Tuufaatasia o Aiga mo le Faavavau e ala i le Galuega o malumalu ma Talafaasolopito o Aiga

E filimaoti e tagata o le au paia mo i latou lava pe o afea ma pe o le a le tele e tapuai ai i totonu o le malumalu. E le faatuina e taitai se sini faafuainumera po o se faiga e lipoti ai le tapuai i le malumalu.

E mafai e tagata taitoatasi o le ekalesia ma aiga o loo i ai pepa faataga o aoga o le malumalu, ona auai i soo se malumalu latou te mananao ai. E mafai ona latou faia se taimi faatulagaina ma le malumalu. Tagai i le temples.ChurchofJesusChrist.org mo faamatalaga e faafesootai ai malumalu taitasi.

Ua tofia iunite taitasi o le Ekalesia i se itulagi o i ai se malumalu. E le fautuaina ni malaga faatulagaina faaleuarota i malumalu i fafo atu o le itulagi ua atofa i ai le malumalu.

O malaga uma i le malumalu a uarota ma siteki e tatau ona faatulagaina faatasi ma le malumalu. Tagai i le temples.ChurchofJesusChrist.org mo faamatalaga e faafesootai ai malumalu taitasi.

O le au epikopo e faamaopoopoa ma au peresitene o le korama a toeaina ma le Aualofa a o latou taimua i taumafaiga a le uarota mo le malumalu ma talafaasolopito o aiga, ia e fesoasoani e tuufaatasia ai aiga mo le faavavau. E fefautuaai faatasi e le aunoa nei taitai.

Ua i ai foi i le au epikopo tiutetauave faaopoopo nei.

• Iloilo ma faamaonia le fuafuaga a le uarota mo le malumalu ma talafaasolopito o aiga (tagai i le 25.2.6).

• E faamautinoa o loo faamaopoopo i fonotaga a le aufono a le uarota ma fonotaga a le aufono a le autalavou taumafaiga o le malumalu ma talafaasolopito o aiga.

• E vaavaaia le faatulagaga o kosi o tapenaga mo le malumalu (tagai i le 25.2.8).

• E tuuina atu pepa faataga o le malumalu, (tagai i le mataupu 26).

E feutagai le au epikopo ma le peresitene o le siteki, e filimaoti ai pe valaau se taitai o le uarota mo le malumalu ma talafaasolopito o aiga (tagai i le 25.2.3 mo nisi faamatalaga).

O au peresitene o le korama a toeaina ma le Aualofa e taimua i taumafaiga mo malumalu ma talafaasolopito o aiga i lea aso-ma-lea-aso ia e fesoasoani ai ia tuufaatasia aiga mo le faavavau (tagai i le 8.2.4 ma le 9.2.4). O le au peresitene o le korama a toeaina e taitaia nei taumafaiga mo sui auai o le korama a toeaina. O le au peresitene o le Aualofa e taitaia nei taumafaiga mo sui auai o le Aualofa. Latou te galulue faatasi e taitai nei taumafaiga faatasi ma le aufono a le uarota, i lalo o le faamaopoopoga a le epikopo.

Ua i ai i nei taitai tiutetauave nei:

• Fesoasoani i le aufono a le uarota e atina’e ma faatino le fuafuaga mo le malumalu ma talafaasolopito o aiga i le uarota (tagai i le 25.2.6

• Fai atu i se faufautua o malumalu ma talafaasolopito o aiga a le uarota e fesoasoani i tagata faapitoa o le uarota e saili ma saunia igoa o tuaa ua maliliu mo sauniga o le malumalu (tagai i le 25.4.1). O nei taumafaiga e taulai faapitoa atu ia i latou o e na maua talu ai nei valaauga faamisiona ma i latou e lei maua faaeega paia.

• Faamautinoa o loo fuafua ma lipotia taumafaiga o le malumalu ma talafaasolopito o aiga i fonotaga a le aufono a le uarota ma fonotaga faamaopoopo o le malumalu ma talafaasolopito o aiga.

• Taitaia le galuega a le taitai o le malumalu ma talafaasolopito o aiga i le uarota. Afai e lei valaauina lenei taitai, o se tasi o le au peresitene o le korama a toeaina e faatinoina lenei matafaioi (tagai i le 25.2.3).

• I nofoaga e tatau i ai, tofi ni faufautua o malumalu ma talafaasolopito o aiga i le uarota, e galulue i le nofoaga autu o le FamilySearch (tagai i le 25.3.6).

E taufai tofi e le peresitene o le korama a toeaina ma le peresitene o le Aualofa se tasi o le au peresitene e fesoasoani e taitai le galuega o le malumalu ma talafaasolopito o aiga i le uarota. E galulue faatasi sui nei e toalua o au peresitene. Latou te faamautinoa o faia fonotaga faamaopoopo o malumalu ma talafaasolopito o aiga (tagai i le 25.2.7).

