Tiutetauave

E fesoasoani Seminare ma Inisitituti o Mataupu Faalelotu (S&I) i matua ma taitai o le Ekalesia i le fesoasoani atu i le autalavou ma talavou matutua ia faalolotoina lo latou liua ia Iesu Keriso ma Lana talalelei toefuataiina, agavaa mo faamanuiaga o le malumalu, ma saunia i latou lava, o latou aiga, ma isi mo le ola e faavavau faatasi ma lo latou Tama oi le Lagi (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 15, Potutusi o le Talalelei; “OLe Faamoemoega o Seminare ma Inisitituti o Mataupu Faalelotu,” Potutusi o le Talalelei).

Ua saunia e seminare ma inisitituti ni auala eseese mo tamaiti aoga e faapotopoto ai, e aofia ai polokalama o suesuega i le tagata lava ia, i luga o le initoneti, le mamao, ma le aiga. O le faapotopotoina i nei auala e mafai ona fesoasoani e faaloloto ai le liua ia Iesu Keriso. Mafaufau i valaaulia patino nei mai ia Peresitene Russell M. Nelson ma faamanuiaga e tatau ona faataunuuina pe a auai tamaiti aoga i le seminare ma le inisitituti: “Valaaulia Patino e Auai i le Seminare” ma “Valaaulia Patino e Auai i le Inisitituti.”

Tatou te faatotonugalemuina aafiaga taitasi e aoao ai e uiga ia Iesu Keriso ma Lana faataitaiga, uiga auaumama, ma le mana togiola. Latou te vaavaai mo auala e fesoasoani ai i tamaiti aoga e aoao le talalelei toefuataiina a Iesu Keriso e pei ona maua i tusitusiga paia ma upu a perofeta, aoao mo i latou lava, ma faatagaina le Agaga Paia e taiala. Pe a aoaoina ma maua le afioga a le Atua e le Agaga, e i ai le mana e suia ai loto ma musuia ai le liua loloto atu i lo tatou Faaola o Iesu Keriso (tagai i le Tusitaulima Aoao, 17.1).

O se valaau e faiaoga i le seminare po o le inisitituti e mafai ona faafiafiaina. E mafai foi ona mafua ai lagona o le le mautonu, le agavaa, po o sina popole laitiiti. E silafia e le Faaola ou lagona ma o le a fesoasoani ia te oe ia faamanuiaina. O ou aafiaga i le olaga faatasi ai ma aoaoga faifai pea ma le lagolago mai se sui o le S&I o le a fatuina ai se lotogatasi matagofie e faafetaiaia ai ou manaoga patino o se faiaoga ma fesoasoani ai i au tamaiti aoga e faalolotoina lo latou liua ia Iesu Keriso. O le sui o le S&I ua tofia i la outou eria o le a aapa atu ia te outou e tuuina atu se taitaiga faaopoopo, lagolago, ma punaoa. O loo maua foi punaoa i le sootaga lenei e fesoasoani ai ia te oe pe a manaomia: Punaoa mo Faiaoga.

Ia faaauau pea ona taumafai e ola i le talalelei a Iesu Keriso ma saili le mafutaga a le Agaga Paia i lou lava olaga. O le Agaga o se meaalofa e mafai ona fesoasoani ia i tatou e atiina ae ma faaleleia atili ai a tatou faatinoga, malamalama, uiga faaalia, uiga, ma le tele o isi mea. Faaauau pea ona taumafai ia avea ma se tagata aoao o le talalelei. O le avea ma soo o le a faamalosia ai lou faatuatua ma faalolotoina ai lou liua ia Iesu Keriso.