Ngaahi Fatongiá

ʻOku tokoni ʻa e Palaimelí ke ongoʻi ʻe he fānaú ʻa e ʻofa ʻa ʻenau Tamai Hēvaní; ako fekauʻaki mo ʻEne palani ʻo e fiefiá; moʻui ʻaki ʻa e ongoongolelei ʻo Sīsū Kalaisí; pea ongoʻi, ʻiloʻi, mo ngāue ʻo fakatatau mo e ivi tākiekina ʻo e Laumālie Māʻoniʻoní. Ko e Palaimelí ko ha taimi foki ia ke mateuteu, fakahoko, mo tauhi ai ʻa e ngaahi fuakava toputapú ʻi he kau ʻa e fānaú ʻi he ngāue ʻa e ʻOtuá ki he fakamoʻuí mo e hakeakiʻí. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 12.1.)

Ko ha faingamālie toputapu hono akoʻi ʻa e fānau ʻa e ʻOtuá. ʻOku ui ʻa e kau faiako Palaimelí ke nau akoʻi mo ngāue fakaetauhi ki he toʻu pau ʻo e fānaú (vakai, 12.3.5). ʻOku nau ako ʻa e ongoongoleleí pea vahevahe mo e fānaú ʻa e meʻa ʻoku nau akó. ʻOku poupouʻi ʻe he kau faiakó ʻa e fānaú mo honau ngaahi fāmilí ke nau ako ʻa e ongoongoleleí ʻi ʻapi. ʻOku nau fakaafeʻi ʻa e fānaú ke nau vahevahe ʻi he lotú ʻa e meʻa ʻoku nau ako ʻi ʻapí (vakai, 12.2.1.2).

ʻOku faiako ʻa e kau faiako Palaimelí mei he Haʻu, ʻo Muimui ʻIate Aú. ʻOku nau muimui ʻi he ngaahi tefitoʻi moʻoni ʻi he Ko e Faiako ʻi he Founga ʻa e Fakamoʻuí mo e vahe 17 ʻo e Tohi Tuʻutuʻuni Fakakātoá. ʻI he taimi ʻoku akoʻi ai ʻe he kakai lalahí ʻa e fānaú ʻi he ngaahi meʻa faka-Siasí, ʻoku totonu ke ʻi ai ha kakai lalahi fakapotopoto ʻe toko ua pe tokolahi ange (vakai, 12.3.5).

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto ʻi he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e fānau ʻoku ʻi ai ʻenau ngaahi fiemaʻu makehé, ngaahi fiemaʻu ki he malú, polokalama ʻa e Fānaú mo e Toʻu Tupú, mo e ngaahi meʻa kehé ʻi he vahe 12.5 ʻo e Tohi Tuʻutuʻuni Fakakātoá.