Ngaahi Tefitoʻi Moʻoni ʻo e Lakanga Fakataulaʻeikí

ʻOku maʻu ʻe Sīsū Kalaisi ʻa e ngaahi kī kotoa ʻo e lakanga fakataulaʻeikí. ʻI he malumalu ʻo ʻEne fakahinohinó, ʻoku foaki ai ʻa e ngaahi kī ʻo e lakanga fakataulaʻeikí ki he kakai tangatá ke nau fakaʻaongaʻi ʻi ha ngaahi uiuiʻi pau ki hono fakahoko e ngāue ʻa e ʻOtuá, ʻo hangē ko hono fakamatalaʻi atu ʻi laló.

Kuo ʻosi foaki ʻe he ʻEikí ki Heʻene Kau ʻAposetoló takitaha ʻa e ngaahi kī kotoa ʻoku fekauʻaki mo e puleʻanga ʻo e ʻOtuá ʻi he māmaní. Ko e ʻAposetolo pule ʻoku kei moʻuí, ʻa e Palesiteni ʻo e Siasí, ko e tokotaha pē ia ʻi māmani kuo fakamafaiʻi ke ne fakaʻaongaʻi e ngaahi kī kotoa ko ia ʻo e lakanga fakataulaʻeikí (vakai, Tokāteline mo e Ngaahi Fuakava 81:1–2; 107:64–67, 91–92; 132:7).

Fakatatau ki he fakahinohino ʻa e Palesiteni ʻo e Siasí, ʻoku foaki ki he kau taki lakanga fakataulaʻeiki ko ʻení ha ngaahi kī ke nau lava ʻo pule ʻi he ngaahi tafaʻaki ʻo honau fatongiá.

• Kau palesiteni fakasiteikí mo e fakavahefonuá

• Pīsopé mo e palesiteni fakakoló

• Ongo palesiteni ʻo e kōlomu ʻo e Lakanga Taulaʻeiki Faka-Melekisētekí mo e Lakanga Taulaʻeiki Faka-ʻĒloné

• Kau palesiteni ʻo e temipalé

• Palesiteni fakamisioná mo e palesiteni ʻo e senitā akoʻanga fakafaifekaú

• Palesiteni ʻo e ngaahi feituʻu fakahisitōlia ʻo e Siasí

ʻOku maʻu ʻe he kau takí ni ʻa e ngaahi kī ʻo e lakanga fakataulaʻeikí ʻi he taimi ʻoku vaheʻi ai kinautolu ki honau fatongiá.

ʻOku ʻikai foaki ʻa e ngaahi kī ʻo e lakanga fakataulaʻeikí ki ha toe niʻihi kehe, kau ai ʻa e ongo tokoni ki he taki lakanga fakataulaʻeiki fakalotofonuá pe palesiteni ʻo e ngaahi houalotu ʻo e Siasí. ʻOku foaki ki he kau taki ko ʻení ha mafai ʻoku ʻoange (delegated) ʻi hono vaheʻi kinautolú pea ʻi he ʻenau maʻu ʻa e ngāue ke fakahokó, ʻi he fakahinohino ʻa kinautolu ʻoku nau maʻu ʻa e ngaahi kī ʻo e lakanga fakataulaʻeikí. ʻOku pule ʻa e kau palesiteni ʻo e ngaahi houalotu ʻo e Siasí ʻi he malumalu ʻo e fakahinohino ʻa kinautolu ʻoku nau maʻu e ngaahi kī ʻo e lakanga fakataulaʻeikí (vakai, 4.2.4

ʻOku fakapapauʻi ʻe he ngaahi kī ʻo e lakanga fakataulaʻeikí ʻoku fakahoko ʻa e ngāue ʻo e fakamoʻuí mo e hākeakiʻí ʻi ha founga maau (vakai, Tokāteline mo e Ngaahi Fuakava 42:11; 132:8). ʻOku tataki ʻe kinautolu ʻoku nau maʻu e ngaahi kī ʻo e lakanga fakataulaʻeikí ʻa e ngāue ʻa e ʻEikí ʻi loto ʻi he ngaahi tafaʻaki ʻoku nau fatongia ʻakí. ʻOku ʻaonga ʻa e mafai pule ko ʻení ki he ngaahi fatongia pau pē ʻi he uiuiʻi ʻo e takí. Ko e taimi ʻoku tukuange ai e kau taki lakanga fakataulaʻeikí mei honau uiuiʻí, ʻoku ʻikai leva ke nau kei maʻu e ngaahi kī ko ʻení.