E feutagai le epikopo ma le peresitene o le siteki, e filimaoti ai pe valaau se taitai o le malumalu ma talafaasolopito o aiga i le uarota. Afai e tonu ia i laua e tuuina atu lenei valaauga, e fefautuaai le au epikopo ma peresitene o le korama a toeaina ma le Aualofa e filima’oti ai pe o ai e valaau. O lenei tagata e tatau lava o sē e umia le Perisitua Mekisateko. Afai e le’i valaauina lenei taitai, o se tasi o le au peresitene o le korama a toeaina e faatinoina lenei matafaioi.

O le taitai mo le malumalu ma talafaasolopito o aiga a le uarota e lagolagoina le au peresitene o le korama a toeaina ma le Aualofa i o latou tiutetauave o le malumalu ma talafaasolopito o aiga. Ua ia te ia foi tiutetauave nei:

• E faamaopoopoina faatasi ma taitai o faalapotopotoga o le uarota ia taumafaiga mo malumalu ma talafaasolopito o aiga, e aofia ai ia au peresitene o korama ma vasega a le autalavou.

• E taitaia fonotaga faamaopoopo o le malumalu ma talafaasolopito o aiga (tagai i le 25.2.7).

• E auai i fonotaga a le aufono a le uarota pe a valaaulia ai.

• Fesoasoani i le aufono a le uarota e atina’e ma faatino le fuafuaga mo le malumalu ma talafaasolopito o aiga i le uarota (tagai i le 25.2.6).

• E aoaoina ia faufautua mo malumalu ma talafaasolopito o aiga a le uarota. Faamaopoopo a latou taumafaiga e fesoasoani i tagata o le ekalesia e sue igoa o tuaa ma faatino sauniga o le malumalu mo i latou.

• E galulue faatasi ma le taitai misiona a le uarota ma faifeautalai e fesoasoani ai ia i latou o loo aoaoina le talalelei, o tagata fou [o le ekalesia], ma tagata ua toe foi mai ia punouai i le galuega mo malumalu ma talafaasolopito o aiga (tagai i le 23.2 ma le 23.3).

O faufautua mo malumalu ma talafaasolopito o aiga a le uarota, e galulue i lalo o le taitaiga a le taitai mo le malumalu ma talafaasolopito o aiga a le uarota. E valaauina e le au epikopo nei tagata o le au paia e galulue. E mafai ona valaauina tagata matutua ma le autalavou. E mafai e peresitene o le korama a toeaina, Aualofa, ma Tamaitai Talavou ona fautuaina atu po o ai e mafai ona auauna atu.

E aoao atu e faufautua isi i ni auala faigofie i le auala e auai ai i galuega o le malumalu ma talafaasolopito o aiga ia e tuufaatasia ai aiga mo le faavavau. Latou te taulai faapitoa atu i le autalavou, tagata fou ma tagata ua toe foi mai, ma tuafafine ma tuagane e le’i maua faaeega paia. Ua i ai i faufautua ia tiutetauave nei:

• E fesoasoani i tagata o le au paia ia saunia mo le mauaina o sauniga ma osia feagaiga o le malumalu.

• Fesoasoani i tagata ia maua aafiaga o faamanuiaga o le iloa o o latou tuaa ma faatinoina ia sauniga o le malumalu mo i latou.

• E auai i fonotaga faamaopoopo o malumalu ma talafaasolopito o aiga (tagai i le 25.2.7).

• E galue i se nofoaga autu o le FamilySearch i le lotoifale pe a tofia ai (tagai i le 25.3.6).

O punaoa e fesoasoani ai i faufautua o malumalu ma talafaasolopito o aiga o loo lisiina i le 25.4.1 ma le 25.4.2.

E atiina ae ma le agaga tatalo e sui o le aufono a le uarota se fuafuaga mo le malumalu ma talafaasolopito o aiga i le uarota. Mo faamatalaga e uiga i le fuafuaga, tagai i le 25.2.6.

E mafai e le epikopo ona valaaulia le taitai o le malumalu ma talafaasolopito o aiga a le uarota e auai atu i fonotaga a le aufono a le uarota.

Ua i ai i sui auai o le aufono a le uarota ia tiutetauave nei:

• Fesoasoani i tagata taitoatasi o le au paia e saunia e osia feagaiga ma le Atua e ala i le mauaina o sauniga o le malumalu (tagai i le 27.1).

• Fautuaina talavou uma ma tagata matutua o le ekalesia, e aofia ai tagata fou, ia i ai se pepa faataga o le malumalu o loo aogā (tagai i le 26.0).

