Mga Responsibilidad

Ang Seminaries and Institutes of Religion (S&I) mitabang sa mga ginikanan ug mga lider sa Simbahan sa pagtabang sa kabatan-onan ug mga young adult nga mapalawman ang ilang pagkakabig ngadto ni Jesukristo ug sa Iyang gipahiuli nga ebanghelyo, mahimong sarang alang sa mga panalangin sa templo, ug makaandam sa ilang mga kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 15, Librarya sa Ebanghelyo; “Ang Tumong sa Seminaries and Instituts of Religion,” Librarya sa Ebanghelyo).

Ang Seminaries and institutes nagsangkap sa nagkadaiyang paagi aron mapundok ang mga estudyante, lakip sa aktwal, online, sa lagyong dapit, ug mga programang tun-an diha sa panimalay. Ang pagpundok sa ingon niining paagi makatabang sa pagpalawom sa pagkakabig ngadto ni Jesukristo. Ikonsiderar kining personal nga mga imbitasyon gikan ni Presidente Russell M. Nelson ug ang mga panalangin nga matuman kon ang mga estudyante moapil sa seminary ug institute: “Personal nga Imbitasyon sa Pagtambong sa Seminary” ug “Personal nga Imbitasyon sa Pagtambong sa Institute.”

Isentro sa mga magtutudlo ang matag kasinatian sa pagkat-on diha ni Jesukristo ug sa Iyang ehemplo, mga hiyas, ug sa matubsanong gahom. Sila mangita og mga paagi sa pagtabang sa mga estudyante sa pagkat-on sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta, pagkat-on alang sa ilang mga kaugalingon, ug tugotan ang Espiritu Santo sa paggiya. Kon ang pulong sa Dios gitudlo ug gidawat pinaagi sa Espiritu, kini adunay gahom sa pag-usab og mga kasingkasing ug pagdasig sa pagkakabig ngadto sa atong Manluluwas nga si Jesukristo (tan-awa sa Kinatibuk-ang Tamdanan nga Basahon, 17.1).

Usa ka tawag sa pagtudlo sa seminary o institute mahimong makapaikag. Kini mahimo usab nga hinungdan sa mga pagbati sa kawalay kaseguroan, kakulang, o bisan sa usa ka gamay nga kabalaka. Ang Manluluwas nahibalo sa inyong mga pagbati ug motabang kaninyo nga magmalamposon. Ang imong mga kasinatian sa kinabuhi inubanan sa nagpadayon nga pagbansay ug suporta gikan sa usa ka representante sa S&I makamugna og maanindot nga panag-uyon aron matubag ang imong personal nga mga panginahanglan isip usa ka magtutudlo ug matabangan ang imong mga estudyante nga mapalawom ang ilang pagkakabig ngadto ni Jesukristo. Ang representante sa S&I nga gidestino sa inyong lugar mokontak kaninyo aron mohatag og dugang direksiyon, suporta, ug mga kapanguhaan. Anaa usab ang mga kapanguhaan sa mosunod nga link aron matabangan ka kon gikinahanglan: Mga Kapanguhaan sa Magtutudlo.

Padayon sa pagpaningkamot sa pagsunod sa ebanghelyo ni Jesukristo ug magtinguha sa pagpakig-uban sa Espiritu Santo diha sa imong personal nga kinabuhi. Ang Espiritu mao ang usa ka gasa nga makatabang kanato sa pagpalambo ug pag-ugmad sa atong pagpaningkamot, kahibalo, hiyas, kinaiya, ug daghan pa. Padayon sa pagpaningkamot nga mahimong tigkat-on sa ebanghelyo. Ang pagkadisipulo mopalig-on sa inyong pagtuo ug mopalawom sa inyong pagkakabig ngadto ni Jesukristo.