Dagiti Pagrebbengan

Tulongan ti organisasion ti Young Women dagiti ipatpateg nga annak a babbai ti Dios nga agsagana nga agsubli iti sidongna. Tulonganna dagiti agtutubo a babbai nga agbalin a disipulo ni Jesucristo iti tungpal biag bayat ti panangaramid ken panangtungpalda kadagiti sagrado a katulaganda ken panangpaunegda iti pannakapasurotda. Kadagiti klase ken panaguummongda, agserbi dagiti agtutubo a babbai kadagiti dadduma, tungpalenda dagiti pagrebbenganda iti katulagan, mangbangon iti panagkaykaysa, ken agsursuro ken agbiagda iti doktrina. (Kitaen iti Sapasap a Handbook, 11.1.1.)

Idauluan dagiti presidente ti klase dagiti panagregget ti klase a makipaset iti trabaho ti Dios iti pannakaisalakan ken pannakaitan-ok, mangam-ammo ken agserbi iti tunggal agtutubo a babai, agplano ken mangidaulo kadagiti miting ti klase iti Domingo ken dadduma pay nga aktibidad, makipaset kadagiti panagregget ti ward a mangibinglay iti ebanghelio, ken makipaset iti panagregget iti family history (kitaen iti 11.3.4.2). Tumulong kenkuana dagiti mamagbagana.

Regular nga agtataripnong dagiti panguluen ti klase ti Young Women ken makitipon kadakuada dagiti nataengan a lider ti Young Women a naituding a mangsuporta kadakuada. Aggiinnumanda a sangkamaysa ken umawat iti paltiing maipapan iti pagayatan ti Apo para iti klaseda. Dagitoy a miting ket mabalin a mangiraman kadagiti panaglilinnawag maipapan iti panagserbi kadagiti miembro ti klase, nga addaan iti naisangsangayan nga atension para iti panangsuporta kadagiti baro a miembro ken panangtulong kadagiti saan unay nga aktibo a miembro, ken panagplano kadagiti miting ti klase, serbisio, ken aktibidad. (Kitaen iti 11.3.4.3.)

Pagsasaritaan ti konseho dagiti agtutubo ti ward dagiti wagas a mangtulong kadagiti dadduma a maaddaan kadagiti pammaneknek, umawat kadagiti pangisalakan nga ordinansa, mangtungpal kadagiti katulagan, ken agbalin a naikonsagrar a pasurot ni Jesucristo. Aggiinnumanda a sangkamaysa maipapan kadagiti kasapulan dagiti agtutubo a babbai ken agtutubo a lallaki iti ward. Mabalin a pagsasaritaanda dagiti aktibidad tapno maipaay dagitoy a kasapulan. (Kitaen iti 11.3.4.4.)

Para kadagiti mainayon a pangiwanwan ken annuroten, kitaen iti benneg 11.6 iti Sapasap a Handbook.