• Fautuaina tagata o le au paia e tapuai i totonu o le malumalu i le tele e mafai ona faatagaina ai e o latou tulaga.

• Valaaulia tagata taitoatasi ma aiga e aoao le aoaoga faavae ma faamanuiaga o le auai i le galuega o le tuufaatasia o aiga mo le faavavau. O lenei galuega e aofia ai le aoao e uiga i tuaa ma le faatinoina o sauniga o le malumalu mo i latou.

• Lagolago matua i le aoaoina o a latou fanau i le aoaoga faavae o le galuega o le tuufaatasia o aiga mo le faavavau. O lenei mea e aofia ai faamanuiaga o feagaiga ma sauniga o le malumalu ma le faatinoina o sauniga o le malumalu mo o latou tuaa ua maliliu.

• Aoao atu e le aunoa mataupu faavae o lenei galuega i le taimi o sauniga a le Ekalesia.

Tagai i le mataupu 26 mo faamatalaga e uiga i pepa faataga o le malumalu.

E tatau i uarota taitasi ona i ai se fuafuaga faigofie mo le malumalu ma talafaasolopito o aiga. E fesoasoani lenei fuafuaga i tagata o le uarota, e aofia ai tamaiti ma le autalavou, e saunia e tapuai i le maota o le Alii ma auai i le galuega o talafaasolopito o aiga i le tele o taimi e faatagaina ai e o latou tulaga.

E fesoasoani ia peresitene o le korama a toeaina ma le Aualofa i le aufono a le uarota e atia’e le fuafuaga. E fesoasoani ai foi le taitai o malumalu ma talafaasolopito o aiga. I le atiina a’e o le fuafuaga, latou te:

• Mafaufau ma le agaga tatalo i manaoga o tagata o le au paia ma punaoa o loo maua.

• Faailoa faatinoga e fai i le aluga o le tausaga.

• Filimaoti pe faapefea ona faatino le fuafuaga ma fai ia tofitofiga e tusa ai.

O loo lisi atu i lalo ia faataitaiga o mea e ono aofia ai i le fuafuaga:

• Fesoasoani i tagata patino ia malamalama i faamanuiaga o le tapuai i le maota o le Alii.

• Fesoasoani i tagata o le ekalesia ia saunia mo le mauaina o faamanuiaga o sauniga o le malumalu.

• Fesoasoani i tagata o le ekalesia e faaaoga le Sauniga ua Saunia e ave ai le igoa o se tuaa i le malumalu (tagai i le 25.4.1).

• Fesoasoani i tagata o le ekalesia e faaaoga le uepisaite o le FamilySearch po o le polokalama e faaopoopo ai mea latou te iloa e uiga i tauaiga ua maliliu o e manaomia sauniga (tagai i le 25.4.1).

• Faaaofia ia tagata fou ma tagata ua toe foi mai, autalavou, ma tamaiti i le galuega o talafaasolopito o aiga. O le Igoa Lagolago o le Aiga o se auala faigofie lea mo taitai e fesoasoani ai i nei tagata e saunia igoa o aiga ia maua sauniga (tagai i le 25.4.1).

• Fesoasoani i tamaiti Peraimeri ia saunia e maua se pepa faataga o le malumalu ma tapuai soo i le maota o le Alii i nofoaga e mafai ai. E tatau i le au peresitene o le Peraimeri ona faia se Sauniga Sauniuni mo le Malumalu ma le Perisitua i tausaga taitasi (tagai i le 12.1.7 ma le 12.2.4).

E le tatau i le fuafuaga o le malumalu ma talafaasolopito o aiga a le uarota ona faatulaga ni aofaiga po o ni faiga e lipoti atu ai mo tapuaiga i le malumalu (tagai i le 25.1.1).

O le epikopo na te iloiloina ma faamaoniaina le fuafuaga. E taulamua tagata o le aufono a le uarota i le faatinoina o le fuafuaga. Latou te lipoti atua le alualu i luma i fonotaga a le aufono a le uarota. Latou te faia foi faafouga i le fuafuaga pe a manaomia ai.

2:49

E faia e le aunoa ni fonotaga puupuu faamaopoopo, faasamasamanoa mo le malumalu ma talafaasolopito o aiga o le uarota. E faatautaia e le taitai o malumalu ma talafaasolopito o aiga nei fonotaga.

O isi e valaaulia e aofia ai:

• O sui ua tofia o au peresitene o le Aualofa, korama a toeaina, ma le Peraimeri.

• O se fesoasoani i le korama a ositaulaga (po o le peresitene o le korama a a’oa’o po o tiakono, pe afai e leai ni ositaulaga i le uarota).

• Se tasi o le au peresitene o le vasega aupito matutua o Tamaitai Talavou.

