Eddo ko

Doulul ko an Priesthood eo an Aron rej jipan̄ likao ro kōm̧m̧an im kōjparok bujen ko rekwojarjar im kam̧wūlaļļo̧k oktak tok eo aer n̄an Jisōs Kraist im gospel eo An. Jibadbad eo an juon doulul ej n̄an jipan̄ rikabwijer priesthood ro jerbal ippān doon n̄an kōttōprak jerbal in lo̧mo̧o̧r eo an Anij im mour ijo eutiej tata. (Lale Bok in Bōk Meļeļe Eo Eļap: Jerbal ilo Kabun̄ eo an Jisōs Kraist im Armej ro Rekwojarjar Ilo Raan Ko Āliktata, 10.1, Gospel Library.)

Likao ro rej koba ippān doulul eo an pris ro ilo jinoin Jānwōde ilo iiō eo ej jejjōt 16 aer iiō. Eļan̄n̄e repoojak im rej erreo, remaron̄ barāinwōt ekkapit n̄an pris. Pris ro jon̄an wōt juon jerbal ko aer āinwōt tikōn im rūkaki ro. Pris ro remaron̄ bar kōm̧m̧ane kwojkwoj eo, jerbali peptaij ko (ekoba peptaij ilo tempeļ), im kapit pris ro jet, rūkaki ro, ak tikōn ro (lale Katak im Bujen Ko 20:46–52, 73–79; Bok in Bōk Meļeļe Eo Eļap, 10.1.3.3).

N̄e rijeje ro ilo doulul eo rej kūr, rej kōpooj laajrak in būrookūraam̧ ko n̄an kweilo̧k ko im je kakeememej ko. Rej barāinwōt jipan̄ ward kūļōk eo ak juon rikapilōk jān doulul eo ej rekoote etan ro rejeļā rej pād ilo kūlaaj eo. (Lale 10.4.2.)

Bisop eo im ritōl ro an doulul eo an jodikdik ro, kōn jipan̄ jān rikapilōk ro, rej karōk jerbal in jipan̄ im m̧akūtkūt ko. Rej aikuj jipan̄ kōttōprak jerbal in lo̧mo̧o̧r eo im mour ijo ilōn̄tata. Rej aikuj jon̄an wōt juon ilubwiljin eria ko emān ikkijeen eddōkļo̧k an juon make: ilo jetōb, iiaio, kanniōk, im jeļāļo̧kjeņ. (Lale 10.2.1.3.)

Kakkobaba in unin tōl ko im kakien ko, ekūtbuuj kōkajoor likao ro ewōr nan̄inmej in utam̧we ippāer, bōk nōbar ko n̄an Ajri ro im Jodikdik ro, im bōk menin joortak in jitlo̧k ko, rej pād ilo jekjōn 10.8 in Bok in Bōk Meļeļe Eļap.