Stap Serem Gospel mo Mekem Ol Memba we Oli Niu mo Olgeta we Oli Kambak Oli Kam Strong Moa

Yumi evriwan i ol pikinini blong Papa long Heven we i lavem ol pikinini blong Hem long wan fasin we i stret evriwan. Hem i givim, long evriwan, janis ia blong yumi fulap long lav blong Hem tru long Jisas Kraes mo gospel blong Hem Jon 3:16; 2 Nifae 26:24–28; Alma 26:37; Ol Toktok blong Bilif 1:3).

Wan wei blong yumi soem lav we yumi gat long God, i blong yumi lavem mo givim seves long ol pikinini blong Hem olsem we Jisas Kraes i bin mekem (luk long Matiu 22:36–39; 25:40). Lav ia i givim insperesen long yumi blong go luk olgeta raon long yumi mo go long ol pipol blong evri relijin, evri kala blong skin, mo evri kalja (luk long Ol Wok 10:34; 2 Nifae 26:33; Jekob 2:17). Yumi prea from mo lukaotem ol janis blong serem gospel wetem ol narawan (luk long Alma 6:6; 8:10).

From se yumi lavem God mo ol pikinini blong Hem, bae i nomol blong yumi wantem serem ol blesing we Hem i bin givim long yumi (luk long Jon 13:34–35) mo help blong pulum Isrel i kam tugeta. Yumi wantem blong wok blong helpem ol pipol oli filim glad ia we yumi filim (luk long Alma 36:24). Olsem ol disaepol blong Jisas Kraes, yumi holem laet blong Hem antap (luk long 3 Nifae 18:24–25). Yumi no fraet, long pablik, blong tokbaot Sevya mo paoa blong Hem insaed long laef blong yumi Doktrin mo Ol Kavenan 60:2).

Yumi serem lav, ol trutok blong gospel, taem, ol eksperiens, mo ol program blong Jos blong save blesem ol pikinini blong God, mo helpem olgeta blong oli kam kolosap moa long Sevya. Yumi serem ol samting ia long ol rod we oli nomol mo long wan fasin we i nomol, olsem pat blong ol storian onlaen mo long ol narawei.

Ol wod mo stek oli save krietem ol nomol janis blong ol memba blong oli serem gospel wetem ol narawan. Wan wei blong mekem hemia, hem i blong mekem ol ivent mo aktiviti. Blong moa infomesen, luk long “Sharing Church Resources” insaed long Gospel Laebri.

Ol wod mo stek lida oli kaonsel tugeta blong luksave (1) ol nid blong lokol komuniti mo (2) ol risos blong Jos blong serem blong help blong lukluk long olgeta long nid. Blong moa infomesen, luk long “Sharing Church Resources” insaed long Gospel Laebri.

Sevya i stap invaetem evriwan blong akseptem gospel blong Hem mo rere from laef we i no save finis (luk long Alma 5:33–34). Olsem ol disaepol blong Hem, yumi stap folem eksampol blong Hem, mo stap invaetem evriwan blong “kam long Kraes, mo kam stret evriwan tru hem” (Moronae 10:32).

Yumi prea from insperesen mo blong Lod i soem rod long yumi long wei blong invaetem ol narawan blong:

• Kam mo luk ol blesing we i stap tru long Jisas Kraes, gospel blong Hem, mo Jos blong Hem (luk long Jon 1:37–39, 45–46).

• Kam mo givim seves long ol pipol we oli gat nid.

• Kam mo kam pat blong Jos Ia blong Jisas Kraes, we Hem i bin putumbak long wol ia.

Plante taem, blong invaetem wan, hem i minim nomo blong invaetem famli blong yumi, ol fren, mo ol neba blong yumi long wanem yumi stap mekem finis. Eksampol, tingting blong stap invaetem ol pipol folem ol nid mo intres blong olgeta blong:

• Ol sakramen miting mo ol nara miting blong Sandei. Wan long ol eksperiens we i gat plante valiu long hem we yumi save givim long ol narawan, hem i blong go long sakramen miting tugeta wetem ol narawan, mo helpem olgeta blong gat wan eksperiens we i mekem olgeta oli filim welkam mo wan eksperiens long saed blong spirit (luk long 3 Nifae 18:22–23).

