Mga Responsibilidad

Ang Sunday School magtabang nga matuman ang buhat sa Dios sa kaluwasan ug kahimayaan. Naghimo kini niini pinaagi sa pagtabang sa mga anak sa Dios nga makat-on ug mosunod sa ebanghelyo ni Jesukristo (tan-awa sa Kinatibuk-ang Tamdanan nga Basahon, 13.1).

Ang mga magtutudlo sa Sunday School makig-ila-ila sa mga sakop sa klase, lakip niadtong kinsa dili motambong og mga klase. Ang mga magtutudlo mosuporta sa mga miyembro sa ilang mga paningkamot sa pagkat-on ug pagtuman sa ebanghelyo ni Jesukristo (tan-awa sa 13.2.3). Ang mga magtutudlo gigiyahan sa kapangulohan sa Sunday School sa ward ug motambong sa matag tulo ka bulan nga mga miting sa konseho sa magtutudlo (tan-awa sa 17.4).

Ang mga klase sa Sunday School ipahigayon sa una ug ikatulong mga Dominggo sa bulan. Kini molungtad og 50 ka minuto. Ang gidak-on sa klase managlahi base sa mga panginahanglan sa matag ward. Sa pag-andam sa pagtudlo, ang mga magtutudlo sa Sunday School mogamit sa mga kasulatan ug sa gieskedyul nga mga leksiyon diha sa Dali, Sunod Kanako (tan-awa sa 13.3).

Ang pagtudlo sumala sa pamaagi sa Manluluwas usa ka sagrado nga pagsalig ug responsibilidad. Kon magtudlo sa ebanghelyo, sunda ang ehemplo sa Manluluwas, kinsa mao ang Bantogang Magtutudlo. Ang mga magtutudlo sa Sunday School mosunod sa mga baroganan diha sa Pagtudlo sumala sa Pamaagi sa Manluluwas ug sa kapitulo 17 sa Kinatibuk-ang Tamdanan nga Basahon (tan-awa sa 17.1).

Aron makabig ngadto ni Ginoong Jesukristo, ang matag miyembro sa Simbahan maoy responsable sa pagkat-on sa ebanghelyo alang sa iyang kaugalingon. Ang mga magtutudlo ug mga lider maoy responsable sa pag-awhag sa mga miyembro nga magtinguha sa ilang kaugalingong inspirasyon kon unsaon sa pagtuon ug pagtudlo sa ebanghelyo (tan-awa sa 17.2).