Li k’a’ru teneb’anb’il

Li ch’uut reheb’ li Saaj Ixq naxtenq’aheb’ lix raarookil rab’in li Dios chixkawresinkil rib’ chi sutq’iik rik’in a’an. Naxtenq’aheb’ li saaj ixq chixtaaqenkil li Jesukristo chiru chixjunil lix yu’ameb’ naq neke’xk’uleb’ ut neke’xpaab’eb’ li loq’laj sumwank ut neke’jala xch’ool. Sa’eb’ lix tzoleb’aal ut naq neke’xch’utub’ rib’, eb’ li saaj ixq neke’k’anjelak chiruheb’ li ras riitz’in, neke’xb’aanu li teneb’anb’il xb’aaneb’ lix sumwank, neke’xnimob’resi li junajil, ut neke’xtzol ut neke’xyu’ami li tzol’leb’. (Chi’ilmanq Jolomil K’anjenel Hu, 11.1.1.)

Li awa’b’ej reheb’ li Saaj Ixq sa’ li oqech naxkawresiheb’ li “teep chi saaj” re li Qaawa’ re naq te’xch’utub’ Israel rik’in xwaklesinkil li paab’aal ut xkawob’resinkileb’ li ras riitz’in (chi’ilmanq Russell M. Nelson ut Wendy W. Nelson, “Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], Biblioteca del Evangelio). A’an nak’anjelak sa’ li ch’uut re oqech ut li b’eresinel ch’uut reheb’ li saaj re oqech (chi’ilmanq 6.7.1.2).

Li awa’b’ej reheb’ li Saaj Ixq sa’ li oqech naxk’e xna’leb’eb’ li awa’b’ejil re teep sa’ li ch’utam choq’ reheb’ laj jolominel sa’ li oqech (chi’ilmanq 29.3.4), nawulak sa’eb’ li ch’utam re awa’b’ejil ut eb’ li jolomil ch’utam naq b’oqb’il xb’aan li Setenta re Area (chi’ilmanq 29.4), ut na’aatinak sa’ li ch’utam re li loq’laj wa’ak ut xkomoneb’ chik li ch’utam naq b’oqb’il xb’aan li awa’b’ejil re oqech.

Chi b’eresinb’il xb’aan li awa’b’ejil re oqech, li awa’b’ejil reheb’ li Saaj Ixq sa’ li oqech neke’xk’uub’eb’ ut neke’xb’aanuheb’ li kok’ k’anjel ut li campamento choq’ reheb’ li Saaj Ixq sa’ li oqech (chi’ilmanq 6.7.1.2). Naq wiib’ oxib’eb’ li oqech, eb’ li awa’b’ejil neke’xk’uub’ xna’leb’ sa’ komonil re xyeeb’al re li awa’b’ejil re oqech k’a’ru taab’aanumanq sa’eb’ li kok’ k’anjel (chi’ilmanq 20.3.1).

Naru natawman xkomon chik li chaq’rab’ink sa’ li tasal 11.6 re li Jolomil K’anjenel Hu.