“3. Mga Baroganan sa Pagkapari,” Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (2026).
“3. Mga Baroganan sa Pagkapari,” Kinatibuk-ang Tamdanan nga Basahon.
3.
Mga Baroganan sa Pagkapari
3.0
Pasiuna
Ang pagkapari mao ang awtoridad ug gahom sa Dios. Pinaagi sa pagkapari, ang Langitnong Amahan mohimo sa Iyang buhat “sa pagpahinabo sa pagka-imortal ug kinabuhi nga dayon sa tawo” (Moises 1:39). Ang Dios naghatag og awtoridad ug gahum ngadto sa Iyang mga anak nga lalaki ug mga anak nga babaye dinhi sa yuta aron sa pagtabang nga matuman kini nga buhat (tan-awa sa kapitulo 1).
3.1
Pagpahiuli sa Pagkapari
Ang Simbahan ni Jesukristo sa mga Santos sa Ulahing mga Adlaw mao ang bugtong organisasyon sa yuta nga adunay awtoridad sa pagkapari. Si Propeta Joseph Smith nakadawat sa Aaronic nga Pagkapari ug sa mga yawe niini gikan ni Juan Bautista (tan-awa sa Doktrina ug mga Pakigsaad 13:1). Siya nakadawat sa Melchizedek nga Pagkapari ug sa mga yawe niini gikan sa mga Apostoles nga si Pedro, Santiago, ug Juan (tan-awa sa Doktrina ug mga Pakigsaad 27:12–13).
Didto sa Templo sa Kirtland, si Moises, Elias, ug Elijah nagpakita ngadto ni Joseph Smith ug mitugyan kaniya sa dugang awtoridad nga gikinahanglan aron matuman ang buhat sa Dios sa ulahing mga adlaw (tan-awa sa Doktrina ug mga Pakigsaad 110:11–16).
Ang matag sakop sa Unang Kapangulohan ug sa Korum sa Napulog Duha ka Apostoles naghupot niining tanang yawe sa pagkapari karon. Kini nga mga lider motawag ug motugot sa ubang mga miyembro sa Simbahan sa paggamit sa awtoridad ug gahom sa pagkapari sa Dios sa pag-abag sa Iyang buhat sa kaluwasan ug kahimayaan.
3.2
Mga Panalangin sa Pagkapari
Pinaagi sa mga pakigsaad ug mga ordinansa sa pagkapari, ang Dios mihimo sa daghang panalangin nga maanaa ngadto sa Iyang tanang anak. Kini nga mga panalangin naglakip sa:
-
Bunyag ug pagkamiyembro sa Ang Simbahan ni Jesukristo sa mga Santos sa Ulahing mga Adlaw.
-
Ang gasa sa Espiritu Santo.
-
Pag-ambit sa sakramento.
-
Awtoridad ug gahom sa pagserbisyo diha sa mga calling ug mga buluhaton sa Simbahan.
-
Pagdawat og patriyarkal nga mga panalangin ug uban pang mga panalangin sa pagkapari sa pagkaayo, kahupayan, ug giya.
-
Pagdawat sa pagtuga uban sa gahom sa Dios diha sa templo.
-
Pagkaselyo ngadto sa mga sakop sa pamilya alang sa kahangtoran.
-
Ang saad sa kinabuhing dayon.
Ang mga anak sa Dios makadawat niini nga mga panalangin sa pagkapari ug makasinati og dakong kalipay kon sila mosunod sa ebanghelyo ni Jesukristo.
3.3
Melchizedek nga Pagkapari ug Aaronic nga Pagkapari
Sa Simbahan, ang pagkapari adunay duha ka bahin: ang Melchizedek nga Pagkapari ug ang Aaronic nga Pagkapari (tan-awa sa Doktrina ug mga Pakigsaad 107:1).
3.3.1
Melchizedek nga Pagkapari
Ang Melchizedek nga Pagkapari mao ang “Balaan nga Pagkapari, sunod sa Kapunongan sa Anak sa Dios” (Doktrina ug mga Pakigsaad 107:3). Kini mao ang gahom diin ang mga anak nga lalaki ug mga anak nga babaye sa Dios mahimong sama Kaniya (tan-awa sa Doktrina ug mga Pakigsaad 84:19–21; 132:19–20).
