Ol Responsabiliti

Rilif Sosaeti i wan tabu oganaesesen we oli stanemap blong evri adalt woman insaed long Jos. Rilif Sosaeti i helpem ol pikinini blong God blong rere blong gobak stap wetem Hem long ples blong Hem. Profet Josef Smit i bin tijim se stamba tingting blong Rilif Sosaeti hem i blong “sevem ol sol mo help long taem blong safaring”— stap givim rilif blong Sevya (luk long Jeneral Hanbuk, 9.1).

Oli bin singaotem ol tija blong helpem ol pipol blong mekem fet blong olgeta long Papa long Heven mo long Jisas Kraes i kam strong moa. Ol tija blong Rilif Sosaeti oli sapotem olgeta long presidensi. Presidensi blong Rilif Sosaeti i prea mo jusum ol mesej blong tijim folem ol nid blong ol sista (luk long 9.2.1.2).

Ol Rilif Sosaeti oli mit long nambatu mo nambafo Sandei wetem stamba tingting ia blong mekem fet long Jisas Kraes i kam moa strong, bildimap yuniti, mo mekem ol famli mo hom i kam moa strong. Ol miting i stat wetem wan prea mo i gat tu, taem blong kaonsel tugeta mo gospel instraksen mo storian raon long ol toktok blong jeneral konfrens we i jes pas (luk long 9.2.1.2).

Blong stap tij folem wei blong Sevya, i wan tabu tras mo responsabiliti we yumi gat. Taem oli stap tijim gospel, folem eksampol blong Jisas Kraes we hem i Masta Tija. Ol Rilif Sosaeti Tija oli folem ol prinsipol insaed long Stap Tij Folem Wei blong Sevya mo japta 17 blong Jeneral Hanbuk (luk 17.1).

Taem ol memba oli stap lanem mo laef folem gospel long hom, jenis blong olgeta long Papa long Heven mo Jisas Kraes bae i kam dip moa. Ol lida blong Rilif Sosaeti oli leftemap tingting blong ol sista blong oli stadi olgetawan mo wetem famli blong olgeta long ol skripja mo ol toktok blong ol profet we oli stap laef (luk long 17.2).