Ngaahi Fatongiá

ʻOku tokoni ʻa e houalotu ʻa e Kau Finemuí ki he ngaahi ʻofefine ʻofeina ʻa e ʻOtuá ke nau teuteu ke foki ki Hono ʻaó. ʻOkú ne tokoniʻi ʻa e kau finemuí ke fakahoko mo tauhi ʻa e ngaahi fuakava toputapú mo fakaloloto ʻenau ului kia Sīsū Kalaisí mo ʻEne ongoongoleleí. ʻI he ngaahi kalasi ʻa e kau finemuí, ʻoku nau tokoniʻi ʻa e niʻihi kehé ke fakahoko honau ngaahi fatongia ʻi he fuakavá, langaki ʻa e uouangatahá, pea ako mo moʻui ʻaki ʻa e tokāteliné. (Vakai, Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 11.1.1.)

ʻOku ngāue fakaetauhi ʻa e palesitení mo e ongo tokoní ki he kau finemuí ʻi heʻenau hoko ko e kau ākonga ʻa Sīsū Kalaisi ʻi he kotoa ʻo ʻenau moʻuí. Te nau akoʻi ʻa e kau palesitenisī fakakalasí fekauʻaki mo honau ngaahi fatongiá mo fai ha poupou (vakai ki he 11.3.2). ʻOku tokoni foki ʻa e ongo tokoní ki he palesitení ʻi he ngaahi lekōtí, lipōtí, mo e meʻa fakapaʻangá.

ʻE poupouʻi ʻe he kau palesitenisī ʻo e Kau Finemuí ʻa e kau taki ʻo e toʻu tupú. ʻOku kau ʻa e kau palesiteni fakakalasí ʻi he fakataha alēlea fakauooti ʻa e toʻu tupú. ʻOku tataki mo ngāue fakaetauhi ʻa e kau palesitenisī fakakalasí ki he kau finemuí ʻi heʻenau ʻunu ke ofi ange ki he Fakamoʻuí mo kau ʻi he ngāue ʻa e ʻOtuá ki he fakamoʻuí mo e hakeakiʻí. ʻI he tokoni ʻa e kau taki kakai lalahí, te nau palani ha ngaahi ngāue tokoni, ngaahi ʻekitivitī, mo e ngaahi fakataha ʻi he Sāpaté (vakai, 11.3.4.2).

ʻE fakakaukauʻi ʻi he faʻa lotu ʻe he kau pīsopelikí mo e kau taki kakai lalahi ʻo e Kau Finemuí ha founga ke fokotuʻutuʻu ai ʻa e ngaahi kalasí ʻo fakatatau mo e taʻu motuʻá. Te nau fakakaukauʻi ha ngaahi faingamālie fakatakimuʻa maʻá e kau finemuí. Ko e kalasi takitaha, tatau ai pē pe ko e hā honau tokolahí, ʻoku totonu ke ʻi ai ha palesiteni, pea ʻi he feituʻu ʻe malava aí, ke ʻi ai ha tokoni ʻe toko taha pe toko ua mo ha sekelitali (vakai, 11.1.3).

ʻI hono poupouʻi ʻa e kau palesitenisī fakakalasí ʻe he kau taki kakai lalahí, ʻoku nau palani ha ngāue tokoni mo ha ngaahi ʻekitivitī te ne langaki ʻa e fakamoʻoní, fakamālohia ʻa e ngaahi fāmilí, tanumaki ʻa e uouangataha ʻa e kalasí, mo ʻoange ha ngaahi faingamālie ke tāpuekina ai ʻa e niʻihi kehé (vakai, 11.2.1.3). Ko e ngāue tokoní mo e ngaahi ʻekitivitií ko ha faingamālie ia ke tānaki ai ʻa e toʻu tupú pea vahevahe ʻa e fiefia ʻi hono moʻui ʻaki ʻo e ongoongoleleí mo kau ʻi he ngāue maʻongoʻonga ʻa e ʻEikí.

Kuo pau ke fakakakato ʻe he kakai lalahi kotoa pē ʻoku ngāue mo e fānaú mo e toʻu tupú ʻa e ako ki hono Maluʻi ʻo e Fānaú mo e Toʻu Tupú ʻi loto ʻi he māhina ʻe taha hono hikinimaʻi kinautolú (ProtectingChildren.ChurchofJesusChrist.org). ʻOku maʻu ʻa e ngaahi fakahinohino mo e ngaahi tuʻutuʻuni fekauʻaki mo e kau finemui ʻoku faingataʻaʻia fakaesinó, ngaahi fakaʻilonga ʻo e toʻu tupú, mo ha meʻa lahi ange ʻi he vahe 11.6 ʻo e Tohi Tuʻutuʻuni Fakakātoá.