Mwioko

E ibuobuoki te Reirei n Tabati ni kakoroan nanon ana mwakuri te Atua ibukin te kamaiuaki ao te karietataaki. E kakoroaki nanon aei man buokakiia natin te Atua n reiakina ao ni maiuakina ana euangkerio Iesu Kristo (taraa Aeniboki ni Kabuta, 13.1).

Taan reirei n te Reirei n Tabati a kataia ni kinaia kaain te kiraati, ao naake a aki roroko n te kiraati. Taan reirei a boutokaiia membwa n aia waaki n reiakina ao ni maiuakina ana euangkerio Iesu Kristo (taraa 13.2.3). A kairaki taan reirei iroun te beretitentii man te Reirei n Tabati n te uoote ao a kakaea aia bowi ni kauntira taan reirei are katoa kuata (taraa 17.4).

Kiraati n te Reirei n Tabati a karaoaki ni moan ao kateniuan Tabatin te namwakaina. Maanin taian Kiraati 50 te miniti. Mwaitia kaain te kiraati e kakaokoro ni kaineti ma kainanon te uoote teuana ma teuana. Ni katauraoi n angareirei, taan reirei n te Reirei n Tabati a kabonganai koroboki aika tabu ao reirei ake a baireaki n Nakomai, Iriirai (taraa 13.3).

Te Anga Reirei n ana Kawai te Tia Kamaiu bon te onimakinaki ao te tibwanga ae tabu. Ngkana ko anga reirei iaon taekan te euangkerio, irira ana banna ni katooto Iesu Kristo, are bon te Mataniwi n Tia Reirei. Taan reirei n te Reirei n Tabati a irii tuua ake inanon Reirei n ana Kawai te Tia Kamaiu ao ni mwakoro 17 n te Aeniboki ni Kabuta (taraa 17.1).

Te rairaki nakon te Uea Iesu Kristo, kaain te Ekaretia n tatabemaniia nako a katabeaki bwa ana reiakina te euangkerio bon ibukiia. Bon tabeia taan reirei ao taan kairiiri ni kaungaia membwa bwa a na ukora oin aia kaotioti bwa a na kanga n reiakina ao n anga reirei taekan te euangkerio (taraa 17.2).