• Faufautua mo malumalu ma talafaasolopito o aiga.

O i latou uma e auai, e aofia ai le autalavou, e fefautuaai faatasi o ni tagata auai e tutusa aiā. O nei fonotaga e taulai atu i manaoga o tagata taitoatasi ma le auala e mafai ona faamanuiaina ai i latou a o latou auai i galuega o le malumalu ma talafaasolopito o aiga. Latou te taulai faapitoa atu i le autalavou, tagata fou ma tagata ua toe foi mai, ma tuafafine ma tuagane e le’i maua faaeega paia. O fonotaga e masani lava ona aofia ai autu nei:

• Auala e faatino ai le fuafuaga a le uarota mo le malumalu ma talafaasolopito o aiga (tagai i le 25.2.6).

• Auala e fesoasoani ai i tagata patino o le uarota e saunia ia maua sauniga o le malumalu.

• Auala e fesoasoani ai i tagata patino o le uarota ia latou taumafaiga mo malumalu ma talafaasolopito o aiga.

E mafai ona faia nei fonotaga faafesagai pe i nofoaga vava mamao. E mafai foi ona faia le faamaopoopoga i nisi auala, e aofia ai le valaau i le telefoni, po o tesi faalevaega.

Taumafai malosi e mulimuli i mataupu faavae o le faatinoga ma le tali atu mo oe lava ia i le 4.4.5. E mafai ona tofia se tagata i le fonotaga e tusifaamaumau ma faamanatu atu i le vaega ia faatinoga fuafuaina.

E mafai e paranesi laiti ona filifili e faia a latou faamaopoopoga o malumalu ma talafaasolopito o aiga i le aufono a le paranesi.

I lalo o le taitaiga a le epikopo, e mafai ona faatulaga se vasega sauniuni mo le malumalu e fesoasoani ai i tagata ia saunia e osia feagaiga a o latou mauaina sauniga o le malumalu. O nei vasega e faia i fafo mai o sauniga masani o le Aso Sa i se taimi e faigofie mo tagata o le au paia. E mafai ona faia i se falelotu po o se fale o se aiga.

E filifili ma le agaga tatalo e sui auai o le aufono a le uarota ia tagata e valaaulia e auai i vasega taitasi. O vasega nei e faapitoa le aoga mo tagata nei:

• Tagata fou o le Ekalesia

• Tagata o loo sauniuni e maua o latou lava faaeega paia pe faamauina foi

• O tagata ua toe malolosi mai i le Ekalesia

• O tagata ua uma ona maua faaeega paia ae le’i faafouina o latou pepa faataga o le malumalu mo se taimi umi

E tofia e le au epikopo se faiaoga se toatasi pe sili atu mo sauniuniga mo le malumalu. O lesona ma faatonuga mo le faatulagaina o le kosi o loo maua i le Faaeeina mai Luga: Tusi Lesona a le Faiaoga o le Semina Sauniuni o le Malumalu.. O tagata auai e tuuina atu i ai kopi o le Saunia e Ulufale Atu i le Malumalu Paia. Mo suesuega a le tagata lava ia ma punaoa o lesona, tagai i le temples.ChurchofJesusChrist.org.

E umia e le peresitene o le siteki ia ki mo le galuega a le Atua mo le faaolataga ma le faaeaga i le siteki. Ua ia te ia ma ona fesoasoani tiutetauave nei e fesoasoani ai e tuufaatasia aiga mo le faavavau:

• Fesoasoani i tagata o le au paia ia saunia e osia feagaiga paia a o latou mauaina sauniga o le malumalu (tagai i le 27.1).

• Fautuaina tagata uma o le ekalesia, aemaise lava tuafafine ma tuagane nofofua ma i latou e le’i maua faaeega paia, ia i ai se pepa faataga o aogā ma tapuai i le maota o le Alii i le tele e mafai ai e o latou tulaga.

• Ia mautinoa o le aoaoga faavae ma faamanuiaga o le tuufaatasia o aiga mo le faavavau (e pei ona faamatalaina i le 1.2.4) e aoaoina e le aunoa i sauniga a le siteki.

• Fautuaina tagata o le au paia e aoao e uiga i o latou tuaa ma faatino ia sauniga o le malumalu mo i latou.

• Faatautaia faatalanoaga o pepa faataga o le malumalu (tagai i le mataupu 26).

I lana fonotaga masani ma peresitene taitasi o korama a toeaina, e talanoaina ai e se tasi o le au peresitene o le siteki ia taumafaiga a le uarota e tuufaatasia aiga mo le faavavau e ala i galuega o le malumalu ma talafaasolopito o aiga (tagai i le 8.3.1). E mafai ona auai ai ia fesoasoani i le au peresitene o le korama a toeaina ma le fautua maualuga na tofia i le korama.