“Ang Melchizedek nga Pagkapari naghupot sa katungod sa kapangulohan.” Kini adunay “gah[o]m ug awtoridad ibabaw sa tanan nga mga buhatan diha sa simbahan sa tanan nga panahon sa kalib[o]tan, sa pagtugyan sa espirituhanon nga mga butang” (Doktrina ug mga Pakigsaad 107:8). Pinaagi niini nga awtoridad, ang mga lider sa Simbahan ang mogiya ug mangalagad sa tanang espirituwal nga buhat sa Simbahan (tan-awa sa Doktrina ug mga Pakigsaad 107:18).
Ang Presidente sa Simbahan mao ang tigdumalang high priest ibabaw sa Melchizedek nga Pagkapari (tan-awa sa Doktrina ug mga Pakigsaad 107:65–67). Ang presidente sa stake mao ang tigdumalang high priest sa stake (tan-awa sa Doktrina ug mga Pakigsaad 107:8, 10; tan-awa usab sa kapitulo 6 niini nga tamdanan nga basahon). Ang bishop mao ang tigdumalang high priest sa ward (tan-awa sa Doktrina ug mga Pakigsaad 107:17; tan-awa usab sa kapitulo 7 niini nga tamdanan nga basahon).
Alang sa impormasyon mahitungod sa mga katungdanan ug mga responsibilidad sa Melchizedek nga Pagkapari, tan-awa sa 8.1.
3.3.2
Aaronic nga Pagkapari
Ang Aaronic nga Pagkapari mao ang “usa ka sumpay sa … Melchizedek nga Pagkapari” (Doktrina ug mga Pakigsaad 107:14). Kini naglakip sa mga yawe sa:
-
Pagpangalagad sa mga anghel.
-
Ebanghelyo sa paghinulsol.
-
Pagpangalagad sa dayag nga ordinansa, lakip sa bunyag alang sa kapasayloan sa mga sala.
(Tan-awa sa Doktrina ug mga Pakigsaad 13:1; 84:26–27; 107:20.)
Ang bishop mao ang presidente sa Aaronic nga Pagkapari sa ward (tan-awa sa Doktrina ug mga Pakigsaad 107:15).
Alang sa impormasyon mahitungod sa mga katungdanan ug mga responsibilidad sa Aaronic nga Pagkapari, tan-awa sa 10.1.3.
3.4
Awtoridad sa Pagkapari
Ang awtoridad sa pagkapari mao ang pagtugot sa pagrepresentar sa Dios ug sa paglihok diha sa Iyang ngalan. Sa Simbahan, ang tanang awtoridad sa pagkapari gigamit ubos sa direksyon niadtong naghupot sa mga yawe sa pagkapari.
Ang takos nga mga miyembro sa Simbahan modawat sa awtoridad sa pagkapari pinaagi sa pagtugyan sa pagkapari ug ordinasyon ngadto sa mga katungdanan sa pagkapari. Ang tanang miyembro sa Simbahan makagamit sa gidelegar nga awtoridad samtang sila i-set apart o sangonan sa pag-abag sa paghimo sa buhat sa Dios. Ang mga miyembro adunay tulubagon ngadto sa Dios ug niadtong Iyang gitudlo sa pagdumala kon sa unsang paagi nila gamiton ang Iyang awtoridad (tan-awa sa 3.4.4).
3.4.1
Mga Yawe sa Pagkapari
Ang mga yawe sa pagkapari mao ang awtoridad sa paggiya sa paggamit sa pagkapari alang sa mga anak sa Dios. Ang paggamit sa tanang awtoridad sa pagkapari diha sa Simbahan giyahan niadtong naghupot sa mga yawe sa pagkapari (tan-awa sa Doktrina ug mga Pakigsaad 65:2).
3.4.1.1
Kadtong Kinsa Naghupot sa mga Yawe sa Pagkapari
Si Jesukristo naghupot sa tanang yawe sa pagkapari. Ubos sa Iyang direksyon, ang mga yawe sa pagkapari gihatag ngadto sa mga lalaki aron gamiton sa piho nga mga calling sa pagtabang nga matuman ang buhat sa Dios, sumala sa gipasabot sa ubos.
Ang Ginoo mitugyan sa tanang yawe ngadto sa matag usa sa Iyang Apostoles kalabot sa gingharian sa Dios dinhi sa yuta. Ang senior nga buhi nga Apostol, ang Presidente sa Simbahan, mao lamang ang bugtong tawo sa yuta nga gitugotan nga mogamit sa tanang yawe sa pagkapari (tan-awa sa Doktrina ug mga Pakigsaad 81:1–2; 107:64–67, 91–92; 132:7).
