Ol Tempol Rekomen

Ol prishud lida we oli gat raet blong gat ol tempol rekomen buk, oli mas lukaotemgud olgeta buk ia. I no gat wan moa we i save yusum olgeta. Taem we Jos i apdeitem ol tempol rekomen buk, ol lida oli sakemaot o bonem gud ol buk ia we oli nomo yusum.

Ol prishud lida oli meksua tu se ol pipol we oli no gat raet, oli no save luk o ridim ol infomesen blong tempol rekomen we i stap insaed long RLK.

Bisop i mas askem ol memba blong oli talemaot long hem kwiktaem sapos wan rekomen i lus, o oli stilim. Sapos memba ia i klin inaf yet, bisop o kaonsela we oli givim wok ia long hem o klak, bae i go insaed long LCR blong printim rekomen ia bakegen. Niufala rekomen bae i ekspae long semmak deit olsem orijinol deit.

Samtaem wan memba we i bin lusum o oli bin stilim rekomen blong hem, i nomo stap laef folem ol standet blong stap klin inaf. Long ol situesen olsem, bisop bae i kanselem rekomen blong olgeta kwiktaem (luk long 26.2.3).

Sapos bisop i faenemaot se wan memba we i gat wan rekomen i stap i no stap laef folem ol standet blong fasin blong stap klin inaf (luk long 26.3), hem i yusum RLK blong kanselem rekomen ia. Sapos i no gat kompiuta program ia i stap, bisop i kontaktem tempol ofis blong oli kanselem rekomen ia. Sapos wan memba i gat wan rekomen we oli printim, bisop bae i askem rekomen ia long memba ia.

Ol tempol rekomen blong ol proksi baptaes mo konfemesen, i givim raet long ol memba blong tekpat long ol baptaes mo konfemesen blong olgeta we oli ded. Oli save givim long ol memba we oli no endao yet be oli bin baptaes mo kasem konfemesen finis.

Ol memba we oli bin endao finis, oli no stap givim wan rekomen blong proksi baptaes mo konfemesen long olgeta.

Ol memba oli save kasem ol rekomen ia stat long Jenuware blong yia we bae oli kasem 12 yia long hem. Oli mas odenem wan man memba blong Jos, i go long wan prishud ofis, bifo hem i save kasem wan tempol rekomen.

Long wan wod, bisop o wan kaonsela we oli givim wok long hem, i intaviu ol memba we oli no endao blong oli kasem ol tempol rekomen blong ol proksi baptaes mo konfemesen. Long wan branj, branj presiden nomo i holem ol tempol rekomen intaviu. (Blong wan eksepsen, luk long 23.6.1.)

Lida we i stap mekem intaviu i folem ol gaedlaen we oli stap long 26.4. Oli no mas hariap blong mekem ol intaviu blong tempol rekomen. Oli ol praevet intaviu. Be, hem we oli stap intaviu long hem, i save invaetem papa o mama, o wan nara adalt blong i stap long taem ia.

Lida ia bae i givim wan rekomen tru long RLK sapos memba ia i klin inaf. Ol rekomen ia oli nidim nomo signeja blong memba, mo wan memba blong bisoprik o branj presiden.

Ol rekomen blong ol proksi baptaes mo konfemesen, oli mekem olgeta i laef taem wan memba blong bisoprik o branj presiden i mekem hemia tru long LCR .

Blong kasem infomesen abaot fasin blong stap givimaot rekomen long ol memba we oli stap rere blong kasem endaomen blong olgetawan, o blong oli sil long wan hasban o waef, sil long papa mo mama, o long ol pikinini, luk long 26.3.3.

Tempol rekomen blong olgeta memba we oli endao finis i givim raet long ol memba blong tekpat long evri tempol odinens blong olgeta we oli ded finis. Oli givim long ol memba we oli bin endao finis. (Blong ol memba we bae oli kasem endaomen blong olgetawan, luk long 26.3.3.)

Long wan wod, Bisop o wan kaonsela we oli asaenem, hem i mekem ol intaviu mo givimaot ol rekomen. Long wan branj, branj presiden nomo i mekem ol tempol rekomen intaviu mo givimaot ol rekomen.

Lida we i stap mekem intaviu i folem ol gaedlaen we oli stap long 26.4. Oli no mas hariap blong mekem ol intaviu blong tempol rekomen. Oli ol praevet intaviu. Be, hem we oli stap intaviu long hem, i save invaetem hasban o waef blong hem, papa o mama, o wan nara adalt blong i stap long taem ia.