O le komiti o le au taitai matutua a le siteki e aofia ai:

• Le au peresitene o le siteki.

• Le au peresitene o le Aualofa a le siteki.

• Fautua maualuga ua tofia e galulue ma korama a toeaina.

O taitai nei e aoao ma lagolagoina au peresitene o le korama a toeaina ma le Aualofa i o latou tiutetauave mo taumafaiga o le malumalu ma talafaasolopito o aiga (tagai i le 25.2.2). O a’oa’oga e mafai ona faia i se faatulagaga o se vaega po o tagata taitoatasi. E mafai ona valaaulia taitai o le malumalu ma talafaasolopito o aiga a le uarota ia maua lenei a’oa’oga.

Mo nisi faamatalaga e uiga i fonotaga a lenei komiti, tagai i le 29.3.8.

E mafai e le au peresitene o le siteki ona tofia fautua maualuga e aoao atu ma lagolago tagata nei i a latou taumafaiga e tuufaatasia aiga mo le faavavau e ala i galuega o le malumalu ma talafaasolopito o aiga:

• Au peresitene o korama a toeaina

• Taitai mo malumalu ma talafaasolopito o aiga a le uarota

• Faufautua mo malumalu ma talafaasolopito o aiga i le siteki

• Taitai faamaopoopo o le nofoaga autu o le FamilySearch

E mafai ona tofia se fautua maualuga se toatasi pe sili atu e taitaia nei taumafaiga. Peitai, ua i ai i fautua maualuga uma nei tiutetauave mo uarota ma korama ua tofia i ai i latou.

E mafai ona fesoasoani ia fautua maualuga i au peresitene o korama a toeaina ma taitai o le malumalu ma talafaasolopito o aiga e aoao faufautua o le malumalu ma talafaasolopito o aiga a le uarota. E mafai ona lagolagoina ia fautua maualuga e le au faufautua o malumalu ma talafaasolopito o aiga a le siteki.

E mafai ona tofia e le au peresitene o le siteki se fautua maualuga e faamaopoopoa ia taumafaiga faavolenitia a le siteki mo talafaasolopito o aiga (tagai i le 25.4.3). E mafai ona tofia o ia po o se isi fautua maualuga e vaavaaia le galuega i nofoaga autu o le FamilySearch (tagai i le 25.3.6).

I lalo o le taitaiga a le peresitene o le siteki, o le au peresitene o le Aualofa a le siteki e aoaoina ma lagolago i au peresitene o Aualofa i uarota i o latou tiutetauave mo taumafaiga o le malumalu ma talafaasolopito o aiga (tagai i le 9.2.4).

O faufautua a le siteki mo le malumalu ma talafaasolopito o aiga e lagolagoina taumafaiga o le malumalu ma talafaasolopito o aiga i le siteki atoa. Latou te galulue i lalo o le taitaiga a le au peresitene o le siteki ma se toatasi pe sili atu foi o fautua maualuga e tofia i taumafaiga o le malumalu ma talafaasolopito o aiga.

E lagolago atu nei faufautua i fautua maualuga ma le au peresitene o le Aualofa a le siteki ia latou taumafaiga e aoao taitai o le uarota i taumafaiga o le malumalu ma talafaasolopito o aiga (tagai i le 25.3.3 ma le 25.3.4). E mafai foi ona tuu atu i ai tofitofiga nei:

• Fesoasoani e a’oa’o atu ma lagolago ia tagata o le uarota i o latou valaauga mo le malumalu ma talafaasolopito o aiga.

• Fesoasoani e faamaopoopo taumafaiga volenitia (tagai i le 25.4.3).

• E galue i nofoaga autu o le FamilySearch (tagai i le 25.3.6).

Afai o maua punaoa, e mafai e le siteki ona faatulaga se nofoaga autu se tasi pe sili atu o le FamilySearch. E tatau ona fesoasoani nei nofoaga autu i e asiasi atu i ai ia maua ai, faaputuputu mai faamatalaga e uiga i, ma tuufaatasia ai tauaiga o soifua ma e ua maliliu e ala i sauniga o le malumalu. Soo se tasi lava e mafai ona faaaogaina nei nofoaga tutotonu.

E valaauina e le peresitene o le siteki se taitai faamaopoopo o le nofoaga autu o le FamilySearch e vaavaaia taumafaiga i nofoaga autu taitasi o le FamilySearch. O nofoaga autu taitasi e masani ona faafaigaluega ai le au faufautua a siteki ma uarota mo malumalu ma talafaasolopito o aiga. E tatau ona tatala ia nofoaga autu o le FamilySearch i taimi talafeagai. E mafai e nofoaga autu o le FamilySearch e latalata i malumalu ona fetuunai a latou taimi faatulagaina ina ia ogatasi ma taimi faatulagaina o le malumalu i le lotoifale.