Ubos sa direksyon sa Presidente sa Simbahan, ang mosunod nga lokal nga mga lider sa pagkapari gihatagan sa mga yawe aron sila makadumala sa ilang mga bahin sa responsibilidad:
-
Mga presidente sa stake ug district
-
Mga bishop ug mga presidente sa branch
-
Mga presidente sa korum sa Melchizedek ug Aaronic nga Pagkapari
-
Mga presidente sa templo
-
Mga presidente sa misyon ug mga presidente sa missionary training center
-
Mga presidente sa makasaysayanong dapit sa Simbahan
Kini nga mga lider makadawat sa mga yawe sa pagkapari kon sila i-set apart ngadto sa ilang mga calling.
Ang mga yawe sa pagkapari dili ihatag ngadto sa uban, lakip sa mga magtatambag sa lokal nga mga lider sa pagkapari o sa mga presidente sa mga organisasyon sa Simbahan. Kini nga mga lider gihatagan sa gidelegar nga awtoridad kon sila i-set apart ug kon sila modawat sa mga buluhaton ubos sa direksiyon niadtong naghupot sa mga yawe sa pagkapari. Ang mga presidente sa mga organisasyon sa Simbahan ang modumala ubos sa direksyon niadtong naghupot sa mga yawe sa pagkapari (tan-awa sa 4.2.4).
3.4.1.2
Han-ay diha sa Buhat sa Dios
Ang mga yawe sa pagkapari moseguro nga ang buhat sa kaluwasan ug kahimayaan sa Dios matuman sa usa ka han-ay nga paagi (tan-awa sa Doktrina ug mga Pakigsaad 42:11; 132:8). Kadtong naghupot sa mga yawe sa pagkapari mogiya sa buhat sa Ginoo diha sa ilang mga bahin sa responsibilidad. Kining tigdumalang awtoridad balido lamang sa piho nga mga responsibilidad sa calling sa lider. Kon ang mga lider sa pagkapari ma-release gikan sa ilang mga calling, wala na sila maghupot niini nga mga yawe.
Ang tanan nga magserbisyo sa Simbahan i-set apart o sangonan ubos sa direksyon sa usa nga naghupot sa mga yawe sa pagkapari.
3.4.2
Pagtugyan ug Ordinasyon sa Pagkapari
Ubos sa direksyon niadtong naghupot sa mga yawe sa pagkapari, ang Aaronic nga Pagkapari ug ang Melchizedek nga Pagkapari itugyan diha sa takos nga lalaki nga mga miyembro sa Simbahan (tan-awa sa Doktrina ug mga Pakigsaad 84:14–17). Human matugyan ang angay nga pagkapari, ang tawo i-orden ngadto sa katungdanan niana nga pagkapari, sama sa deacon o elder. Ang naghupot sa pagkapari mogamit sa pagkapari sumala sa mga katungod ug mga buluhaton niana nga katungdanan (tan-awa sa Doktrina ug mga Pakigsaad 107:99).
Ang matag tawo sa Simbahan ni Jesukristo kinahanglang maningkamot nga mahimong takos sa pagdawat ug paggamit sa Melchizedek nga Pagkapari sa pagserbisyo sa uban. Kon ang usa ka lalaki modawat niini nga pagkapari, siya mohimo og pakigsaad nga matinud-anong motuman sa iyang mga responsibilidad sa pagkapari. Siya usab modawat gikan sa Dios sa usa ka panumpa, o saad, sa mahangtorong mga panalangin (tan-awa sa Doktrina ug mga Pakigsaad 84:33–44; tan-awa usab sa Ang Giya ngadto sa mga Kasulatan, “Panumpa ug Pakigsaad sa Pagkapari”).
Alang sa dugang nga impormasyon mahitungod sa pagtugyan ug ordinasyon sa pagkapari, tan-awa sa 8.1.1, 10.6, 18.10, ug 38.2.5.