Ko kinautolu kātoa ʻoku nau ngāue ʻi he Siasí ʻoku vaheʻi pe vahe ange ʻi he malumalu ʻo e tuʻutuʻuni ʻo ha taha ʻokú ne maʻu e ngaahi kī ʻo e lakanga fakataulaʻeikí.

Ko e taimi ʻoku vaheʻi ai ʻa e kakai tangatá mo e houʻeiki fafiné ʻi he malumalu ʻo e fakahinohino ʻa kinautolu ʻoku nau maʻu ʻa e ngaahi kī ʻo e lakanga fakataulaʻeikí, ʻoku ʻoange ai ʻa e mafai mei he ʻOtuá ke nau ngāue ʻi he uiuiʻi ko iá. Hangē ko ʻení:

• ʻOku foaki ki ha fefine ʻoku uiuiʻi mo vaheʻi ʻe he pīsopé ke hoko ko ha palesiteni ʻo e Fineʻofá, ʻa e mafai ke ne tataki e ngāue ʻa e Fineʻofá ʻi he uōtí.

• ʻOku foaki ki ha tangata pe fefine ʻoku uiuiʻi mo vaheʻi ʻe ha mēmipa ʻo e kau pīsopelikí ke hoko ko ha faiako ʻi he Palaimelí, ʻa e mafai ke ne akoʻi e fānau Palaimeli ʻi he uōtí.

Ko kinautolu kotoa pē ʻoku uiuiʻi mo vaheʻí ʻoku nau ngāue ʻi he malumalu ʻo e fakahinohino ʻa kinautolu ʻoku tokangaʻi kinautolú (vakai, 3.4.1.2).

Ko e taimi ʻoku tukuange ai ʻa e kau mēmipa ʻo e Siasí mei ha fatongiá, ʻoku ʻikai ke nau toe maʻu ʻa e mafai fekauʻaki mo iá.

Ke maʻu ha fakamatala lahi ange fekauʻaki mo hono vaheʻi ʻo e kāingalotú ki he ngaahi uiuiʻi faka-Siasí, vakai ki he 18.11.

‘E lava ke vahe ʻe he kau taki ʻo e Siasí ʻoku pulé ha mafai ki ha ngāue ke fakahoko. Ko e taimi ʻoku maʻu ai ʻe he houʻeiki tangatá mo e houʻeiki fafiné ʻa e ngaahi ngāue ko ʻení, ʻoku ʻoange ai ʻa e mafai mei he ʻOtuá ke nau ngāue. Hangē ko ʻení:

• ʻOku foaki ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e mafaí ki he Kau Fitungofulu ʻoku vahe ange ke nau tokangaʻi ha ngaahi ʻēlia pea mo puleʻi e ngaahi konifelenisi fakasiteikí.

• ʻOku vahe ʻe he kau palesiteni fakamisioná ha mafai ki ha kau faifekau tangata mo fafine ʻoku vahe ange ke nau taki mo akoʻi ha kau faifekau kehe.

• ʻOku foaki ʻa e mafai ki he kau mēmipa ʻo e Siasí ke nau hoko ko ha kau tangata mo ha kau fafine ngāue fakaetauhi. ʻOku hoko ʻeni ʻi he taimi ʻoku vahe ange ai kiate kinautolu ʻe he palesiteni ʻo e kōlomu ʻo e kaumātuʻá pe Fineʻofá, ʻi he malumalu ʻo e fakahinohino ʻa e pīsopé.

Ko e mafai ko ē ʻoku foaki ʻo fakatatau ki he ngāué ʻoku fakangatangata pē ia ki ha ngaahi fatongia pau pea mo e lōloa ʻo e ngāue ʻoku faí.

Ke maʻu ha fakamatala lahi ange fekau‘aki mo e ngāue ʻoku vahe ke faí, vakai, 4.2.5.

ʻI hono maʻu ʻa e ouau ʻo e papitaisó, ʻoku fokotuʻu ai ʻe he fānau ʻa e ʻOtuá ha vā fetuʻutaki fakafuakava mo Ia ʻa ia ʻoku fakatau ki he moʻui taʻengatá (vakai, 2 Nīfai 31:17–18). Ko kinautolu ʻoku papitaisó ʻoku nau fai ha fuakava ʻoku nau loto-fiemālie ke toʻo kiate kinautolu ʻa e huafa ʻo Sīsū Kalaisí, tauhi ʻa e ngaahi fekau ʻa e ʻOtuá, mo tauhi kiate Ia ʻo aʻu ki he ngataʻangá (vakai, 2 Nīfai 31:7, 13–14; Mōsaia 18:10; Molonai 6:3; Tokāteline mo e Ngaahi Fuakava 20:37).