E avea o se tuusaunoaga, o nisi o nofoaga autu tetele o le FamilySearch e vaaia e Au Peresitene o Eria.

O le taitai faamaopoopo o le nofoaga autu o le FamilySearch e faatulagaina le faagaoioiga i aso taitasi o le nofoaga autu o le FamilySearch. E galue o ia i lalo o le taitaiga a le peresitene o le siteki po o se fautua maualuga ua tofia. O tiutetauave e mafai ona aofia ai tiutetauave o loo lisiina i lalo:

• Fesoasoani i tagata o le ekalesia e saunia igoa o aiga ina ia mafai ona latou faatinoina sauniga i le maota o le Alii.

• Faamaopoopo gaoioiga a le nofoaga autu e fesoasoani ai i tagata o le Ekalesia ma tagata asiasi mai i le alalafaga ia iloa o latou tuaa.

• Galulue faatasi ma (1) le fautua maualuga ua tofia e lagolagoina galuega o malumalu ma talafaasolopito o aiga ma le (2) tagata tomai faapitoa mo tekinolosi a le siteki e faafetaiaia manaoga o le faagaoioiga o le nofoaga autu ma tausia ona punaoa.

O le Taiala o le Faagaoioiga o le Nofoaga Autu o le FamilySearch e tuuina mai ai le taitaiga i le auala e faagaoioia ai se nofoaga autu o le FamilySearch.

E mafai e Au Peresitene o Eria ona valaauina faufautua o malumalu ma talafaasolopito o aiga i le eria. Afai e faatagaina e tulaga, e mafai ona valaauina se tagata se toatasi po o se ulugalii e toatasi mo aufono faamaopoopo taitasi. E masani ona auauna atu faufautua mo le tolu i le lima tausaga.

E mafai ona tofia se faufautua o le eria o se tagata po o se ulugalii e lagolagoina taumafaiga a isi faufautua o le eria ua tofia i aufono faamaopoopo i le eria.

E mafai e le Au Peresitene o le Eria ona tofia Fitugafulu Eria e faamaopoopo le galuega a nei faufautua i aufono faamaopoopo. E tatau ona ogatusa le galuega a faufautua ma le taulaiga a le eria.

E pei ona faatonuina ai e le Au Peresitene o le Eria po o se Fitugafulu Eria ua tofia, e fesoasoani faufautua i peresitene o siteki e faataunuu o latou tiutetauave e fesoasoani e tuufaatasia aiga mo le faavavau e ala i galuega o le malumalu ma talafaasolopito o aiga (tagai i le 25.3.1). E fesoasoani faufautua i peresitene o siteki i le aoaoina o tagata o loo auauna atu i valaauga nei e uiga i o latou tiutetauave:

• Fautua maualuga

• Au peresitene o Aualofa a Siteki

• Komiti o le au taitai matutua a le siteki

• Faufautua mo malumalu ma talafaasolopito o aiga i le siteki

• Taitai faamaopoopo o le nofoaga autu o le FamilySearch

E mafai ona tofia faufautua e fesoasoani i au peresitene o siteki e saunia tagata mo tapuaiga i malumalu fou ua faasilasila atu i totonu o le eria. O isi tiutetauave e ono aofia ai le aoaoina o taitai o le siteki i mataupu faavae ma faiga masani o galuega o le malumalu ma talafaasolopito o aiga. E aofia ai tulaga nei:

• Auala e fesoasoani ai i tagata o le ekalesia i o latou aafiaga muamua i papatisoga sui i le malumalu (tagai i le 23.2).

• O le auala e fesoasoani ai i tagata o le ekalesia o loo sauniuni e maua o latou lava faaeega paia pe faamauina (tagai i le 25.2.8, 27.2, 27.3, ma le 27.4).

• Auala e faatulaga ai galuega o malumalu ma talafaasolopito o aiga i siteki ma uarota (tagai i le 25.2).

• Auala e lagolago ai au peresitene o korama a toeaina ma le Aualofa i o latou tiutetauave (tagai i le 25.2.2).

• O le auala e mafai ai e lenei galuega ona faamanuiaina tamaiti ma le autalavou (tagai i le 10.2.4, 11.2.4, ma le 12.2.4).

• Auala e faia ai fonotaga faamaopoopo lelei (tagai i le 25.2.7).

• Auala e fesoasoani ai i taitai o le uarota e faavae se fuafuaga mataalia mo malumalu ma talafaasolopito o aiga a le uarota (tagai i le 25.2.6).

Mo faatonuga e faatatau i lenei galuega, tagai i le Faatonuga mo Taitai o malumalu ma Talafaasolopito o Aiga.

