Ngaahi Fatongiá

ʻOku tokoni e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOku tokoni ia ki he kau finemuí ke nau hoko ko ha kau ākonga ʻa Sīsū Kalaisi ʻi he kotoa ʻo ʻenau moʻuí ʻi heʻenau fakahoko mo tauhi ʻa e ngaahi fuakava toputapú mo fakaloloto ʻenau uluí. ʻI heʻenau ngaahi kalasí mo e ngaahi fakatahaʻangá, ʻoku nau tokoniʻi ʻa e niʻihi kehé ke fakahoko honau ngaahi fatongia ʻi he fuakavá, langaki ʻa e uouangatahá, pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá, 11.1.1.)

ʻOku teuteuʻi ʻe he tokoni ʻi he Kau Finemui he Siteikí ʻa e “konga kau kei talavou” ke tānaki fakataha ʻa ʻIsileli fakafou ʻi he kau he ngaahi ngāue ke langaki e tuí mo fakamālohia e fakafoʻituituí (vakai, Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmani lahi ʻa e toʻu tupú, 3 Sune 2018], Gospel Library). ʻOkú ne tokoni ke fakataukeiʻi e kau palesitenisī fakauooti foʻoú, tokoni maʻu pē, mo kau ʻi he kōmiti fakatakimuʻa ʻa e toʻu tupu he siteikí (vakai, 29.3.9).

ʻE fakahinohinoʻi ʻe he ongo tokoni ʻi he Kau Finemui he Siteikí ʻa e kau palesitenisī fakahoualotu he uōtí lolotonga e ngaahi fakataha fakatakimuʻa fakataʻu ʻa e sitekí (vakai, 29.3.4), kau ki he ngaahi fakataha fakapalesitenisií mo e ngaahi fakataha alēlea fakafekauʻakí ʻi hono fakaafeʻi ʻe he Fitungofulu Fakaʻēliá (vakai, 29.4), pea lea ʻi he ngaahi houalotu sākalamēnití mo ha ngaahi tūkunga kehe ʻi hono fakaafeʻi ʻe he kau palesitenisī fakasiteikí.

Fakatatau mo e fakahinohino ʻa e kau palesitenisī fakasiteikí, ʻe palani mo fakafekauʻaki foki ʻe he kau palesitenisī ʻa e Kau Finemui he siteikí ʻa e ngaahi ʻekitivitī mo e kemi ʻa e Kau Finemui he siteikí (vakai, 6.7.1.2). ʻE fealēlea‘aki fakataha ʻa e kau palesitenisií ke fokotuʻu ki he kau palesitenisī fakasiteikí ha ngaahi ʻekitivitī ʻoku fakatahaʻi ai ha ngaahi siteiki kehekehe (vakai, 20.3.1).

ʻOku maʻu ha ngaahi fakahinohino mo ha ngaahi tuʻutuʻuni lahi ange ʻi he konga 11.6 ʻo e Tohi Tuʻutuʻuni Fakakātoá.