Kuo pau ke hoko atu ʻa e hilifaki ʻo e nimá ke maʻu ʻa e meʻafoaki ʻo e Laumālie Māʻoniʻoní ʻi he hili ʻa e papitaiso ʻi he vaí.

Naʻe fakamatalaʻi ʻe he Fakamoʻuí ʻo pehē, “Kapau ʻe ʻikai fanauʻi ʻa e tangatá ʻi he vai pea mo e Laumālie, ʻe ʻikai ʻaupito faʻa hū ia ki he puleʻanga ʻo e ʻOtuá” (Sione 3:5). Ko ia ai, ʻoku hoko mai ʻi he hili ʻa e papitaiso ʻi he vaí ʻa e hilifakinimá mo hono maʻu ʻo e meʻafoaki ʻo e Laumālie Māʻoniʻoní ʻaki hono hilifaki ʻo e nimá (vakai, Tokāteline mo e Ngaahi Fuakava 20:41). ʻI he ouau ko ʻení, ʻoku fakamaʻu ai ʻa e niʻihi fakafoʻituituí ke hoko ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní mo fakahinohinoʻi ke ne maʻu ʻa e Laumālie Māʻoniʻoní.

ʻI hono fakaʻaongaʻi ʻe he kāingalotú ʻenau tui kia Sīsū Kalaisí, fakatomala, mo faifeinga ke tauhi ʻa e fuakava ʻo e papitaisó, ʻoku nau maʻu leva ʻa e takaua ʻo e Laumālie Māʻoniʻoní (vakai, Mōsaia 18:10). ʻOku lava ʻe he Laumālie Māʻoniʻoní ʻo tataki, fakahinohinoʻi, mo fakamaʻa kinautolu mei he angahalá ʻi hono kotoa ʻo ʻenau moʻuí mo tokoniʻi ke nau hangē ange ko e Tamai Hēvaní mo Sīsū Kalaisi (vakai, 2 Nīfai 31:17; 32:5; 3 Nīfai 12:48; 27:20). ʻOku nau ʻi he “hala fāsiʻi mo lausiʻi ʻa ia ʻoku fakatau ki he moʻui taʻengatá” (2 Nīfai 31:18).

ʻOku lava ke maʻu kotoa ʻa e ngaahi tāpuaki taʻengata ʻa e ʻOtuá ʻe Heʻene fānaú—ngaahi ʻofefine mo e ngaahi foha—ʻo fakafou ʻia Sīsū Kalaisi pea mo e ngaahi ouau mo e ngaahi fuakava ʻoku fiemaʻu ki he fakamoʻuí mo e hakeakiʻí (vakai, 3.5.3). Ko hono foaki ʻo e Lakanga Taulaʻeiki Faka-Melekisētekí mo e fakanofo ki ha tuʻungá ko ha ouau ia ʻoku fiemaʻu ki he houʻeiki tangatá ke nau maʻu ai ʻa e kakato ʻo e ngaahi tāpuakí.

ʻOku fai ʻe ha tangata kuó ne maʻu ʻa e Lakanga Taulaʻeiki Faka-Melekisētekí, ha fuakava ke ne faivelenga mo tauhi pau ʻa hono uiuiʻi mo e ngaahi fatongia ʻo e lakanga fakataulaʻeikí (vakai, Tokāteline mo e Ngaahi Fuakava 84:33). ʻOku palōmesi mai ʻa e ʻOtuá ʻaki ha fakapapau kiate kinautolu ʻoku nau tauhi ʻa e fuakavá ni ʻe fakamāʻoniʻoniʻi ʻa e fuakavá ni ʻe he Laumālié pea maʻu e meʻa kotoa pē ʻoku maʻu ʻe he Tamaí (vakai, Tokāteline mo e Ngaahi Fuakava 84:33–40; vakai foki Fakahinohino ki he Ngaahi Folofolá, “Fakapapau mo e Fuakava ʻo e Lakanga Fakataulaʻeikí,” Gospel Library).

ʻOku ʻi ai ha uiuiʻi mo ha fatongia toputapu ʻo kinautolu ʻoku nau maʻu e lakanga fakataulaʻeikí ke nau fakafofongaʻi e ʻEikí ʻi hono tokoniʻi e niʻihi kehé ke nau haʻu kiate Ia mo fakahoko e ngaahi ouau mo e ngaahi fuakava ʻoku fiemaʻu ki he fakamoʻuí mo e hakeakiʻí (vakai, ʻAlamā 13:1–3, 6, 16). ʻI he taimi ʻoku fakahoko totonu ai ʻe he kau maʻu lakanga fakataulaʻeikí ʻa e uiuiʻi mo e fatongia ko ʻení, ʻoku nau hoko ai ko ha ngaahi meʻangāue ʻi he toʻukupu ʻo e ʻOtuá ke faitāpuekina ʻEne fānaú.