3.4.3
Pagdelegar sa Awtoridad sa Pagkapari aron sa Pagserbisyo diha sa Simbahan
Ang awtoridad sa pagkapari aron sa pagserbisyo diha sa Simbahan idelegar ngadto sa mga miyembro sa mosunod nga mga pamaagi:
-
Pinaagi sa pag-set apart ngadto sa usa ka calling sa Simbahan
-
Pinaagi sa paghatag og buluhaton gikan sa tigdumalang mga lider sa Simbahan
3.4.3.1
Pag-set Apart
Kon ang mga miyembro sa Simbahan i-set apart ubos sa direksyon niadtong naghupot sa mga yawe sa pagkapari, sila gihatagan og awtoridad gikan sa Dios sa paglihok niana nga calling. Pananglitan:
-
Ang usa ka babaye nga tawagon ug i-set apart sa bishop isip presidente sa Relief Society sa ward hatagan og awtoridad sa paggiya sa buhat sa Relief Society diha sa ward.
-
Ang usa ka lalaki o babaye nga tawagon ug i-set apart sa usa ka sakop sa bishopric isip usa ka magtutudlo sa Primary hatagan og awtoridad sa pagtudlo sa kabataan sa Primary diha sa ward.
Ang tanan nga tawagon ug i-set apart magserbisyo ubos sa direksyon niadtong nagdumala kanila (tan-awa sa 3.4.1.2).
Kon ang mga miyembro sa Simbahan na-release gikan sa usa ka calling, sila wala nay awtoridad kalabot niini.
Alang sa dugang nga impormasyon mahitungod sa pag-set apart sa mga miyembro alang sa mga calling sa Simbahan, tan-awa sa 18.11.
3.4.3.2
Buluhaton
Ang tigdumalang mga lider sa Simbahan makadelegar sa awtoridad pinaagi sa paghatag og buluhaton. Kon ang mga lalaki ug mga babaye makadawat niini nga mga buluhaton, sila hatagan og awtoridad gikan sa Dios sa paglihok. Pananglitan:
-
Ang Unang Kapangulohan ug ang Korum sa Napulog Duha ka Apostoles motugyan sa awtoridad ngadto sa mga Seventy kinsa gisangonan sa pagpangalagad sa mga area ug sa pagdumala sa mga komperensiya sa stake.
-
Ang mga presidente sa misyon motugyan sa awtoridad ngadto sa lalaki ug babaye nga mga misyonaryo kinsa gisangonan nga mogiya ug mobansay sa ubang mga misyonaryo.
-
Ang awtoridad itugyan ngadto sa mga miyembro sa Simbahan nga moserbisyo isip tigpangalagad nga mga igsoong lalaki ug tigpangalagad nga mga igsoong babaye. Kini mahitabo kon sila gisangonan ubos sa direksyon sa bishop pinaagi sa presidente sa korum sa mga elder ug presidente sa Relief Society.
Ang awtoridad nga idelegar pinaagi sa paghatag og buluhaton limitado ngadto sa piho nga mga responsibilidad ug gidugayon sa buluhaton.
Alang sa dugang nga impormasyon mahitungod sa buluhaton pinaagi sa pagdelegar, tan-awa sa 4.2.5.
3.4.4
Paggamit sa Awtoridad sa Pagkapari sa Matarong nga Paagi
Ang mga lider ug mga miyembro sa Simbahan mogamit sa gitugyan o gidelegar nga awtoridad sa pagkapari aron sa pagpanalangin sa mga kinabuhi sa uban.
Kini nga awtoridad magamit lamang sa matarong nga paagi (tan-awa sa Doktrina ug mga Pakigsaad 121:36). Kini gamiton pinaagi sa pagdani, sa pagkamainantoson, sa kalumo, kaaghop, gugma, ug pagkamabination (tan-awa sa Doktrina ug mga Pakigsaad 121:41–42). Ang mga lider magpakitambag sa uban sa diwa sa panaghiusa ug magtinguha sa kabubut-on sa Ginoo pinaagi sa pagpadayag (tan-awa sa Doktrina ug mga Pakigsaad 41:2). Alang sa impormasyon mahitungod sa pagpakigtambag sa uban, tan-awa sa 4.4.3.
Kadtong naggamit sa awtoridad sa pagkapari dili mopugos sa ilang kabubut-on ngadto sa uban. Sila dili mogamit niini alang sa hinakog nga mga katuyoan. Kon ang usa ka tawo mogamit niini nga awtoridad sa dili matarong nga paagi, “ang langit sa ilang mga kaugalingon mobiya [ug] ang Espiritu sa Ginoo maguol” (Doktrina ug mga Pakigsaad 121:37).
