Tiutetauave

O korama o le Perisitua Arona e fesoasoani i alii talavou e osia ma tausia feagaiga paia ma faalolotoina ai lo tatou liua ia Iesu Keriso ma Lana talalelei. O le faamoemoega o se korama o le fesoasoani lea i ē umia le perisitua e galulue faatasi e faataunuu le galuega a le Atua mo le faaolataga ma le faaeaga. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 10.1, Potutusi o le Talalelei.)

E auai atu alii talavou i le korama a a’oa’o i le amataga o Ianuari o le tausaga e atoa i ai lo latou ta’i 14. O le taimi lea ua onomea ai foi i latou e faauuina o ni a’oa’o pe afai ua latou saunia ma ua agavaa. Ua i ai i a’oa’o tiute e tutusa ma tiakono. Latou te tapenaina foi le faamanatuga ma auauna atu o ni uso o auaunaga. O tiute faaopoopo o loo faamatala atu i le Mataupu Faavae ma Feagaiga 20:53–59; 84:111. (Tagai i le 10.1.3.2.)

Pe a valaauina failautusi o korama, latou te saunia lisi o mataupu mo fonotaga ma tusi minute. Latou te fesoasoani foi i le failautusi o le uarota po o le faufautua o le korama e tulituliloa le auai. (Tagai i le 10.4.2.)

O le au epikopo ma taitai talavou o korama, e lagolagoina e faufautua, e fuafuaina auaunaga ma gaoioiga. E ao ona fesoasoani nei mea e faataunuu ai le galuega o le faaolataga ma le faaeaga. O gaoioiga e tatau ona faapaleni i vaega e fa o le tuputupu a’e o le tagata lava ia: faaleagaga, faaleagafesootai, faaletino, ma faaleatamai. (Tagai i le 10.2.1.3.)

O taiala ma aiaiga faavae faaopoopo, e aofia ai le lagolagoina o alii talavou e i ai manaoga faapitoa, mauaina o faatusa o Tamaiti ma le Autalavou, ma le aoina mai o taulaga anapogi, o loo maua i le vaega 10.8 o le Tusitaulima Aoao.