Mwiokoam

Te Moanrinan e buokiia ataei n namakina ana tangira Tamaia are i Karawa; n reiakina taekan Ana babaire ni kakukurei; ni maiuakin ana euangkerio Iesu Kristo; ao n namakina, ni kinaa, ao ni karaoi ana rinerine ni kaineti ma ana kairoro te Tamnei ae Raoiroi. Te Moanrinan bon te tai naba ni katauraoi ibukin, karaoan, ao kawakinan berita aika tabu n aroia ataei n ira waakin ana mwakuri te Atua ibukin te kamaiu ao te karietataaki. (Taraa Aeniboki ni Kabuta: Te Beku n Ana Ekaretia Iesu Kristo ibukiia Aika Itiaki ni Boong aika Kaitira, 12.1.)

Te beretitenti n te Moanrinan n te titeiki e beku iaan ana kairiiri te beretitentii n te titeiki. E beku bwa te membwa n ana kauntira te titeiki. Te beretitenti e kaira te beretitentii n te Moanrinan n te titeiki. Ngkai kaain te beretitentii, taian mwioko a raonaki ma katauraoaia beretitentii n te Moanrinan n te uoote aika a tibwa weteaki, n anga te boutoka ao te kaetieti ni katoa tai, ao ni kakaaei kiraati n te uoote inanon te titeiki. Ngkana a kaoaki, a kona ni kaei bootakin te kauntira ni babaire ao n taetae n taian bootaki n toa ao bootaki riki tabeua (tara 6.7.1).

Te beretitentii n te Moanrinan n te titeiki a na uaia ni bootaki n reirei n taainako. Te beretitenti e na irii aia boowi taan kairiiri n te titeiki ni katoa ririki (taraa 29.3.4), ni beku n te kauntira n te titeiki, ao ni kaei bootakin te kauntira ni babaire ngkana e kaoaki iroun te Itingaun n te Aono (taraa 29.4).

Te beretitentii n te Moanrinan n te titeiki e kona ni bairei waaki ni kakukurei n te titeiki ibukiia ataei aika 8 nakon 11 aia ririki. A kona waaki ni kakukurei aikai ibukiiia ataeinnaine, ataeinimwaane, ke ni kauoua (taraa 6.7.1.3).

Ni kabane ikawai ake a mwakuri ma ataei ao kairake a riai ni kabwanina karaoan te kataneiai iaon Kamanoaia Ataei ao Kairake inanon teuana te namwakaina man te tai are a kamatoaaki iai (ProtectingChildren.ChurchofJesusChrist.org). Kainibaire ao kaetieti ni kaineti ma ataei aika iai kainnanoia aika a onoti, bwaai aika a kainnanoaki ibukin te kamanoaki, aia burokuraem Ataei ao Kairake, ao tabeua riki a kona n reke inanon mwakoro 12.5 n te Aeniboki ni Kabuta.