’aatinak sa’ komonil chirix li rajomeb’ ru li saaj ixq ut saaj winq sa’ li teep. Neke’aatinak chirixeb’ li kok’ k’anjel li naru neke’tenq’ank reheb’. (Chi’ilmanq 11.3.4.4.)

Re xtawb’al xkomon chik li b’eresink ut li chaq’rab’ink, chi’ilmanq li tasal 11.6 sa’ li Jolomil K’anjenel Hu.