Ua saunia e le FamilySearch ia punaoa e fesoasoani ai i tagata o le au paia e faailoa ma saunia igoa o aiga ina ia mafai ai ona latou auai i sauniga mo o latou augatuaa ua maliliu. O nei sauniga e tuufaatasia ai aiga mo le faavavau. O punaoa a le FamilySearch e aofia ai mea nei:

• FamilySearch.org. O le uepisaite lea a le Ekalesia e fesoasoani ai i tagata o le ekalesia e su’e ma saunia igoa o o latou augatuaa mo sauniga o le malumalu.

• Polokalama o le Gafa o le Aiga. O le tele o matafaioi o le uepisaite o le FamilySearch o loo maua foi i lenei polokalama feaveai.

• Sauniga ua Saunia. O lenei meafaigaluega e maua ai se auala faigofie e maua ai aiga po o isi igoa e ave i le malumalu. O loo maua uma i le FamilySearch.org ma i le polokalama o le Gafa o le Aiga.

• Fesoasoani o le Igoa o le Aiga. E faaaoga e taitai lenei meafaigaluega i luga o le initoneti e fesoasoani ai i tagata fou ma tagata ua toe foi mai, faapea foi ma le autalavou, ia faigofie ona saunia ma lolomi kata o igoa faaleaiga mo papatisoga ma faamauga sui.

• Polokalama o Manatuaga. O lenei polokalama feaveai e fesoasoani i tagata taitoatasi ma aiga ia iloa, faasoa, ma faasaoina tala ma ata o tuaa.

Tagai i polokalama o le FamilySearch mo polokalama uma o loo maua.

O le tamaitusi O Lo’u Aiga: Tala e Aumaia Faatasi i Tatou e fesoasoani i tagata e faapotopoto ma faasaoina igoa ma tala o aiga. E mafai foi ona fesoasoani i tagata o le au paia e amata ai ona sauniuni ia igoa a le aiga mo sauniga o le malumalu.

E mafai ona oka ia kopi o le tamaitusi i le store.ChurchofJesusChrist.org.

O le polokalama o le Get Involved po o le lisi autu Ia Aofia FamilySearch.org e faatagaina ai volenitia e auai i gaoioiga nei:

• O le faavasegaga o igoa, o se faagasologa o le taina i totonu o faamatalaga mai se faamaumauga tusitusia faatalaaga i totonu o se utuofaamatalaga e mafai ona saili ai i luga o le FamilySearch.org.

• Iloiloina o faamaumauga mo le sa’o atoatoa.

• Faaleleia le sa’o atoatoa o le Gafa o le Aiga.

O i latou e auai i nei gaoioiga, ua mafai ai mo i latou lava ma isi ona maua o latou augatuaa ma faatino sauniga o le malumalu e fai ai ma o latou sui.

Soo se tasi lava e mafai ona auai i gaoioiga volenitia e ala i le faaaogaina o le polokalama o le Get Involved po o le lisi autu o le Get Involved FamilySearch.org. E mafai ona avea lenei mea o se aafiaga anoa faapitoa mo i latou nei:

• Autalavou

• Talavou matutua

• O tagata o le ekalesia e le mafai ona auai soo i sauniga a le Ekalesia

• Tagata fou o le Ekalesia

• Tagata lautele

E mafai e le au peresitene o le siteki ona tofi se faufautua o le siteki mo malumalu ma talafaasolopito o aiga po o se fautua maualuga e faamaopoopoina lenei galuega.

O tagata ua onomea ona faigaluega i le malumalu e iloa i auala nei:

• O tagata e faailoa mai e le epikopo po o se isi taitai o le uarota

• O tagata o le au paia e talanoa atu i le epikopo e uiga i le auauna atu

• O tagata e fautuaina mai e le peresitene o le malumalu, le faatina, po o se isi taitai o le malumalu

• O tagata o le ekalesia o ē o loo sauniuni mo, pe ua faatoa taliu mai le galuega faamisiona (tagai i le mataupu 24)

O igoa o tagata ua onomea ona faigaluega i le malumalu e auina mai e faaaoga ai le Recommend Temple Worker tool. O loo avanoa lenei meafaigaluega i epikopo, peresitene o siteki, ma au peresitene o malumalu. O loo otooto atu i lalo le faagasologa mo le auina mai o igoa.

A oo ina faailoa mai e se au peresitene o le malumalu se tagata ua onomea ona faigaluega i le malumalu, latou te auina atu le igoa o le tagata i le epikopo e faaaoga ai le meafaigaluega o le Fautuaina Atu o Tagata Faigaluega o le Malumalu.