Ang pipila ka calling sa Simbahan naglakip sa usa ka responsibilidad sa pagdumala. Alang sa impormasyon mahitungod sa pagdumala diha sa Simbahan, tan-awa sa 4.2.4.
3.5
Mga Ordinansa ug mga Pakigsaad
Ang Dios naghatag og mga ordinansa ug mga pakigsaad aron mapanalanginan ang Iyang mga anak ug mahimo nilang madawat ang kinabuhing dayon.
3.5.1
Mga Ordinansa
Ang ordinansa usa ka sagradong buhat nga ipahigayon pinaagi sa awtoridad sa pagkapari. Ang mga ordinansa kanunay nga kabahin sa ebanghelyo ni Jesukristo (tan-awa sa Genesis 1:28; Moises 6:64–65).
Sa daghang mga ordinansa, ang mga indibidwal mohimo og mga pakigsaad uban sa Dios. Ang mga ehemplo naglakip sa bunyag, sa sakramento, sa pagtuga, ug sa ordinansa sa pagselyo sa kaminyoon. Sa ubang mga ordinansa sama sa patriyarkal nga mga panalangin o mga pagpanalangin sa masakiton, ang mga indibidwal dili mohimo og mga pakigsaad, apan sila makadawat sa giya ug kalig-on sa pagtuman sa mga pakigsaad.
Ang mga ordinansa adunay simbolikanhong mga kahulogan nga nagtudlo sa mga indibidwal ngadto sa Langitnong Amahan ug ni Jesukristo. Sa mga ordinansa nga naglakip og mga pakigsaad, ang mga pulong, mga aksiyon, ug uban pang simbolikanhong mga elemento sa ordinansa nagtudlo sa mga indibidwal mahitungod sa mga saad nga ilang himoon ngadto sa Dios ug sa mga panalangin nga ilang madawat pinaagi sa ilang pagkamatinud-anon.
Ang matag ordinansa nagtugot sa mga indibidwal nga modawat sa buhong nga espirituwal nga mga panalangin. Ang Ginoo mipadayag, “Diha sa mga ordinansa [sa pagkapari], ang gahom sa pagka-diosnon gipakita” (Doktrina ug mga Pakigsaad 84:20).
3.5.2
Mga Pakigsaad
Ang pakigsaad usa ka sagrado nga saad tali sa Dios ug sa Iyang mga anak. Ang Dios naghatag sa mga kondisyon alang sa pakigsaad, ug ang Iyang mga anak mouyon sa pagsunod niadtong mga kondisyon. Ang Dios misaad sa pagpanalangin sa Iyang mga anak kon sila motuman sa pakigsaad.
Ang mga pakigsaad mao ang labing mahinungdanon sa buhat sa Dios sa kaluwasan ug kahimayaan (tan-awa sa 1.2). Ang mga miyembro mohimo og mga pakigsaad ngadto sa Dios samtang sila modawat sa mga ordinansa sa kaluwasan ug kahimayaan (tan-awa sa 3.5.3). Ang tanan nga molahutay hangtod sa kataposan sa pagtuman sa ilang mga pakigsaad makadawat og kinabuhing dayon (tan-awa sa 2 Nephi 31:17–20; Doktrina ug mga Pakigsaad 14:7; tan-awa usab sa 1.1).
Ang mga ginikanan, mga lider sa Simbahan, ug ang uban motabang sa mga indibidwal nga maandam sa paghimo og mga pakigsaad samtang sila modawat sa mga ordinansa sa ebanghelyo. Sila moseguro nga ang tawo nakasabot sa mga pakigsaad nga iyang gihimo. (Kini nga mga pakigsaad gipasabot diha sa seksiyon 3.5.3.) Human nga ang usa ka tawo nakahimo og pakigsaad, sila motabang kaniya nga matuman kini (tan-awa sa Moroni 6:4).
3.5.3
Mga Ordinansa ug mga Pakigsaad Gikinahanglan alang sa Kaluwasan ug Kahimayaan
Ang mga indibidwal mohimo og mga pakigsaad ngadto sa Dios samtang modawat sila sa mga ordinansa nga gikinahanglan alang sa kaluwasan ug kahimayaan. Ang mga ordinansa nga gikinahanglan alang sa kaluwasan ug kahimayaan mao ang:
-
Bunyag.
