Te mau hōpoi’a

Te Sōtaiete Tauturu, ’o te hō’ē ïa fa’anahora’a tei ha’amauhia e te Atua nō te mau vahine pa’ari ato’a i roto i te ’Ēkālesia. E tauturu te Sōtaiete Tauturu i te mau tamari’i a te Atua ’ia fa’aineine nō te ho’i i mua i tōna aro. ’Ua ha’api’i te peropheta Iosepha Semita ē, te fā o te Sōtaiete Tauturu « ’o te fa’aorara’a ïa i te mau vairua ’e te tāmarūra’a i te māuiui »—ma te pūpū i te tāmarūra’a a te Fa’aora (hi’o Buka arata’i rahi, 9.1).

E pi’ihia te mau ’orometua ha’api’i nō te tauturu i te ta’ata ’ia ha’apūai i tō rātou fa’aro’o i te Metua i te ao ra ’e ia Iesu Mesia. E turu te mau ’orometua ha’api’i o te Sōtaiete Tauturu i te peresidenira’a. Nā te peresidenira’a o te Sōtaiete Tauturu e mā’iti nā roto i te pure i te mau a’ora’a e ha’api’i, ’ia au i te mau hina’aro o te mau tuahine (hi’o 9.2.1.2).

E putuputu te mau Sōtaiete Tauturu i te piti ’e te maha o te sābati ma te hō’ē fā nō te fa’arahi i te fa’aro’o ia Iesu Mesia, nō te patu i te hō’ēra’a, ’e nō te ha’apūai i te mau ’utuāfare ’e te mau nohora’a. E ha’amata te mau rurura’a nā roto i te pure ’e tē vai ra te taime nō te āparau-’āmui-ra’a ’e te ha’api’ira’a ’evanelia ’e te ’āparaura’a nō ni’a i te mau a’ora’a o te ’āmuira’a i ma’iri a’enei (hi’o 9.2.1.2).

Te ha’api’ira’a mai tā te Fa’aora te huru, e ti’aturira’a ’e e hōpoi’a mo’a ïa te reira. ’Ia ha’api’i ana’e i te ’evanelia, e pe’e i te hi’ora’a o te Fa’aora, ’o ’oia ho’i te ’Orometua Ha’api’i Rahi. E pe’e te mau ’orometua ha’api’i nō te Sōtaiete Tauturu i te mau parau tumu i roto i te Ha’api’ira’a mai tā te Fa’aora ’e te pene 17 o te Buka arata’i rahi (hi’o 17.1).

’Ia ha’api’i ana’e ’e ’ia ora ana’e te mau melo i te ’evanelia i te fare, e hōhonu atu ā tō rātou fa’afāriura’a i te Metua i te ao ra ’e ia Iesu Mesia. E fa’aitoito te feiā fa’atere o te Sōtaiete Tauturu i te mau tuahine ’ia tai’o, te ta’ata hō’ē ’e ’e tō rātou ’utuāfare ato’a, i te mau pāpa’ira’a mo’a ’e i te mau parau a te mau peropheta. (hi’o 17.2).