• Ol spesel ivent blong Jos, olsem ol blesing blong ol bebi o baptaes.

• Ol wod mo stek aktiviti we i tekem tu ol aktiviti blong Praemeri mo yut (luk long “Sharing Church Resources” insaed long Gospel Laebri).

• Ol aktiviti long ol hom blong yumi.

• Ol program blong Jos olsem seminari, institiut, famli histri, ol klas blong stap dipen long yuwan, mo ol projek blong JustServe.org (long ol ples we i gat).

• O lesen wetem ol misinari.

Blong gat moa aedia mo risos, luk long:

• share.ChurchofJesusChrist.org.

• “Sharing the Gospel” insaed long Gospel Laebri.

• Seksen blong “Joen Wan wetem Ol Memba” long japta 9 blong Prijim Gospel blong Mi: Wan Gaed blong Stap Serem Gospel blong Jisas Kraes.

Taem yumi stap lavem, serem, mo invaetem olsem we Kraes i bin mekem, God bae i putum ol janis long rod blong yumi (luk long Doktrin mo Ol Kavenan 11:3–5, 8). Eni traehad blong laef folem ol prinsipol blong lavem, serem, mo invaetem, hem i gud, nomata sapos wan i mit wetem ol misinari o no, o sapos hem i joenem Jos o no.

Olgeta prinsipol blong stap lavem, serem, mo stap invaetem man, i go tu long taem we yumi stap mekem ol niu memba mo ol memba we oli kambak, oli kam strong moa.

2:46

Ol risos ia i save help blong lidim ol storian long taem blong ol misinari kodinesen miting evri wik:

• My Covenant Path. Risos ia i helpem ol niu memba mo ol memba we oli stap kambak blong progres folem kavenan rod long taem blong ol fas 12 kasem 24 manis, afta long baptaes blong olgeta, o afta oli kambak blong stap tekpat long gospel. My Covenant Path i gat i stap long Gospel Laebri.

• Kavenan Rod Progres ripot. Ol wod lida oli yusum risos ia blong rekodem mo lukluk progres blong ol niu memba mo ol memba we oli stap kambak, mo blong ol pipol we ol misinari oli stap tijim olgeta. Kavenan Rod Progres oli save luk mo ol wod lida oli save apdeitem tru long ap blong Member Tools mo Ol Risos blong Lida mo Klak (RLK). Ol fultaem misinari oli gat akses mo save apdeitem Kavenan Rod Progres tru long ap blong Prijim Gospel blong Mi.

Stek presiden i holem ol ki, insaed long stek, blong wok blong serem gospel mo blong mekem ol niu memba mo ol memba we oli kambak, oli kam strong moa. Hem mo ol kaonsela blong hem, oli givim daereksen blong ol efot ia. Hem i meksua se, wok ia, oli tokbaot oltaem insaed long ol miting blong stek.

Plante taem, wan taem long manis, stek presiden i mit wetem misin presiden blong kodinetem ol efot bitwin ol lida long stek mo ol wod mo ol fultaem misinari. Ol narawan we oli save stap long miting ia, i gat:

• Ol kaonsela long stek mo misin presidensi.

• Ol hae kaonsela we oli givimaot wok ia long olgeta.

• Stek Rilif Sosaeti presiden.

• Ol misinari olsem we misin presiden i givimaot wok ia long olgeta.

Stek adalt lidasip komiti, insaed long hem i gat:

• Stek presidensi.

• Stek Rilif Sosaeti presidensi.

• Ol hae kaonsela we oli givimaot ol wok ia long olgeta blong wok wetem ol kworom blong ol elda.