ʻOku ʻatā ʻa e ngaahi tāpuaki ʻa e ʻOtuá ki he moʻui taʻengatá ki he tangata, fefine, mo e fānau moʻui taau kotoa pē. Ko kinautolu kotoa pē ʻoku nau maʻu ʻa e kau tamaioʻeiki ʻa e ʻEikí—pea nau fakahoko mo tauhi ʻa e ngaahi fuakava ʻoku fekauʻaki mo e ngaahi ouau ʻo e fakamoʻuí mo e hakeakiʻí—ʻoku nau maʻu ʻa e ʻEiki ko Sīsū Kalaisí. Ko kinautolu kotoa pē ʻoku nau tali ʻa Sīsū Kalaisí ʻoku nau tali ʻa e Tamaí mo e meʻa kotoa pē ʻoku maʻu ʻe he Tamaí (vakai, Tokāteline mo e Ngaahi Fuakava 84:36–38; vakai foki, Mātiu 10:40; Sione 13:20; Tokāteline mo e Ngaahi Fuakava 76:59).

ʻOku fuakava ʻa e kāingalotu ʻo e Siasí ʻoku maʻu honau ʻenitameni temipalé ke nau:

• Moʻui ʻaki ʻa e fono ʻo e talangofuá.

• Talangofua ki he fono ʻo e feilaulaú.

• Talangofua ki he fono ʻo e ongoongolelei ʻo Sīsū Kalaisí.

• Tauhi ʻa e fono ʻo e angamaʻá.

• Tauhi ʻa e fono ʻo e fakatapuí.

Ko ha konga ʻo e ouau ʻenitaumeni ko iá, ko hono fakahinohinoʻi ʻa e tokotaha fakafoʻituituí ke ne tui ʻa e kāmeni ʻo e lakanga fakataulaʻeiki māʻoniʻoní ʻi he toenga ʻo ʻene moʻuí. ʻOku kau ʻi hono tauhi ʻo e ngaahi fuakava naʻe fai ʻi he ʻenitaumení ʻa e faingamālie toputapu ʻo hono tui ʻa e kāmeni temipalé (vakai, 26.4.2).

Ko e ngaahi tāpuaki ko ia ʻoku fekauʻaki mo hono maʻu mo tauhi ʻa e ngaahi fuakava ʻo e ʻenitaumení ʻoku kau ai ʻa e ʻilo lahi ange ki he ʻOtuá mo ʻEne palaní, maluʻi fakalangí, mo e mālohi ʻo e anga faka-ʻOtuá. (Vakai, Tokāteline mo e Ngaahi Fuakava 38:32; 84:19–21; 109:22; vakai foki, 27.2 ʻi he tohi tuʻutuʻuni ko ʻení.)

ʻI he ouau ʻo e silá, ʻoku fai ai ʻe ha tangata mo ha fefine ha fuakava mo e ʻOtuá pea mo kinaua foki. ʻOkú na fuakava mo fepalōmesiʻaki ke fetauhiʻaki ko e husepāniti mo e uaifi, fealeaʻaki mo fengāueʻaki fakataha ʻi he ʻofa mo e angatonu, mo fakahoko hona ngaahi fatongia fakalangi naʻe tuku mai ko ha husepāniti mo e uaifi kae pehē foki ki heʻena hoko ko e tamai mo e faʻē.

Ko ha tangata mo e fefine ʻokú na tauhi totonu ki he fuakavá ni ʻoku fakatahaʻi kinaua ko ha husepāniti mo e uaifi ki hono kotoa ʻo ʻitānití. Kuo silaʻi ʻe he ongo meʻa malí kiate kinaua ʻo fakafou ʻi heʻena faivelengá, ʻa e ngaahi tāpuaki kotoa pē ʻo e fuakava taʻengata ʻa e ʻOtuá, ʻa ia ko e taupotu tahá ko e hakeakiʻi mo ha hako ʻoku taʻengata (vakai, Tokāteline mo e Ngaahi Fuakava 132:19–20; vakai foki, 66:2; 131:1–4; mo e 27.3 mo e 38.4 ʻi he tohi tuʻutuʻuni ko ʻení).