Lida ia bae i givim wan rekomen tru long RLK sapos memba ia i klin inaf.

Afta long wan intaviu we memba blong bisoprik o branj presiden i mekem, wan memba blong stek presidensi i intaviu long man o woman ia we i stap long stek ia. Hem i saenem rekomen blong olgeta we oli klin inaf. Wan memba blong misin presidensi i holem wan nambatu intaviu blong ol memba we oli laef long wan distrik. Hem tu i saenem ol rekomen blong olgeta ia nomo we oli klin inaf. Wan distrik presiden i no holem ol intaviu blong tempol rekomen, be nomo, sapos Fas Presidensi i givim raet long hem.

Long ol stek, wan memba blong stek presidensi o wan stek klak i mekem tempol rekomen i laef insaed long RLK. Long ol distrik, wan memba blong misin presidensi o wan misin klak nao i mekem rekomen ia i laef long sistem.

Blong kasem infomesen abaot fasin blong stap givimaot ol tempol rekomen long ol memba we oli stap rere blong kasem endaomen, o blong oli sil long wan hasban o waef, sil long papa mo mama, o long ol pikinini, luk long 26.3.3.

Oli stap givimaot ol tempol rekomen blong ol odinens blong taem wan i laef, taem ol memba oli stap rere blong:

• Kasem endaomen blong olgetawan (luk long 27.2).

• Oli sil long hasban o waef blong olgeta (luk long27.3).

• Oli sil long papa mo mama blong olgeta (luk long 27.4).

• Oli silim ol pikinini blong olgeta i kam long olgeta (luk long 27.4).

Blong go insaed long tempol, ol memba we bae oli kasem 12 yia o moa long en blong yia we bae odinens ia i hapen long hem, oli mas gat rekomen blong proksi baptaes mo konfemesen, o wan rekomen blong ol memba we oli endao. Sapos i nidim, ol prishud lida oli save givim wan long ol rekomen ia mo rekomen blong ol odinens blong taem wan i laef, long taem blong semmak intaviu ia.

Bisop o branj presiden, mo stek presiden i intaviu long ol memba we oli stap rere blong kasem ol tempol odinens.

Long ol kes we i ejen, we bisop o stek presiden i no stap, hem i save givim raet long wan long ol kaonsela blong hem blong i holem ol intaviu ia. Long wan branj, branj presiden nomo i save mekem intaviu ia.

Long ol bigfala wod mo stek blong ol yang singgel adalt, ol bisop mo stek presiden oli save givim raet long ol kaonsela blong olgeta we oli gat eksperiens blong oli mekem ol intaviu ia.

Long wan distrik, misin presiden o wan kaonsela we hem i givimaot wok ia long hem i mekem ol intaviu ia. Ol distrik presiden oli no stap mekem ol intaviu ia be sapos nomo we Fas Presidensi i givim raet long olgeta blong givimaot ol tempol rekomen.

Lida we i stap mekem intaviu i folem ol gaedlaen we oli stap long 26.4. Oli no mas hariap blong mekem ol intaviu blong tempol rekomen. Oli ol praevet intaviu. Be, hem we oli stap intaviu long hem, i save invaetem hasban o waef blong hem, papa o mama, o wan nara adalt blong i stap long taem ia.

Bifo hem i givimaot wan rekomen blong taem wan i laef, bisop o branj presiden i luklukbak long rekod blong memba ia blong jekem sapos i no gat wan not i hang i stap abaot sam strong kondisen we i stap long Jos membasip blong memba ia. Hem i luklukbak tu long ol infomesen blong memba ia tru long Stap Rere from Ol Odinens insaed long RLK. Hem i saenem rekomen tru long sistem blong ol odinens blong taem wan i laef, sapos memba ia i klin inaf mo i rere blong kasem ol tempol odinens. Afta hem i givim i go long stek o misin presiden tru long Stap Rere from Ol Odinens insaed long RLK.

Afta bae stek presiden o wan memba blong misin presidensi, i intaviu long memba ia. Hem i saenem rekomen tru long sistem sapos memba ia i klin inaf mo i rere blong kasem ol tempol odinens. Afta bae hem i givim i go long tempol tru long Stap Rere from Ol Odinens insaed long RLK. Sapos i nidim, bae hem i saenem tu rekomen blong memba ia blong ol memba we oli endao (luk long 26.3.2).