Olgeta lida ia, oli givim instraksen mo sapot long presidensi blong kworom blong ol elda, mo hemia blong Rilif Sosaeti, long ol wok blong olgeta blong stap serem gospel, mo mekem ol niu memba mo ol memba we oli kambak, oli kam strong moa (luk long 23.6.2). Instraksen ia i save tekem ples long wan grup, o wetem wanwan. Oli save invaetem ol wod misin lida blong oli kasem instraksen ia.

Blong kasem moa infomesen abaot ol miting blong komiti ia, luk long 29.3.8.

Stek presidensi i save givimaot wok long ol hae kaonsela blong oli givim instraksen mo sapot long ol presidensi blong kworom blong ol elda, mo ol wod misin lida. Oli save givim wok long wan o moa long wan hae kaonsela blong lidim ol bigfala wok ia. Be, evri hae kaonsela oli gat responsabiliti blong lukaot long ol wod mo kworom we oli bin givim long wanwan long olgeta blong lukaotem.

Anda long daereksen blong stek presiden, stek Rilif Sosaeti presidensi i givim instraksen mo i sapotem ol wod Rilif Sosaeti presidensi long saed blong ol responsabiliti blong olgeta long saed blong stap serem gospel mo mekem ol niu memba mo ol memba we oli kambak, oli kam strong moa.

Bisoprik i kodinetem ol efot ia wetem presidensi blong kworom blong ol elda mo presidensi blong Rilif Sosaeti, taem oli stap wok blong stap serem gospel mo stap mekem ol niu memba mo ol memba we oli kambak, oli kam strong moa. Ol lida ia, oli kaonsel tugeta oltaem abaot ol efot ia.

Bisoprik i meksua se olgeta efot ia, oli toktok raon long olgeta mo oli kodinetem olgeta long ol miting blong wod kaonsel mo ol miting blong yut kaonsel. Mo tu, bisoprik i luklukbak mo i apruvum wod plan long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

Bisoprik i toktok wetem stek presiden blong faenemaot sapos i nid blong singaotem wan wod misin lida (luk long 23.6.3 blong kasem moa infomesen).

Bisop i intaviu long ol niu memba we oli olfala inaf blong kasem wan tempol rekomen blong mekem ol baptaes mo konfemesen long bihaf blong ol dedman (luk long 26.5.1). Mo tu, hem i intaviu long ol brata we oli gat stret yia, blong oli kasem Aronik Prishud (luk long 38.2.9.1 Hem i save mekemaot tugeta stamba tingting ia long wan ia intaviu nomo. Plante taem, hem i lidim ol intaviu ia stret long wik ia we i folem konfemesen blong memba. Wan bisop o branj presiden i save givim wok long wan long ol kaonsela blong hem blong mekem intaviu ia. Afta long hemia, bisop i save askem blong yusum Family Name Assist blong helpem wan niu memba blong hem i printim nem blong wan memba blong famli blong hem we i ded, we bae niufala memba ia i save mekem ol tempol odinens long bihaf blong famli we i ded (luk long “Family Name Assist” long 25.4.1).

Bisoprik i kodinetem ol wok ia wetem ol nara lida blong meksua se ol niu memba, mo ol memba we oli kambak, oli gat sam janis blong givim seves. Ol janis olsem, oli save helpem ol memba ia blong oli groap long saed blong spirit, mo blong oli filim paoa blong Lod insaed long laef blong olgeta. Seves i save helpem tu ol memba blong oli filim glad, mo blong oli bildim ol strong rilesensip wetem ol narawan insaed long wod.

Ol janis blong givim seves oli mas folem ol nid mo ol samting we ol memba oli save mekem. Long samfala kes, bae i stret blong givim wan koling. Long sam narafala kes, bae i moa stret blong givim wan asaenmen.

Presidensi blong kworom blong ol elda mo hemia blong Rilif Sosaeti oli save lidim ol evri dei efot blong wod blong serem gospel mo mekem ol niu memba, mo ol memba we oli kambak, oli kam strong moa (luk long 8.2.3 mo 9.2.3). Presidensi blong kworom blong ol elda i lidim ol efot ia blong ol memba blong kworom blong ol elda. Presidensi blong Rilif Sosaeti i lidim ol efot ia blong ol memba blong Rilif Sosaeti. Oli wok tugeta blong lidim ol efot ia insaed long wod kaonsel, anda long kodinesen blong bisop.

