Eddo ko

Doulul ko an Priesthood eo an Aron ej jipan̄ likao ro kōm̧m̧an im kōjparok bujen ko rekwojarjar im kam̧wūlaļļo̧k oktak tok eo aer n̄an Jisōs Kraist im gospel eo An. Jibadbad eo an juon doulul eo ej n̄an jipan̄ rikabwijer priesthood ro jerbal ippān doon n̄an kōttōprak jerbal in lo̧mo̧o̧r eo an Anij im mour ilo aiboojoj eo eutiejtata. (Lale Bok in Bōk Meļeļe Eļap: Jerbal ilo Kabun̄ eo an Jisōs Kraist im Armej ro Rekwojarjar Ilo Raan Ko Āliktata, 10.1, Gospel Library.)

Likao ro remaron̄ koba ippān doulul eo an rūkaki ro jino ilo Jānwōde in iiō eo me renaaj 14 aer iiō. Ilo iien in remaron̄ ekkapit āinwōt rūkaki ro eļan̄n̄e rej pojak im erreo. Rūkaki ro jon̄an wōt juon jerbal ko aer āinwōt tikōn ro. Rej barāinwōt kōpooj kwojkwoj eo im jerbal āinwōt rikarejar m̧aan ro. Eddo ko jet kar kōmeļeļeiki ilo Katak im Bujen Ko 20:53–59; 84:111. (Lale 10.1.3.2.)

Rikakpilōklōk ro an doulul eo an rūkaki ro rej rie būreejtōn eo kōn eddo ko an, ekoba tōl jerbal ko an doulul ilo bōk koņaan ilo jerbal in lo̧mo̧o̧r eo an Anij im mour āinwōt Anij; jeļā kajjien im jerbal n̄an kajjojo uwaan doulul eo, ekoba ro me rejjab pād ilo kweilo̧k ko an doulul eo; kōkajoorļo̧k membōr ro rekāāl im ro rej bar ro̧o̧ltok; katakin ro uwaan doulul eo jerbal ko aer ilo priesthood eo; im karōk im kōjeikik kweilo̧k ko an doulul eo (lale 10.4.2). Būreejtōnji eo an doulul eo ej aikuj in emakijkij an kweilo̧k (lale 10.4.3).

Bisoprik eo im ritōl ro an doulul eo an jodikdik ro, kōn jipan̄ jān rikapilōk ro, rej karōk jerbal in jipan̄ im m̧akūtkūt ko. Rej aikuj jipan̄ kōttōprak jerbal in lo̧mo̧o̧r eo im mour ilo aiboojoj eo eutiejtata. Rej aikuj jon̄an wōt juon ilubwiljin eria ko emān ikkijeen eddōkļo̧k an juon make: ilo jetōb, iiaio, kanniōk, im jeļāļo̧kjeņ. (Lale 10.2.1.3.)

Unin tōl ko jet im kakien ko jet, ekoba rie likao ro ewōr m̧ōjno ko ilo ānbwinier, būki emblem ko an būrookraam̧ eo an Ajri ro im Jodikdik ro, im aiini menin joortak ko, rej waļo̧k ilo jekjōn 10.8 in Bok in Bōk Meļeļe Eļap.