-
Kompirmasyon ug gasa sa Espiritu Santo.
-
Pagtugyan sa Melchizedek nga Pagkapari ug pag-orden ngadto sa usa ka katungdanan (alang sa mga lalaki).
-
Pagtuga diha sa templo.
-
Pagselyo diha sa templo.
Ang buhi nga mga indibidwal makadawat niini nga mga ordinansa alang sa ilang kaugalingon. Hinuon, daghan sa mga anak sa Dios ang namatay nga walay oportunidad nga makadawat sa mga ordinansa nga gikinahanglan alang sa kaluwasan ug kahimayaan. Sa Iyang maluluy-on nga plano, ang Dios naghatag og paagi nga ang mga indibidwal modawat niini nga mga ordinansa alang niadtong namatay na. Kining sagrado nga mga ordinansa ipahigayon diha sa mga templo.
Alang sa dugang nga impormasyon mahitungod sa pagpahigayon sa mga ordinansa alang sa mga patay, tan-awa sa kapitulo 28
3.5.3.1
Bunyag
Pinaagi sa pagdawat sa ordinansa sa bunyag, ang mga anak sa Dios mosulod sa usa ka relasyon sa pakigsaad uban Kaniya nga modala paingon sa kinabuhing dayon (tan-awa sa 2 Nephi 31:17–18). Kadtong nabunyagan makigsaad nga sila andam nga modala diha kanila sa ngalan ni Jesukristo, mosunod sa mga sugo sa Dios, ug moserbisyo Kaniya hangtod sa kataposan (tan-awa sa 2 Nephi 31:7, 13–14; Mosiah 18:10; Moroni 6:3; Doktrina ug mga Pakigsaad 20:37).
Ang bunyag pinaagi sa tubig kinahanglang pagasundan sa pagpandong sa mga kamot alang sa gasa sa Espiritu Santo.
3.5.3.2
Kompirmasyon ug Gasa sa Espiritu Santo
Ang Manluluwas mipasabot, “Walay makasulod sa gingharian sa Dios gawas kon matawo siya pinaagi sa tubig ug sa Espiritu” (Juan 3:5). Busa, ang bunyag pinaagi sa tubig pagasundan sa kompirmasyon ug pagdawat sa gasa sa Espiritu Santo pinaagi sa pagpandong sa mga kamot (tan-awa sa Doktrina ug mga Pakigsaad 20:41). Niini nga ordinansa, ang mga indibidwal kompirmahan nga mga miyembro sa Ang Simbahan ni Jesukristo sa mga Santos sa Ulahing mga Adlaw ug sultihan sa pagdawat sa Espiritu Santo.
Kon ang mga miyembro mopakita og pagtuo diha ni Jesukristo, maghinulsol, ug maningkamot sa pagtuman sa pakigsaad sa bunyag, sila makadawat sa pakig-uban sa Espiritu Santo (tan-awa sa Mosiah 18:10). Ang Espiritu Santo makagiya, makatudlo, ug makaputli nila gikan sa sala sa tibuok nilang kinabuhi ug makatabang nila nga mas mahisama sa Langitnong Amahan ug ni Jesukristo (tan-awa sa 2 Nephi 31:17; 32:5; 3 Nephi 12:48; 27:20). Sila maanaa na sa “higpit ug pig-ot nga dalan padulong sa kinabuhing dayon” (2 Nephi 31:18).
3.5.3.3
Pagtugyan sa Melchizedek nga Pagkapari ug Pag-orden ngadto sa usa ka Katungdanan
Ang tanang mahangtorong mga panalangin sa Dios anaa alang sa Iyang mga anak—mga anak nga babaye ug mga anak nga lalaki—pinaagi ni Jesukristo ug sa mga ordinansa ug mga pakigsaad nga gikinahanglan alang sa kaluwasan ug kahimayaan (tan-awa 3.5.3). Ang pagtugyan sa Melchizedek nga Pagkapari ug pag-orden ngadto sa usa ka katungdanan gikinahanglan nga ordinansa alang sa mga lalaki aron madawat ang kahingpitan niini nga mga panalangin.
