Mga Responsibilidad

Ang organisasyon sa Young Women nagtabang sa hinigugmang anak nga mga babaye sa Dios nga makaandam sa pagbalik ngadto sa Iyang presensya. Kini nagtabang sa mga batan-ong babaye nga mahimong mga disipulo ni Jesukristo sa tibuok kinabuhi samtang sila naghimo ug nagtuman sa sagrado nga mga pakigsaad ug nagpalawom sa ilang pagkakabig. Sa ilang mga klase ug mga panagpundok, ang mga batan-ong babaye moserbisyo sa uban, motuman sa mga responsibilidad sa pakigsaad, magpalambo og panaghiusa, ug magkat-on ug mosunod sa doktrina. (Tan-awa sa Kinatibuk-ang Tamdanan nga Basahon, 11.1.1.)

Ang presidente sa klase ug ang iyang mga magtatambag mangulo sa mga paningkamot sa klase sa pag-apil sa buhat sa Dios sa kaluwasan ug kahimayaan, makig-ila-ila ug moserbisyo sa matag batan-ong babaye, magplano ug modumala sa mga miting sa klase sa Dominggo ug ubang mga kalihokan, moapil sa mga paningkamot sa ward sa pagpakigbahin sa ebanghelyo, ug moapil sa mga paningkamot sa templo ug family history (tan-awa sa 11.3.4.2).

Ang mga kapangulohan sa klase sa Young Women kanunay nga magtagbo ug ubanan sa hamtong nga mga lider sa Young Women nga gi-assign sa pagsuporta kanila. Sila magkauban nga magtinambagay ug magtinguha og pagpadayag mahitungod sa kabubut-on sa Ginoo alang sa ilang klase. Kini nga mga miting mahimong maglakip og mga panaghisgot sa pagserbisyo sa mga sakop sa klase, nga adunay espesyal nga pagtagad sa pagsuporta sa bag-ong mga miyembro ug sa pagtabang sa dili kaayo aktibo nga mga miyembro, ug pagplano og mga miting sa klase, serbisyo, ug mga kalihokan. (Tan-awa sa 11.3.4.3.)

Alang sa dugang nga mga lagda ug mga palisiya, tan-awa ang seksiyon 11.6 sa Kinatibuk-ang Tamdanan nga Basahon.