Te mau hōpoi’a

E tauturu te Paraimere i te mau tamari’i ’ia putapū i te here o tō rātou Metua i te ao ra ; ’ia ha’api’i mai nō ni’a i tāna fa’anahora’a nō te ’oa’oa ; ’ia ora i te ’evanelia a Iesu Mesia ; ’e ’ia putapū, ’ia ’ite ’e ’ia rave mai te au i te fa’aurura’a a te Vārua Maita’i. ’Ua riro ato’a te Paraimere ’ei taime nō te fa’aineinera’a, nō te rave ’e nō te ha’apa’o i te mau fafaura’a mo’a, ’a ’āmui mai ai te mau tamari’i i roto i te ’ohipa nō te fa’aorara’a ’e te fa’ateiteira’a a te Atua. (Hi’o Buka Arata’i Rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 12.1.)

E ha’amaita’ira’a mo’a te ha’api’ira’a i te mau tamari’i a te Atua. E tauturu te piha ha’apa’ora’a tamari’i i te mau tamari’i mai te 18 ’āva’e e tae atu i te 3 matahiti ’ia putapū i te here o te Metua i te ao ra ’e ’ia ha’api’i mai nō ni’a i tāna fa’anahora’a nō te ’oa’oa. E here, e ha’api’i ’e e aupuru te feiā fa’atere nō te piha ha’apa’ora’a tamari’i i te mau tamari’i. E ara ato’a rātou i tō rātou pārurura’a ’e tō rātou ora maita’i (hi’o 12.1.5).

E ha’api’i te feiā fa’atere nō te piha ha’apa’ora’a tamari’i nā roto mai i te ’A hi’o na i tā ’outou mau tamari’i ri’i. E pe’e rātou i te mau parau tumu i roto Ha’api’ira’a mai tā te Fa’aora ’e te pene 17 ’o te Buka Arata’i Rahi. ’Ia ha’api’i ana’e te feiā pa’ari i te mau tamari’i i roto i te mau fa’anahora’a a te ’Ēkālesia, e tītauhia e piti a’e ta’ata pa’ari ha’apa’o i reira (hi’o 12.3.5).

E mea tītauhia i te feiā pa’ari ato’a e ’ohipa nei ’e te mau tamari’i ’e te feiā ’āpī, ’ia rave i te ha’api’ipi’ira’a nō ni’a i te Pārurura’a i te mau Tamari’i ’e i te Feiā ’Āpī, i roto i te ’āva’e o tō rātou pāturura’ahia (ProtectingChildren.ChurchofJesusChrist.org). E ’itehia te mau arata’ira’a ’e te mau fa’aturera’a nō te mau tamari’i e mau hina’aro ta’a ’ē tō rātou, te mau tītaura’a o te pārurura’a, te fa’anahora’a nō te mau tamari’i ’e te feiā ’āpī ’e tē vai atu ā, i roto i te tuha’a 12.5 ’o te Buka Arata’i rahi.