Ngaahi Fatongiá

ʻOku tokoni ʻa e Lautohi Faka-Sāpaté ki hono fakahoko ʻa e ngāue ʻa e ʻOtuá ki he fakamoʻuí mo e hakeakiʻí. ʻOkú ne fakahoko ʻeni ʻaki hono tokoniʻi ʻa e fānau ʻa e ʻOtuá ke nau ako mo moʻui ʻaki ʻa e ongoongolelei ʻo Sīsū Kalaisí (vakai, Tohi Tuʻutuʻuni Fakakātoá, 13.1).

ʻOku fiemaʻu ʻa e kau faiako ʻo e Lautohi Faka-Sāpaté ke nau maheni mo e kau mēmipa ʻo e kalasí, kau ai ʻa kinautolu ʻoku ʻikai maʻu kalasí. ʻE poupouʻi ʻe he kau faiakó ʻa e kāingalotú ʻi heʻenau feinga ke ʻilo mo moʻui ʻaki ʻa e ongoongolelei ʻo Sīsū Kalaisí (vakai, 13.2.3). ʻOku tataki ʻa e kau faiakó ʻe he kau palesitenisī ʻo e Lautohi Faka-Sāpate ʻi he uōtí mo kau atu ki he ngaahi fakataha alēlea fakakuata ʻa e kau faiakó (vakai, 17.4).

ʻOku fakahoko ʻa e ngaahi kalasi Lautohi Faka-Sāpaté ʻi he Sāpate ʻuluaki mo e Sāpate tolu ʻo e māhiná. ʻOku miniti ʻe 50 ʻa e ngaahi fakatahá. ʻOku kehekehe pē ʻa e tokolahi ʻo e kalasí ʻo fakatatau mo e ngaahi fiemaʻu ʻa e uooti takitaha. Ke teuteu ke faiakó, ʻe fakaʻaongaʻi ʻe he kau faiako Lautohi Faka-Sāpaté ʻa e folofolá mo e ngaahi lēsoni kuo fakataimi-tēpileʻi ʻi he Haʻu, ʻo Muimui ʻIate Aú (vakai, 13.3).

Ko e faiako ko ia ʻi he founga ʻa e Fakamoʻuí ko ha falala mo ha fatongia toputapu ia. Ko e taimi ʻoku akoʻi ai ʻa e ongoongoleleí, muimui ʻi he sīpinga ʻa Sīsū Kalaisí, ʻa ia ko e Faiako Tuʻukimuʻá. ʻE muimui ʻa e kau Faiako Lautohi Faka-Sāpaté ʻi he ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí mo e vahe 17 ʻo e Tohi Tuutuʻuni Fakakātoá (vakai, 17.1).

ʻOku fatongia ʻaki ʻe he mēmipa takitaha ʻo e Siasí ke ne ako ʻiate kinautolu pē ʻa e ongoongoleleí, ke nau ului ai ki he ʻEiki ko Sīsū Kalaisí. ʻE fatongia ʻaki ʻe he kau faiakó mo e kau takí ʻa hono poupouʻi ʻa e kāingalotú ke nau kumia ha tataki fakalaumālie pē ʻanautolu fekauʻaki mo e founga ke ako pea mo akoʻi ai ʻa e ongoongoleleí (vakai, 17.2).