Blong kasem infomesen abaot ol memba we oli stap rere blong kasem ol tempol odinens, luk long 27.1.1 mo 27.1.2.

Blong kasem infomesen abaot ol memba we oli stap rere blong kasem endaomen, luk long 27.2.

Blong kasem infomesen abaot ol memba we oli stap rere blong sil long wan hasban o waef, luk long 27.3.

Blong kasem infomesen abaot ol memba we oli stap rere blong sil i go long papa mo mama, luk long 27.4.

Luk long 27.4.5 mo 38.4.2 blong luk moa polisi long saed blong rod blong sil i go long papa mo mama, mo blong stap luk ol siling ia.

Sam memba oli stap laef long wan ples we i stap hemwan, we bae memba i spenem bigfala mane blong transpot, o bae i had tumas long memba blong mit wetem wan memba blong stek o misin presidensi. Long ol situesen olsem, wan memba blong stek o misin presidensi i save mit tugeta onlaen wetem memba ia blong mekem tempol rekomen intaviu (luk long 31.4).

Lida ia bae i givimaot rekomen, sapos memba ia i klin inaf. Sapos memba ia i askem wan rekomen we bae oli printim, wan memba blong bisoprik o branj presiden, i printim rekomen blong memba ia.

Polisi ia i go tu long ol memba long militeri, we oli stap long ol ples we i stap hemwan o i longwe tumas.

1. ?Yu yu gat fet long, mo yu yu gat wan testemoni abaot God, Papa we I No Save Finis; abaot Pikinini blong Hem, Jisas Kraes; mo abaot Tabu Spirit?

2. ?Yu yu gat wan testemoni abaot Atonmen blong Kraes mo wok blong Hem olsem Sevya mo Ridima?

3. ?Yu yu gat wan testemoni long saed blong Kambak blong gospel blong Jisas Kraes?

4. ?Yu yu sastenem Presiden blong Jos Ia blong Jisas Kraes blong Ol Lata-dei Sent olsem profet, sia mo reveleta, mo olsem wan man ia nomo long wol ia we i gat atoriti mo i gat raet blong yusum evri prishud ki?

   ?Yu yu sastenem ol memba blong Fas Presidensi mo Kworom blong Olgeta Twelef Aposol olsem ol profet, sia, mo reveleta?

   ?Yu yu sastenem ol nara Jeneral Atoriti mo ol lokol lida blong Jos?

5. Lod i bin talem se, evri samting, oli mas “mekem long klin fasin” long fored blong Hem ((Doktrin mo Ol Kavenan 42:41).

   ?Yu yu traehad blong stap laef long klin fasin long ol tingting mo long ol aksen blong yu?

   ?Yu yu stap obei long loa blong jastiti?

6. ?Yu yu stap folem ol tijing blong Jos Ia blong Jisas Kraes long ol praevet mo pablik aksen blong yu wetem ol memba blong famli blong yu, mo wetem ol nara man?

7. ?Yu yu stap sapotem o promotem eni tijing, praktis, o doktrin we i agensem hemia blong Jos Ia blong Jisas Kraes blong Ol Lata-dei Sent?

8. ?Yu yu stap traehad blong kipim Sabat dei i tabu, tugeta long hom mo long jos; yu stap go long ol miting blong yu; yu stap rere blong, mo yu stap klin inaf blong tekem mo kakae sakramen? ?Yu yu stap laef i stret wetem ol loa mo ol komanmen blong gospel?

9. ?Yu yu stap traehad blong stap ones long evri samting we yu stap mekem?

10. ?Yu yu stap pem ful taeting?

    Blong ol niu memba we oli stap wantem wan rekomen blong mekem ol baptaes mo konfemesen blong olgeta we oli ded: ?Yu yu wantem blong stap obei long komanmen ia blong pem taeting?

11. ?Yu yu andastanem mo stap obei long Tok blong Waes?

12. (Kwestin ia, oli no askem taem oli stap intaviu long ol pikinini o ol yut.) Yu yu gat sam mane o sam narafala samting we yu mas pem i go long hasban/waef blong yu blong fastaem, o yu yu gat eni mane blong pem long saed blong ol pikinini blong yu?

    Sapos yes, yu yu stap pem gud ol mane ia, o yu yu stap mekem ol samting we yu mas mekem long olgeta?

13. (Kwestin ia, oli no askem taem oli stap intaviu long ol pikinini o ol yut.) Yu yu stap kipim ol kavenan we yu bin mekem insaed long tempol?