Ol lida ia, oli gat olgeta responsabiliti ia:

• Oli help blong givim insperesen long ol memba blong oli lavem ol pikinini blong God, blong oli serem gospel, mo blong oli invaetem ol narawan blong oli kasem ol blesing blong Sevya (luk long 23.1).

• Oli kaonsel wetem ol memba blong kworom, o ol memba blong Rilif Sosaeti, abaot wei blong serem gospel. Oli toktok raon long wei blong faenem ol pipol blong ol misinari oli tijim, mo olsem wanem blong sapotem ol pipol we oli stap tijim olgeta. Oli kaonsel tugeta abaot ol nid blong ol niu memba mo ol memba we oli kambak, mo wei blong givim sapot.

• Oli givim wok long ol givhan brata mo sista blong oli lukaot long ol niu memba mo ol memba we oli kambak (luk long 21.2.1). Mo tu, oli save givim wok long ol givhan brata mo sista blong lukaot long ol pipol we ol misinari oli stap tijim (hemia oli mekem taem oli kodinetem ol wok ia wetem ol misinari). Sapos i posibol, ol lida oli givim wok long ol memba we oli gat, o oli save developem ol strong rilesensip wetem wanwan long olgeta pipol ia. Ol lida oli leftemap tingting blong ol givhan brata mo sista blong oli givim lav mo sapot olsem hemia we Kraes i stap givim.

• Oli givim, long ol niu memba mo ol memba we oli kambak, ol janis blong givim seves olsem ol givhan sista o brata. Blong kasem moa infomesen long saed blong wok blong givhan, luk long japta 21.

• Mo tu, wod kaonsel i developem wan plan long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

• Oli lidim wok blong wod misin lida. Sapos oli no singaotem wan misin lida, bae wan memba blong presidensi blong kworom blong ol elda nao i mekem wok ia (luk long 23.6.3).

Presiden blong kworom blong ol elda mo presiden blong Rilif Sosaeti, wanwan long tufala i givim wok ia long wan memba blong presidensi blong olgeta blong i help long ol efot ia. Tufala presidensi memba ia, oli wok tugeta. Tufala i go long ol wik kodinesen miting (luk long 23.4).

Bisoprik i toktok wetem stek presiden blong faenemaot sapos i nid blong singaotem wan wod misin lida. Sapos oli disaed blong givimaot koling ia, nao bisoprik i kaonsel wetem presiden blong kworom blong ol elda, mo presiden blong Rilif Sosaeti blong faenemaot huia blong singaotem.

Wod misin lida i mas wan man we i holem Melkesedek Prishud. Sapos oli no singaotem wan wod misin lida, wan memba blong kworom blong ol elda i tekem rol ia.

Wod misin lida i sapotem presidensi blong kworom blong ol elda mo hemia blong Rilif Sosaeti long saed blong ol misinari responsabiliti blong tufala. Mo tu, hem i gat olgeta responsabiliti ia:

• Hem i kodinetem wok blong ol memba mo ol lida blong wod, blong ol misinari, mo blong ol fultaem misinari. Hemia i tekem tu blong kodinetem ol wok blong tij, blong ol seves blong baptaes, mo ol efot blong mekem ol niu memba oli kam strong moa. Mo tu, hem i tekem wok blong mekem plan blong gat ol wei blong helpem ol memba blong wod blong oli serem gospel.

• Hem i lidim kodinesen miting blong evri wik (luk long 23.4).

• Hem i go long wod kaonsel miting taem oli invaetem hem.

• Mo tu, hem i helpem wod kaonsel blong i developem mo putumaot wan plan blong wod, long saed blong wok blong stap serem gospel mo mekem ol niu memba mo ol memba we oli kambak, oli kam strong moa (luk long 23.6.6).