Ang usa ka lalaki nga modawat sa Melchizedek nga Pagkapari mohimo og pakigsaad nga magmatinud-anon ug mopalambo sa iyang calling ug mga responsibilidad sa pagkapari (tan-awa sa Doktrina ug mga Pakigsaad 84:33). Ang Dios nagsaad uban sa usa ka panumpa nga kadtong motahod niini nga pakigsaad pagabalaanon sa Espiritu ug makadawat sa tanan nga anaa sa Amahan (tan-awa sa Doktrina ug mga Pakigsaad 84:33–40; tan-awa usab sa Giya ngadto sa mga Kasulatan, “Panumpa ug Pakigsaad sa Pagkapari,” Librarya sa Ebanghelyo).
Ang mga naghupot sa pagkapari adunay sagradong tawag ug responsibilidad sa pagrepresentar sa Ginoo sa pagtabang sa uban nga moduol ngadto Kaniya ug sa pagpangalagad sa mga ordinansa ug mga pakigsaad nga gikinahanglan alang sa kaluwasan ug kahimayaan (tan-awa sa Alma 13:1–3, 6, 16). Kon ang mga naghupot sa pagkapari mopalambo niini nga calling ug responsibilidad, sila mamahimong mga instrumento sa mga kamot sa Dios aron sa pagpanalangin sa Iyang mga anak.
Ang mga panalangin sa Dios nga kinabuhing dayon anaa alang sa tanang takos nga kalalakin-an, kababayen-an, ug kabataan. Ang tanan nga modawat sa mga sulugoon sa Ginoo—ug kinsa mohimo ug motuman sa mga pakigsaad kalabot sa mga ordinansa sa kaluwasan ug kahimayaan—modawat ni Ginoong Jesukristo. Ang tanan kinsa modawat ni Jesukristo modawat sa Amahan ug sa tanan nga anaa sa Amahan (tan-awa sa Doktrina ug mga Pakigsaad 84:36–38; tan-awa usab sa Mateo 10:40; Juan 13:20; Doktrina ug mga Pakigsaad 76:59).
3.5.3.4
Pagtuga diha sa Templo
Ang mga miyembro sa Simbahan nga modawat sa pagtuga diha sa templo makigsaad sa:
-
Pagsunod sa balaod sa pagkamasulundon.
-
Pagsunod sa balaod sa sakripisyo.
-
Pagsunod sa balaod sa ebanghelyo ni Jesukristo.
-
Pagsunod sa balaod sa kaputli.
-
Pagsunod sa balaod sa pagpahinungod.
Isip kabahin sa ordinansa sa pagtuga, ang indibidwal sultihan nga isul-ob ang garment sa balaan nga pagkapari sa tibuok niyang kinabuhi. Ang pagtuman sa mga pakigsaad nga gihimo sa pagtuga naglakip sa sagrado nga pribilihiyo sa pagsul-ob sa garment sa templo (tan-awa sa 26.4.2).
Ang mga panalangin nga nag-uban sa pagdawat ug pagtuman sa mga pakigsaad sa pagtuga naglakip sa mas dakong kahibalo bahin sa Dios ug sa Iyang plano, sa balaanong panalipod, ug sa gahom sa pagkadiosnon. (Tan-awa sa Doktrina ug mga Pakigsaad 38:32; 84:19–21; 109:22; tan-awa usab sa 27.2 niini nga tamdanan nga basahon.)
3.5.3.5
Pagselyo diha sa Templo
Sa ordinansa sa pagselyo, ang usa ka lalaki ug usa ka babaye mohimo og pakigsaad ngadto sa Dios ug ngadto sa usag usa. Sila makigsaad ug mosaad nga modawat sa usag usa isip bana ug asawa, magtinambagay ug magtinabangay diha sa gugma ug pagkamatarong, ug motuman sa ilang balaanong gisangon nga mga tahas isip bana ug asawa ug isip amahan ug inahan.
Ang lalaki ug babaye nga matinud-anon niini nga pakigsaad pagahiusahon isip bana ug asawa alang sa tanang kahangtoran. Ang magtiayon miselyo nganha nila, pinaagi sa ilang pagkamatinud-anon, sa tanang panalangin sa mahangtorong pakigsaad sa Dios, ang kinatas-an niini mao ang kahimayaan uban sa mahangtorong kaliwatan (tan-awa sa Doktrina ug mga Pakigsaad 132:19–20; tan-awa usab sa 66:2; 131:1–4; ug 27.3 ug 38.4 niini nga tamdanan nga basahon).
