Ngaahi Fatongiá

ʻOku tokoni e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ki he kau finemuí ke nau hoko ko ha kau ākonga ʻa Sīsū Kalaisi ʻi he kotoa ʻo ʻenau moʻuí ʻi heʻenau fakahoko mo tauhi ʻa e ngaahi fuakava toputapú mo fakaloloto ʻenau uluí. ʻI heʻenau ngaahi kalasí mo e ngaahi fakatahaʻangá, ʻoku nau tokoniʻi ʻa e niʻihi kehé ke fakahoko honau ngaahi fatongia ʻi he fuakavá, langaki ʻa e uouangatahá, pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá, 11.1.1.)

ʻOku teuteuʻi ʻe he palesiteni ʻo e Kau Finemui ʻi he siteikí ʻa e “kau tau kei talavou” ʻa e ʻEikí ke tānaki fakataha ʻa ʻIsileli ʻo fakafou ʻi he kau atu ki he ngaahi ngāue ki hono langaki ʻo e tuí mo fakamālohia ʻa e niʻihi fakafoʻituituí (vakai, Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune, 2018], Gospel Library). ʻOkú ne kau ʻi he fakataha alēlea fakasiteikí mo e kōmiti fakatakimuʻa ʻa e toʻu tupú ʻi he siteikí (vakai, 6.7.1.2).

ʻE fakahinohinoʻi ʻe ha palesiteni ʻo e Kau Finemui ʻi he siteikí ʻa e kau palesitenisī fakauooti ʻo e houalotú lolotonga e ngaahi fakataha fakatakimuʻa fakataʻu ʻa e siteikí (vakai, 29.3.4), ʻalu ki he ngaahi fakataha fakapalesitení mo e ngaahi fakataha alēlea fakafekauʻakí ʻi hano fakaafeʻi ʻe he Fitungofulu Fakaʻēliá (vakai, 29.4), pea lea ʻi he houalotu sākalamēnití mo e ngaahi fakataha kehé ʻi hano fakaafeʻi ʻe he kau palesitenisī fakasiteikí.

Fakatatau mo e fakahinohino ʻa e kau palesitenisī fakasiteikí, ʻe toe palani mo fakafekauʻaki foki ʻe he kau palesitenisī ʻo e Kau Finemui ʻi he siteikí ʻa e ngaahi ʻekitivitī mo e nofo kemi ʻa e Kau Finemuí ʻi he siteikí (vakai, 6.7.1.2). Ki he ngaahi ʻekitivitī fakavahaʻasiteikí, ʻe fealēlea‘aki fakataha ʻa e kau palesitenisií ke fokotuʻu ha ngaahi ʻekitivitī ʻoku fakatahaʻi ai kinautolu, ki he kau palesitenisī fakasiteikí (vakai, 20.3.1).

ʻOku maʻu ha ngaahi fakahinohino mo ha ngaahi tuʻutuʻuni lahi ange ʻi he konga 11.6 ʻo e Tohi Tuʻutuʻuni Fakakātoá.