Tiutetauave

O korama o le Perisitua Arona e fesoasoani i alii talavou e osia ma tausia feagaiga paia ma faalolotoina ai lo tatou liua ia Iesu Keriso ma Lana talalelei. O le faamoemoega o se korama o le fesoasoani lea i ē umia le perisitua e galulue faatasi e faataunuu le galuega a le Atua mo le faaolataga ma le faaeaga. (Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai 10.1, Potutusi a le Ekalesia.)

E auai atu alii talavou i le korama a tiakono i le amataga o Ianuari o le tausaga e atoa i ai lo latou ta’i 12. O le taimi lea ua onomea ai foi i latou e faauuina o ni tiakono pe afai ua latou saunia ma ua agavaa. O isi tiute e aofia ai le tufaina o le faamanatuga ma le fesoasoani i le epikopo i le “faatautaiga o mea uma faaletino” (Mataupu Faavae ma Feagaiga 107:68). (Tagai i le 10.1.3.1.)

E lagolagoina e fesoasoani o le korama a tiakono le peresitene i ona tiutetauave, e aofia ai le taitaiina o taumafaiga a le korama i le auai i le galuega a le Atua o le faaolataga ma le faaeaga; faamasani ma auauna atu i tagata taitoatasi o le korama, e aofia ai i latou e le auai i fonotaga a le korama; faamalosia o tagata fou ma tagata ua toe foi mai; aoaoina o tagata o le korama i o latou tiute faaleperisitua; ma le fuafuaina ma le taitaiina o fonotaga a korama (tagai i le 10.4.2). E tatau ona fono e le aunoa le au peresitene o le korama (tagai i le 10.4.3).

O le au epikopo ma taitai talavou o korama, e lagolagoina e faufautua, e fuafuaina auaunaga ma gaoioiga. E ao ona fesoasoani nei mea e faataunuu ai le galuega o le faaolataga ma le faaeaga. O gaoioiga e tatau ona faapaleni i vaega e fa o le tuputupu a’e o le tagata lava ia: faaleagaga, faaleagafesootai, faaletino, ma faaleatamai. (Tagai i le 10.2.1.3.)

O taiala ma aiaiga faavae faaopoopo, e aofia ai le lagolagoina o alii talavou e i ai manaoga faapitoa, mauaina o faatusa o Tamaiti ma le Autalavou, ma le aoina mai o taulaga anapogi, o loo maua i le vaega 10.8 o le Tusitaulima Aoao.