Ngaahi Fatongiá

ʻOku tokoni ʻa e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ki he kau finemuí ke nau hoko ko ha kau ākonga ʻa Sīsū Kalaisi ʻi he kotoa ʻo ʻenau moʻuí ʻi heʻenau fakahoko mo tauhi ʻa e ngaahi fuakava toputapú mo fakaloloto ʻenau uluí. ʻI heʻenau ngaahi kalasí mo e ngaahi fakatahaʻangá, ʻoku nau tokoniʻi ʻa e niʻihi kehé ke fakahoko honau ngaahi fatongia ʻi he fuakavá, langaki ʻa e uouangatahá, pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá, 11.1.1.)

ʻE tataki ʻe he palesiteni fakakalasí mo hono ongo tokoní ʻa e ngaahi feinga ʻa e kalasí ke kau ʻi he ngāue ʻa e ʻOtuá ki he fakamoʻuí mo e hakeakiʻí, feinga ke ʻiloʻi mo tokoniʻi ʻa e finemui takitaha, palani mo tataki ʻa e ngaahi fakataha fakakalasi ʻo e Sāpaté mo e ngaahi ʻekitivitī kehé, kau ʻi he ngaahi ngāue ʻa e uōtí ke vahevahe ʻa e ongoongoleleí, mo kau ʻi he ngaahi ngāue fakatemipalé mo e hisitōlia fakafāmilí (vakai, 11.3.4.2).

ʻE fakataha maʻu pē ʻa e kau palesitenisī fakakalasi ʻa e Kau Finemuí pea ʻoku nau kau fakataha mo e kakai lalahi ʻoku taki ʻi he Kau Finemuí kuo vahe ke poupouʻi kinautolú. ʻE fealēleaʻaki fakataha ʻa e kau takí mo lotua ha fakahā fekauʻaki mo e finangalo ʻa e ʻEikí ki heʻenau kalasí. ʻE lava ke kau ʻi he ngaahi fakataha ko ʻení ha ngaahi fealēleaʻaki ki hono tokoniʻi ʻo e kau mēmipa ʻo e kalasí, tokanga makehe ki hono poupouʻi ʻo e kau mēmipa foʻoú mo tokoniʻi ʻa e kāingalotu māmālohí, pea mo palani ʻa e ngaahi fakataha fakakalasí, ngāue tokoní, mo e ngaahi ʻekitivitií. (Vakai, 11.3.4.3.)

Ke maʻu ha ngaahi fakahinohino mo ha ngaahi tuʻutuʻuni lahi ange, vakai ki he vahe 11.6 ʻi he Tohi Tuʻutuʻuni Fakakātoá.