Te mau hōpoi’a

E tauturu te autahu’ara’a a Melehizedeka i te mau tamari’i a te Atua ’ia fa’aineine ’ia rātou nō te ho’i i mua i tōna aro. E ’ohipa ’āmui te mau melo o te pupu peresibutero nō te tauturu i te fa’atupura’a i te ’ohipa a te Atua nō te fa’aorara’a ’e te fa’ateiteira’a. E tāvini rātou ia vetahi ’ē, e rave rātou i te mau hōpoi’a a te autahu’ara’a, e patu rātou i te hō’ēra’a, ’e e ’apo rātou ’e e ora rātou i te ha’api’ira’a tumu (hi’o BBuka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 8.1).

E turu te mau tauturu o te pupu peresibutero i te peresideni i roto i tāna mau hōpoi’a nō te fa’anaho i te mau tauto’ora’a ’e te peresidenira’a Sōtaiete Tauturu ’e nō te hi’opo’a i te aupurura’a, te mau ’ātivite, te mau parau fa’a’ite, te mau pāpa’a parau ’e te faufa’a moni. E nehenehe te mau tauturu nō roto mai i te pupu peresibutero ’e te Sōtaiete Tauturu e fa’auehia ’ia arata’i i te ’ohipa misiōnare pāroita ’e ’aore rā te mau tauto’ora’a nō te hiero ’e te ’ā’amu utuāfare (hi’o 8.3.3.2).

E ruru tāmau te peresidenira’a pupu peresibutero ’e te pāpa’i parau. Te tauturura’a i te mau ta’ata e tano ’ei peresibutero ’ia fa’aineine nō te fa’ari’i i te Autahu’ara’a a Melehizedeka ’o te hō’ē ïa o te mau ’ohipa mātāmua roa a’e a te peresidenira’a (hi’o 8.4).

E fa’aau te mau peresidenira’a pupu peresibutero ’e Sōtaiete Tauturu i te mau tonora’a aupurura’a ’e e tauturu i te arata’ira’a i te ’ohipa hiero ’e te ’ā’amu ’utuāfare ’e te mau tauto’ora’a nō te ani i te tā’āto’ara’a ’ia fa’ari’i i te mau ha’amaita’ira’a o te ’evanelia. E ’ohipa faufa’a ato’a tā rātou i roto i te ha’api’ira’a i te mau melo o te pāroita i te mau parau tumu nō te aupurura’a, te uiuira’a i te mau pupu aupurura’a, te orara’a i te ture nō te ha’apaera’a mā’a, te patura’a i te fa’arava’ira’a iāna iho, ’e te fa’arahira’a i te fa’aineinera’a o te ta’ata ’ōtahi ’e te ’ūtuāfare (hi’o 22.6.2).

E putuputu te mau pupu peresibutero i te piti ’e te maha o te sābati nō te fa’arahi i te fa’aro’o, nō te patu i te hō’ēra’a, ’e nō te ha’apūai i te mau ’utuāfare ’e te mau nohora’a. Nā roto i te pure, e mā’iti te peresidenira’a pupu peresibutero nā roto i te pure i te mau a’ora’a nō roto mai i te ’āmuira’a rahi i tupu iho nei nō te ’āparau mai te au i te mau hina’aro o te mau melo (hi’o 8.2.1.2).

E nehenehe te mau peresidenira’a pupu peresibutero e fa’anaho i te mau ’ātivite nō te ha’apūai i te mau melo o te pupu ’e nō te hōro’a ia rātou i te mau rāve’a ato’a nō te ’ohipa ’āmui. E paraparau te mau peresidenira’a i te mau ’ātivite ’e te ’episekōpo (hi’o 8.2.1.3).