14. (Kwestin ia, oli no askem taem oli stap intaviu long ol pikinini o ol yut.) Yu yu stap onarem tabu janis blong yu ia blong werem gamen olsem we oli bin givim instraksen long yu long taem we yu bin kasem odinens ia? (Ridim toktok ia, “Stap Werem Tempol Gamen” we i stap daon ia, i go long wanwan memba.)

15. ?I gat eni series sin, o nogud fasin insaed long laef blong yu we yu nidim blong stretem wetem ol prishud atoriti olsem pat blong yu blong sakem sin?

16. ?Yu yu ting se yu yu klin inaf blong go insaed long haos blong Lod mo tekempat long ol odinens blong tempol?

Fas Presidensi i bin givim gaed ia abaot fasin blong stap werem gamen:

“Ol gamen blong tabu prishud oli rimaenem yumi long vel we i stap insaed long tempol, mo vel ia hem i simbol we i ripresentem Jisas Kraes. Taem yu stap putum gamen blong yu, yu stap putum gamen ia olsem wan tabu saen blong Jisas Kraes. Blong stap werem ol gamen, hem i wan saen blong soemaot komitmen blong insaed blong yuwan blong folem Sevya Jisas Kraes. Ol gamen oli rimaenem yu tu, long ol tempol kavenan blong yu. Yu mas werem gamen long dei mo long naet long ful laef blong yu long wol ia. Taem yu karemaot gamen blong ol aktiviti we bae hem i no stret blong werem gamen, yu mas putum bak kwik taem afta we ol aktiviti i finis. Taem we yu kipim ol kavenan blong yu, we i tekem tu tabu janis ia blong werem gamen folem ol instraksen we oli givim longtaem yu mekem odinens ia blong fastaem, bae yu kasem bigfala akses long bigfala sore,proteksen mo paoa we i kam long Sevya.”

Sapos ol memba oli gat ol kwestin abaot fasin blong stap werem gamen, gaedem olgeta i go long 38.5.

Prishud lida i talemaot long memba, hamas hem i impoten blong memba ia i kipim rekomen blong hem i stap sef oltaem. Neva bae oli mas givim long wan narawan, mo oli mas ripotem kwiktaem long huia i givim rekomen, sapos tempol rekomen i lus o oli stilim.

Bisop i intaviu long ol niu memba we oli olfala inaf blong kasem wan tempol rekomen blong mekem ol proksi baptaes mo konfemesen (luk long 26.3.1). Hem i mekem intaviu ia stret afta long konfemesen blong memba, we plante taem, hem i afta wan wik. Blong ol brata, intaviu ia we oli holem i save pat blong intaviu blong kasem Aronik Prishud. Wan bisop o branj presiden i save givim wok long wan long ol kaonsela blong hem blong mekem intaviu ia. Ol memba blong Jos we oli ol man, oli mas odenem olgeta long wan ofis long prishud bifo hem i kasem wan tempol rekomen.

Long taem blong intaviu, bisop i save askem blong yusum Family Name Assist blong helpem wan niu memba blong hem i printim nem blong wan memba blong famli blong hem we i ded, we bae niufala memba ia i save mekem ol tempol odinens long bihaf blong famli we i ded (luk long “Family Name Assist” long 25.4.1).

Ol adalt memba we oli klin inaf, oli save kasem endaomen blong olgeta afta wan ful yia we oli bin konfem i kam wan memba blong Jos (luk long 27.2.1.1). Ol prishud lida oli meksua se deit we memba bambae i kasem endaomen, i mas wan ful yia afta long deit blong konfemesen, be i no deit blong baptaes. Fas Presidensi nomo i save givim raet blong ol eksepsen.

Bifo wan yang misinari we i mekem seves blong hem longwe long hom i finisim seves blong hem, misin presiden i holem wan tempol rekomen intaviu wetem hem. Sapos misinari ia i klin inaf, hem i givimaot wan rekomen. Misin presiden i putum deit mo i mekem rekomen ia i laef blong mekem se bae i finis tri manis afta long deit ia we misinari i gobak hom.

Bisop i intaviu ol riten misinari blong i givimaot wan niu tempol rekomen kolosap long en blong ol trifala manis ia. Long kes we i ejen, we bisop i no stap, hem i save givim raet long wan long ol kaonsela blong hem blong lidim ol intaviu ia.

Long ol bigfala wod blong ol yang singgel adalt, ol bisop oli save givim raet long ol kaonsela blong olgeta we oli gat eksperiens blong oli holem ol intaviu ia.

