Eddo ko

Jabōt Jikuuļ ej jipan̄ kōtōprak jerbal in lo̧mo̧o̧r eo an Anij im mour ijo eutiej tata. Ej kōm̧m̧an menin kōn jipan̄ ajri ro nejin Anij katak im mour kōn gospel eo an Jisōs Kraist (lale Bok in Bōk Meļeļe Eļap, 13.1).

Rūkaki ro an Jabōt Jikuuļ rej aikuj jeļā kajjien membōr in kūlaaj eo aer, ekoba ro me rejjab pād ilo kūlaaj ko. Rūkaki ro rej jipan̄ membōr ro ilo kijejeto ko aer n̄an ekkatak im mour kōn gospel eo an Jisōs Kraist (lale 13.2.3). Rūkaki ro rej tōl jān būreejtōnji eo an ward Jabōt Jikuuļ im pād ilo kweilo̧k ko an ko̧o̧njeļ eo an rūkaki ilo aolep kuwata (lale 17.4).

Jabōt Jikuuļ kūlaaj ko rej kōm̧m̧an ilo Jabōt juon im jilu ilo kajjojo allōn̄. 50 minit aeitokan. Jon̄an kūlaaj eo ej pedped ioon aikuj ko an kajjojo ward. N̄an kōppopo n̄an katakin, rūkaki ro an Jabōt Jikuuļ rej kōjerbal jeje ko rekwojarjar im katak ko kar jikejuuļi ilo Itok, Ļoor Eō (lale 13.3).

Katakin ilo wāween eo an Rilo̧mo̧o̧r ej juon lōke im eddo ekwojarjar. N̄e katakin kōn gospel eo, ļoor waanjon̄ak eo an Rilo̧mo̧o̧r, eo ej M̧aajta Rūkaki. Rūkaki ro an Jabōt Jikuuļ rej ļoor pedped in katak ko ilo Katakin ilo Wāween eo an Rilo̧mo̧o̧r im jepta 17 in Bok in Bōk Meļeļe Eļap (lale 17.1).

N̄an oktak n̄an Irooj Jisōs Kraist, kajjojo membōr in Kabun̄ in ej an eddo n̄an katak gospel eo kōn e make. Rūkaki ro im ritōl ro rej bōk eddo in kōketak membōr ro n̄an kappukot im̧we eo aer make kōn ekōjkan ekkatak im katakin gospel eo (lale 17.2).