Ngaahi Fatongiá

Ko e Fineʻofá ko ha faʻunga fakalangi kuo fokotuʻu maʻá e kakai fefine lalahi kotoa ʻi he Siasí. ʻOku tokoni ʻa e Fineʻofá ke teuteuʻi ʻa e fānau ʻa e ʻOtuá ke nau foki ki Hono ʻaó. Naʻe akoʻi ʻe he Palōfita ko Siosefa Sāmitá ko e taumuʻa ʻo e Fineʻofá ke “fakahaofi ʻa e ngaahi laumālié mo fakafiemālieʻi ʻa e faingataʻaʻiá”—ʻaki hono ʻomi ʻa e tokoni ʻa e Fakamoʻuí (vakai, Tohi Tuʻutuʻuni Fakakātoá, 9.1).

ʻOku uiuiʻi ʻa e kau faiakó ke tokoni ki he kakaí ʻi hono fakamālohia ʻenau tui ki he Tamai Hēvaní mo Sīsū Kalaisí. ʻOku poupouʻi ʻe he kau faiako ʻo e Fineʻofá ʻa e kau palesitenisií. ʻE filifili ʻi he faʻa lotu ʻe he kau palesitenisī ʻo e Fineʻofá ha ngaahi pōpoaki ke aleaʻi ʻo fakatatau mo e ngaahi fiemaʻu ʻa e houʻeiki fafiné (vakai, 9.2.1.2).

ʻOku fakataha ʻa e Kau Fineʻofá ʻi he Sāpate uá mo e faá mo ha taumuʻa ke fakatupulaki ʻa e tui kia Sīsū Kalaisí, langaki ʻa e uouangatahá, mo fakamālohia e fāmilí mo e ʻapí. ʻOku kamata e ngaahi fakatahá ʻaki ha lotu pea fakakau ai ha taimi ki he fealēleaʻaki fakatahá mo hono akoʻi mo aleaʻi ʻo e ongoongoleleí ʻo fakatefito ʻi he ngaahi lea ʻo e konifelenisi fakamuimuitahá (vakai, 9.2.1.2).

Ko e faiako ko ia ʻi he founga ʻa e Fakamoʻuí ko ha falala mo ha fatongia toputapu ia. ʻI he taimi ʻoku akoʻi ai ʻa e ongoongoleleí, muimui ʻi he sīpinga ʻa Sīsū Kalaisí, ko e Faiako Tuʻukimuʻá. ʻE muimui ʻa e kau faiako ʻi he Fineʻofá ʻi he ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí mo e vahe 17 ʻo e Tohi Tuutuʻuni Fakakātoá (vakai, 17.1).

Ko e taimi ʻoku ako mo moʻui ʻaki ai ʻe he kāingalotú ʻa e ongoongoleleí ʻi ʻapí, ʻoku loloto ange leva ʻenau ului ki he Tamai Hēvaní mo Sīsū Kalaisí. ʻE poupouʻi ʻe he kau taki ʻo e Fineʻofá ʻa e houʻeiki fafiné ke nau ako fakafoʻituitui mo fakafāmili ʻa e folofolá mo e ngaahi lea ʻa e kau palōfita moʻuí (vakai, 17.2).