Taabe

E ibuobuoki te Reirei n Tabati ni kakoroan nanon ana mwakuri te Atua ibukin te kamaiuaki ao te karietataaki. E reke aio man buokaia natin te Atua n reirei ao ni maiuakina ana euangkerio Iesu Kristo (taraa Aeniboki ni Kabuta:Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 13.1).

Bon taben te beretitenti kaainakin kauntiran te uoote, tararuan reiakin te euangkerio ao te angareirei n te mwenga ao te taromauri, ao bairean taian kiraati. Taben naba te beretitenti boutokakiia, kaungakiia, ao reireiaia taan reirei bwa a na karekea te tamaroa riki man iriran tuua ake inanon koroboki aika tabu ao Angareirei n Ana kawai te Tia Kamaiu (see 13.2.2.2). Ana kauntira a na ibuobuoki nakoina.

E kakaraoki te Reirei n Tabati ni moan ao kateniuan Tabatin te namwakaina. E na kakaokoro mwaitia kaain te kiraati inanon te uoote teuana ma teuana ni kaitara kainnanon te uoote (taraa 13.3). Taan reirei n te Reirei n Tabati, a kabonganai koroboki aika tabu, reirei ake a baireaki n Nakomai, Iriirai, ao aia taeka burabeti ni boong aika ngkai bon oin bwaai ni ibuobuoki ibukin aia angareirei.

A katabeaki kaaro bwa a na reirei te euangkerio nakoia natiia.(taraa 13.5). Taan reirei ma taan kairiiri n te Reirei n Tabati, a kaungaiia membwa bwa a na ukora te kairi mai ieta i bon irouia bwa a na kanga ni kamatebwaia ao reiakina te euangkerio inanon mweengaia (taraa 17.2).

N aia boowi kauntira tia reirei, a marooro taan reirei iaon tuua n aron ana angareirei Kristo. A marooro naba iaon aron katamaroan reiakinan te euangkerio ao te angareirei. Angareirei n Ana kawai te Tia Kamaiu bon teuana buokan te angareirei ae kabonganaki (taraa 17.4). A kakaraoaki bowi aikai ni katoa te kuata n tain te kiraati n te Tabati ao a kairaki iroun te beretitenti n Reirei n Tabati (taraa 13.4).

Iaan ana kairiiri te bitiobi ao kauntiran te uoote, e baireaki te bowi n tia reirei ibukiia kaaro iroun te beretitenti n te Reirei n Tabati. Bowi aikai, a ira tein arona ao babairean tain te bowi n tia reirei are kakaraoaki, ma okorona bwa e kaainaki irouia kaaro. Te kantaninga bon buokaia kaaro bwa a na katamaroa aia angareirei ni mweengaia. Angareirei n Ana Kawai te Tia Kamaiu ao kanoa n kabwarabwarana inanon Nakomai, Iriirai a riai ni kabonganaki bwa bwaai ni ibuobuoki (taraa 17.4).

A riai ake a ikawai ake a mwakuri ma kairake n tia ni karekea aia kataneiai iaon reirei ibukin kamanoaia ataei ao kairake teuana te namwakaina man te tai are a kamatoaaki iai (ProtectingChildren.ChurchofJesusChrist.org). A kona n nooraki kainibaire riki tabeua ibukin te Reirei n Tabati inanon mwakoro 13.7 man te Aeniboki ni Kabuta.