Tō’u pi’ira’a ’ei ta’ata ha’uti piāna nō te pāroita
Te mau hōpoi’a
’Ua māuruuru roa te Fatu nō tō ’oe hina’arora’a e tāvini i roto i tāna ’Ēkālēsia. E ’ite mai ’oe i raro nei i te hi’ora’a nō te mau hōpoi’a o tō ’oe pi’ira’a.
’Ōpuara’a o te pehe i roto i te ’Ēkālēsia
E ha’amara’a te hīmene mo’a i te fa’aro’o ia Iesu Mesia. E tītau manihini te reira i te Vārua ’e e ha’api’i i te ha’api’ira’a tumu. E fa’atupu ato’a te reira i te hō’ē nino’a mana’o fa’atura, e tāhō’ē i te mau mero ’e e hōro’a i te rāve’a nō te ha’amori i te Metua i te ao ra ’e ia Iesu Mesia. Tē fa’a’ite nei te Fatu, « ’Ua māuruuru roa tō’u vārua i te hīmene o te ’ā’au » (Te Ha’api’ira’a Tumu ’e te mau Fafaura’a 25:12). (Hi’o Buka Arata’i Rahi : Te tāvinira’a i roto i Te ’Ēkālēsia a Iesu Mesia i te Feiā Mo’a i te mau Mahana Hope’a nei, 19.1.)
Te ta’ata ha’uti piāna nō te pāroita
E tauturu te ta’ata ha’uti piāna nō te pāroita i te mau melo o te pāroita ’ia ha’amara’a i te fa’aro’o ia Iesu Mesia nā roto i te pehe mo’a. E hōro’a mai rātou i te pehe nō te ’ōmuara’a ’e te fa’ahōpe’ara’a ’e te ’āpe’era’a i te mau hīmene i te taime o te purera’a ’ōro’a ’e te tahi atu mau rurura’a a te pāroita, ’ia anihia mai. Mai te mea e hina’arohia, e nehenehe ato’a te ta’ata ha’uti piāna e ’āpe’e i te pupu hīmene ’aore rā e tāvini ’ei fa’ata’i piāna nō te Paraimere. (Hi’o 19.4.3.2).
Te pehe nō te mau rurura’a a te ’Ēkālēsia
« E riro te pehe fa’auruhia ’ei tufa’a faufa’a rahi roa i roto i tā tātou mau purera’a a te ’Ēkālēsia » (Te mau Hīmene, Parau Ha’amāramaramara’a a te Peresidenira’a Mātāmua). E ti’a i te mau hīmene tei mā’itihia e ha’api’i i te ’evanelia ma te mana ’e te māramarama (hi’o 19.3.1).
Pehe nō te purera’a ’ōro’a
Te pehe i roto i te purera’a ’ōro’a, tē vai ra te hīmene nō te ’īritira’a ’e te ’ōpanira’a i te purera’a ’e nā mua a’e e fa’aterehia ai te ’ōro’a mo’a. E nehenehe ato’a e tu’u i roto i te purera’a ’ōro’a hō’ē ’aore rā hau atu mau hīmene ’aore rā mau fa’anahora’a pehe. E nehenehe e fa’a’ohipa i te mau hīmene ’aore rā te tahi atu mau pehe mo’a tei mā’itihia nō te pehe ’ōmuara’a ’e fa’ahōpe’ara’a, te pehe nō te pupu hīmene ’e te fa’anahora’a e hīmene hō’ē ta’ata ’aore rā ’ei pupu na’ina’i. (Hi’o 19.3.2.)
Te ha’api’ipi’ira’a ’e te mau mātēria
Nō te mau fa’ahu’ahu’ara’a hau atu nō ni’a i te ha’api’ipi’ira’a pehe, ’a hi’o i te tuha’a 19.6 o te Buka Arata’i Rahi. Mai te mea ’aita e ta’ata ha’uti piāna e vai ra nō te mau rurura’a a te pāroita, ’a hi’o i te tuha’a 19.4.3.2 nō te fa’ari’i i te fa’ata’ira’a haruharuhia.
Te mau arata’ira’a ’e te mau fa’aturera’a
Nō te mau fa’aturera’a ’e te mau arata’ira’a hau atu, mai te fa’ari’ira’a i te pehe, te fa’a’ohipara’a i te mau ’upa’upa a te fare pure nō te ha’api’ipi’ira’a ’aore rā nō te mau pupu hīmene a te ’oire, ’a hi’o i te tuha’a 19.7 o te Buka Arata’i Rahi.