Dagiti Pagrebbengan

Ti Relief Society ket maysa a nadiosan a naipasdek nga organisasion para kadagiti amin a nataengan a babbai iti Simbaan. Tumulong ti Relief Society kadagiti annak ti Dios nga agsagana nga agsubli iti imatangna. Insuro ni Propeta Joseph Smith a ti panggep ti Relief Society ket tapno “mangisalakan kadagiti kararua ken mangpabang-ar iti panagsagaba”—babaen ti panangipaay iti tulong ti Mangisalakan (kitaen iti Sapasap a Handbook, 9.1).

Naawagan dagiti mannursuro a tumulong kadagiti tao a mangpapigsa iti pammatida iti Nailangitan nga Ama ken ni Jesucristo. Suportaran dagiti mannursuro ti Relief Society ti panguluen. Sikakararag a pilien ti panguluen ti Relief Society dagiti mensahe a maisuro a naibatay kadagiti kasapulan dagiti kakabsat a babbai (kitaen iti 9.2.1.2).

Agmimiting dagiti Relief Society iti maikadua ken maikapat a Domingo nga addaan panggep a mangpapigsa iti pammati ken ni Jesucristo, mangbangon iti panagkaykaysa, ken mangpapigsa kadagiti pamilia ken pagtaengan. Mangrugi dagiti miting iti kararag ken mangiraman iti oras para iti panagiinnuman ken panangisuro ken panaglilinnawag iti ebanghelio a maibatay kadagiti kallabes a mensahe iti komperensia (kitaen iti 9.2.1.2).

Ti panangisuro iti wagas ti Mangisalakan ket maysa a sagrado a panagtalek ken pagrebbengan. No mangisursuro iti ebanghelio, suroten ti pagwadan ti Mangisalakan, nga isu ti Apo a Mannursuro. Suroten dagiti mannursuro ti Relief Society dagiti pagbatayan iti Panangisuro iti Wagas ti Mangisalakan ken kapitulo 17 ti Sapasap a Handbook (kitaen iti 17.1).

No sursuruen ken agbiag dagiti miembro iti ebanghelio iti pagtaengan, umuneg ti kumbersionda iti Nailangitan nga Ama ken ni Jesucristo. Allukoyen dagiti lider ti Relief Society dagiti kakabsat a babbai a mangadal kadagiti nasantuan a kasuratan ken balikas dagiti sibibiag a propeta, kas indibidual ken kaduada dagiti pamiliada (kitaen iti 17.2).