3.5.4
Ang Sakramento
Ang Manluluwas mipasiugda sa sakramento ug misugo sa Iyang mga sumusunod sa pag-ambit niini agi og paghinumdom Kaniya (tan-awa Mateo 26:26–28; 3 Nephi 18:1–12; Moroni 6:5–6). Ang sakramento naghatag og sagrado ug regular nga oportunidad alang sa mga miyembro sa Simbahan sa pagpamalandong sa kinabuhi, pangalagad, ug Pag-ula ni Jesukristo (tan-awa sa Doktrina ug mga Pakigsaad 27:2; tan-awa usab sa 29.2.1 niini nga tamdanan nga basahon).
Pinaagi sa pag-ambit sa sakramento, ang mga indibidwal mosaksi, o makigsaad, nga sila andam sa pagdala nganha kanila sa ngalan ni Jesukristo, kanunay nga mohinumdom Kaniya, ug mosunod sa Iyang mga sugo. Kon ang mga indibidwal motuman niini nga pakigsaad, sila gisaaran nga sila sa kanunay makabaton sa Espiritu sa Ginoo uban kanila (tan-awa sa Doktrina ug mga Pakigsaad 20:77, 79; tan-awa usab sa 3 Nephi 18:7, 11). Pinaagi sa makapaputli nga gahom sa Espiritu Santo, ang Ginoo molunsay nila sa tibuok nilang kinabuhi (tan-awa sa 3 Nephi 27:20). Sa ingon, sila makapabilin og kapasayloan sa ilang mga sala (tan-awa sa Mosiah 4:3–12).
Ang ordinansa sa sakramento makatabang sa mga miyembro sa Simbahan nga molahutay hangtod sa kataposan sa pagtuman sa tanang pakigsaad nga ilang gihimo ngadto sa Dios. Kini usa ka balik-balik nga imbitasyon nga sinserong maghinulsol ug magbag-o sa espirituwal nga paagi, ug sa ingon molambo aron mas mahimong sama sa Dios.
3.6
Gahom sa Pagkapari
Ang gahom sa Pagkapari mao ang gahom sa Dios, nga Iyang gigamit sa pagpanalangin sa Iyang mga anak. Ang gahom sa Dios sa pagkapari modagayday ngadto sa tanang miyembro sa Simbahan—babaye ug lalaki—samtang sila motuman sa mga pakigsaad nga ilang gihimo uban Kaniya. Ang mga miyembro mohimo niini nga mga pakigsaad samtang sila modawat sa mga ordinansa sa pagkapari. (Tan-awa sa Doktrina ug mga Pakigsaad 84:19–20.)
Ang mga panalangin sa gahom sa pagkapari nga madawat sa mga miyembro naglakip sa:
-
Giya alang sa ilang kinabuhi.
-
Pagpadayag aron makahibalo unsaon sa pagtuman sa buhat nga sila gi-orden, gi-set apart, o gisangonan nga buhaton.
-
Pagtabang ug paglig-on nga mahimong mas sama ni Jesukristo ug sa Langitnong Amahan.
3.7
Ang Pagkapari ug ang Panimalay
Ang tanang miyembro sa Simbahan nga motuman sa ilang mga pakigsaad—mga babaye, mga lalaki, ug kabataan—mapanalanginan uban sa gahom sa Dios sa pagkapari diha sa ilang mga panimalay sa paglig-on sa ilang kaugalingon ug sa ilang mga pamilya (tan-awa sa 3.5). Kini nga gahom makatabang sa mga miyembro sa paghimo sa buhat sa Dios sa kaluwasan ug kahimayaan sa ilang personal nga mga kinabuhi ug mga pamilya (tan-awa sa 2.2).
Ang mga lalaki nga naghupot sa Melchizedek nga Pagkapari makahatag og panalangin sa pagkapari ngadto sa mga sakop sa pamilya aron sa paghatag og direksyon, pag-ayo, ug paghupay. Kon gikinahanglan, ang mga miyembro sa Simbahan makahimo usab sa pagtinguha niini nga mga panalangin gikan sa mga sakop sa pamilya nga kabanay, sa tigpangalagad nga mga igsoong lalaki, o sa lokal nga mga lider sa Simbahan. Alang sa dugang nga impormasyon mahitungod sa mga panalangin sa pagkapari, tan-awa sa 18.13 ug sa 18.14.