Afta long hemia, ol riten misinari oli mit wetem wan memba blong stek blong stek presidensi blong olgeta blong hem i kasem wan intaviu blong tempol rekomen.

Long ol intaviu ia blong tempol rekomen, bisop mo wan memba blong stek presidensi oli luklukbak long kaonsel we oli bin givim long misinari long taem blong rilis intaviu blong hem (luk long 24.8.2). Oli toktok raon long progres, mo gudlaef blong riten misinari ia, mo wanem koling hem i gat i stap. Mo tu, oli leftemap tingting blong hem blong gohed long longfala rod ia blong laef blong groap long saed blong spirit, mo long saed blong seves.

Sapos riten misinari ia i no gat wan koling long Jos, bisop mo stek presiden i mekemsua se oli givim wan long hem. Oli save sendem nem blong ol riten misinari blong oli mekem wok olsem ol odinens wokman long tempol, sapos i gat wan tempol i stap kolosap (luk long 25.5).

Sapos wan memba i no bin laef long semfala wod oltaem blong wan ful yia, nao bisop i luklukbak long rekod blong memba ia blong jekem se i no gat wan not we oli putum abaot samfala strong kondisen long Jos membasip long rekod blong memba ia.

Bisop o wan kaonsela we hem i givim wok ia long hem, i kontaktem bisop blong las wod we memba i bin stap long hem, bifo hem i holem wan intaviu blong tempol rekomen. Sapos wan kaonsela i faenemaot se i gat konfidensiol infomesen i stap, nao hem i stopem storian ia. Hem i talemaot long bisop blong hem blong kontaktem bisop blong fastaem bifo hem i mekem intaviu.

Bisop mo stek presiden i save filim blong mas intaviu long wan memba we i bin divos, o i bin seperet folem loa, o i mekem se oli kanselem mared blong hem stat long las taem we hem i kasem wan tempol rekomen. Long taem blong intaviu ia, oli helpem memba ia blong hem i kam strong long saed blong spirit. Mo tu, oli jekem se memba ia i bin gohed blong stap klin inaf blong go long tempol.

Ol bisop mo ol kaonsela blong olgeta oli mas lukaotgud taem oli stap givimaot ol rekomen long ol memba we famli blong olgeta, o ol nara famli we oli kolosap long olgeta oli stap agensem Jos, o oli pat blong ol grup we oli stap mekem apostasi. Ol memba we oli stap long ol situesen ia, oli no mas mekem se oli filim se oli no save gat wan tempol rekomen from wei we famli blong olgeta oli joen long sam grup. Oli mas leftemap tingting blong olgeta blong oli holemtaet wan rilesensip blong lav wetem ol famli ia blong olgeta. Oli save givim wan tempol rekomen long olgeta sapos oli ansarem evri kwestin blong tempol rekomen long wan fasin we i stret mo wetem tru mo ones fasin.

Ol tempol odinens oli kasem folem seks we wan i gat taem hem i bon i kam long wol ia. Ol memba we oli klin inaf, mo oli no tekem meresin, o oli no kasem operesen, o oli no gat sosol jenis long laef blong olgeta we i mekem olgeta i defren long seks we oli bon wetem, oli save kasem wan tempol rekomen mo ol odinens blong tempol. (Blong kasem mining blong gat sosol jenis long laef, luk long 38.6.23.)

Ol memba we oli bin tekem ol step blong jenis i go long nara seks be afta oli jenisim olgeta i gobak long seks we oli bon wetem, mo oli klin inaf mo oli komitim olgetawan blong stap obei long ol komanmen blong God, oli save kasem wan tempol rekomen mo ol odinens blong tempol.

Ol bisop oli kaonsel wetem stek presiden blong tokbaot wanwan situesen wetem bigfala kea, mo wetem lav blong Kraes. Ol stek mo misin presiden oli mas lukaotem kaonsel we i kam long Eria Presidensi.

Blong kasem moa infomesen, luk long 38.6.23

Wan memba we i bin mekem wan series sin, bae i no save kasem wan tempol rekomen kasem taem we hem i sakem sin blong hem (luk long 32.6). Taem blong wet bitwin taem we hem i mekem sin mo taem we bae oli givim wan rekomen long hem, bae i dipen nomo long tingting blong bisop mo stek presiden. Bae hem i longtaem inaf blong faenemaot sapos man o woman ia i bin sakem sin long wan tru fasin.