• Lukaotem ol janis blong helpem ol fultaem misinari blong oli kasem stamba tingting blong olgeta blong stap serem gospel mo bildim ol rilesensip wetem ol memba. Taem oli apruvum, hemia i save tekem tu blong stap kakae wetem ol memba (plante taem wetem ol haf memba famli mo ol niu memba mo ol memba we oli stap kambak long jos, taem i posibol; luk long 24.6.2.3).

• Hem i wok wetem lida mo ol konsalten blong wod tempol mo famli histri blong helpem olgeta ia we oli stap lanem gospel, ol niu memba, mo ol memba we oli kambak blong oli mekem wok blong tempol mo famli histri.

Ol wod misinari oli helpem ol memba blong wod blong gat eksperiens blong gat glad ia blong stap serem gospel olsem oli tokbaot long 23.1. Oli wok anda long daereksen blong wod misin lida, o memba blong presidensi blong kworom blong ol elda we i gat wok ia. Presiden blong Kworom blong Ol Elda mo Presidensi blong Rilif Sosaeti oli save givim nem blong ol memba we oli save givim seves.

Ol wod misinari oli tij tru long toktok mo tru long eksampol long hao blong lavem ol narawan, serem bilif blong olgeta, mo invaetem ol narawan blong kasem ol blesing blong gospel. Mo tu, oli helpem ol memba blong wod blong givhan long ol niu memba mo olgeta memba we oli kambak.

Ol wod misinari oli tekpat long ol kodinesen miting evri wik (luk long 23.4).

Fasin blong serem gospel mo fasin blong mekem ol niu memba mo ol memba we oli kambak oli kam strong moa, i mas wan poen blong toktok raon long hem oltaem long ol wod kaonsel miting. Bisop i save askem wod misin lida (o memba blong presidensi blong kworom blong ol elda, we i kasem wok blong mekem hemia), presiden blong kworom blong ol elda, o presiden blong Rilif Sosaeti, blong lidim ol storian ia. (Luk long 23.4.)

Kaonsel i save tokbaot plan blong wod long saed blong wok blong stap serem gospel mo wok blong mekem ol niu memba mo olgeta we oli kambak, oli kam strong moa. Oli kodinetem ol asaenmen ia long evri oganaesesen.

Ol risos olsem Kavenan Rod blong Mi mo Kavenan Rod Progres ripot, i save help long ol storian ia (luk long 23.4.1).

Blong gat moa abaot wod kaonsel, luk long 29.2.5

Wod yut kaonsel oli lukluk moa long ol yut we:

• oli ol memba we oli niu mo stap kambak.

• oli ol memba be ful famli blong olgeta oli no memba.

• ol misinari oli stap tijim olgeta.

• oli Ol Fren blong nara fet o bilif.

Wanwan wod i sapos blong gat wan simpol plan blong stap serem gospel mo stap mekem ol niu memba mo ol memba we oli kambak oli kam strong moa. Plan ia i help blong gaedem ol miting, ol seves, mo ol aktiviti. Insaed, i save gat ol plan mo ol aedia blong:

• Stap helpem evriwan oli filim welkam insaed long ol miting mo aktiviti blong wod.

• Stap helpem ol memba blong oli gat eksperiens ia blong filim glad ia blong stap serem gospel.

• Stap sapotem ol pipol we ol misinari oli stap tijim olgeta.

• Stap helpem ol niu memba mo ol memba we oli kambak blong oli progres long saed blong spirit.

Presiden blong kworom blong ol elda mo presiden blong Rilif Sosaeti oli helpem wod kaonsel blong krietem wan plan. Wod lida blong misin i save help tu. Bisop i luklukbak mo i apruvum plan ia.

Ol memba blong wod kaonsel oli tekem lid blong kareaot plan ia. Oli ripotem progres blong olgeta long ol wod kaonsel miting. Mo tu, oli apdeitem plan ia olsem we i nid.