Pe a oo ina faailoa mai e se epikopo se tagata ua onomea ona faigaluega i le malumalu pe ua maua mai se fautuaga mai se peresitene o le malumalu, e talanoa o ia ma le tagata e uiga i le avanoa e galue auauna ai. Na te iloiloina tulaga manaomia mo tagata faigaluega o le malumalu (tagai i le 25.5.2). Afai e taufai lagona e le epikopo ma le tagata ua talafeagai le avanoa, e faatumu e le epikopo ma auina atu le fautuaga e faaaoga ai le meafaigaluega o le Fautuaina Atu o Tagata Faigaluega o le Malumalu. E ao ona malamalama le tagata o le auina mai o le fautuaga e le o mautinoa ai o le a valaauina o ia pe tofia e fai ma tagata faigaluega i le malumalu.

E sosoo ai ma le iloiloina e le peresitene o le siteki le fautuaga. Afai e faamaonia e le peresitene o le siteki le fautuaga, na te auina atu i le peresitene o le malumalu mo le iloiloina e faaaoga ai le meafaigaluega o le Fautuaina Atu o Tagata Faigaluega o le Malumalu.

O tagata o le Ekalesia o e ua valaauina pe tofia o ni tagata e galulue i le malumalu e masani ona tuuto atu i se taimi masani e galue ai i le malumalu i vaiaso taitasi. E tatau i taitai ona aloese mai le tuuina atu o ni valaauga faaopoopo e ono faalavelaveina ai lo latou gafatia e auauna atu i totonu o le malumalu.

E faaali atu foi e le meafaigaluega o le Fautuaina Atu o Tagata Faigaluega o le Malumalu i epikopo ma peresitene o siteki se lisi o tagata uma mai a latou uarota po o siteki o loo galulue nei o ni tagata faigaluega i le malumalu.

E fesoasoani tagata faigaluega o le malumalu e faatino ia sauniga pe fesoasoani i le faagaoioiga o le malumalu, e pei o le ofisa, tagamea, po o galuega o le lotoa. Ina ia fautuaina atu e avea o se tagata faigaluega i le malumalu, e tatau i se tagata o le au paia ona ausia agavaa nei:

• E nofo i le itulagi e i ai le malumalu lea o le a galue ai.

• Ua maua faaeega paia, faamamaluina feagaiga o le malumalu, ma umia se pepa faataga o loo aoga i le taimi nei o le malumalu.

• Ia i ai se molimau malosi o le talalelei toefuataiina a Iesu Keriso.

• Ia mafai faaletino ona faatino lana galuega atofaina i le malumalu. O se tagata faigaluega e auauna atu i tagata ulu po o le taitaiina o sauniga e tatau ona mafai ona faia faaletino e aunoa ma se fesoasoani.

• Ia agavaa mo le faaaloalogia i le Ekalesia ma le alalafaga.

• Galulue lelei ma isi tagata.

• Ia faatuatuaina ma ia lelei le soifua maloloina.

• E le o i ai se faamatalaga faaopoopo i luga o lona pepa faamaumau i le taimi nei.

Ma le isi, e faamautinoa e le epikopo mea nei:

• Afai na tapuia’ia aloaia le avea ma tagata o le ekalesia, e mafai ona fautuaina atu o ia o se tagata fai sauniga ia le itiiti ifo ma le lima tausaga talu ona aveesea ia tapuiā’iga. (Tagai i le 32.11.3ma le 32.16.1.)

• Afai na soloia se tagata e lei maua faaeega paia mai le avea ma tagata o le Ekalesia, pe afai foi na faamavae le tagata mai le avea ma tagata o le Ekalesia, e mafai ona fautuaina atu o ia o se tagata e faigaluega i le malumalu, ia le itiiti ifo ma le lima tausaga talu ona toe faaulufale mai i le Ekalesia. (Tagai i le 32.11.4, 32.14.9, 32.16.1, ma le 32.16.2.)

• Afai na soloia se tagata ua maua faaeega paia mai le avea ma tagata o le Ekalesia, pe afai foi na faamavae le tagata mai le avea ai ma tagata o le Ekalesia, e mafai ona fautuaina atu o ia o se tagata e faigaluega i le malumalu, ia le itiiti ifo ma le lima tausaga talu ona maua se toefuataiga o faamanuiaga. (Tagai i le 32.11.4, 32.14.9, ma le 32.17.2.)

A mae’a ona maua e le peresitene o le malumalu le fautuaga mo se tasi e avea ma tagata e faigaluega i le malumalu, e faatalanoa e se tasi o le au peresitene o le malumalu po o se tasi na te tofia le tagata. E pei ona musuia ai, o le tagata e faatautaia le faatalanoaga e valaauina i latou e mafai ona auauna o ni tagata e faigaluega i le malumalu ma vaetofia i latou.