Plan blong God mo Rol blong Yu Insaed long Wok blong Hem blong Fasin blong Sevem Man mo Fasin blong Kam Olsem Wan God

Oli bin singaotem yu blong wok o givim seves insaed long Jos Ia blong Jisas Kraes blong Ol Lata-dei Sent. Tangkyu long seves blong yu. Bambae yu blesem ol laef, mo bambae yu filim glad taem yu stap fetful blong givim seves.

Hanbuk ia, bambae i helpem yu blong lanem olgeta prinsipol we oli olsem hemia blong seves blong Kraes, mo blong yu andastanem ol responsabiliti blong yu. Bambae yu wok gud moa taem yu mekem seves blong yu insaed long Jos i wok saedsaed wetem wok blong God Papa mo Pikinini blong Hem, Jisas Kraes. Japta ia bae i helpem yu kasem wan visen abaot:

• Plan blong God blong stap hapi.

• Wok blong God blong fasin blong sevem man mo fasin blong kam olsem wan god.

• Stamba tingting blong Jos Ia blong Jisas Kraes blong Ol Lata-dei Sent.

Papa long Heven i givim plan ia blong stap hapi blong mekem se yumi glad long evriwan long ol blesing blong Hem. Wok mo glori blong Hem, i blong “mekem man i nomo save ded mo i kasem laef we i no save finis” (Moses 1:39). Fasin blong nomo save ded, hem i blong laef blong oltaem wetem wan bodi blong mit mo bun we i laef bakegen long ded. Laef we i no save finis, o blong kam olsem wan god, hem i blong kam olsem God mo stap laef long ples we Hem i stap long hem, blong taem we i no save finis, olsem wan famli.

Jisas Kraes i stamba blong plan blong God. From lav ia blong Papa long Heven we i no gat en, Hem i bin sendem Pikinini blong Hem blong pemaot yumi long sin mo ded tru long sakrifaes blong Hem we i pem praes from yumi (luk long Jon 3:16). Tru long Atonmen blong Hem, Jisas Kraes i stap meksua se wanwan long yumi we i bon i kam long wol ia, bae i laef bakegen long ded mo i kasem wan bodi we bae i nomo save ded bakegen.

Blong kasem laef we i no save finis, yumi mas “kam long Kraes” (Moronae 10:32). Atonmen blong Sevya i mekem se i posibol blong yumi kam klin long sin mo mekem hat blong yumi i jenis blong mekem se yumi save kasem laef we i no save finis mo wan glad we i fulwan.

Papa long Heven i wantem evriwan long ol pikinini blong Hem blong kam olsem Hem mo gobak stap wetem Hem. Hemia i posibol nomo from Pikinini blong Hem, Jisas Kraes (luk long Jon 14:6). Taem yumi jusum blong kam long Kraes mo stap helpem ol narawan blong kam long Hem, yumi stap tekpat long wok ia blong God blong fasin blong sevem man, mo blong fasin blong kam olsem wan god. Wok ia, i gat tufala hae komanmen i lidim, we hem i blong lavem God mo lavem ol neba blong yumi (luk long Matiu 22:37–39

Yumi kam long Jisas Kraes taem yumi praktisim fet long Hem, sakem sin, mo stap mekem mo kipim ol tabu kavenan (luk long 3.5). Taem yumi mekem olsem, yumi gat wan kavenan rilesensip wetem God we i letem yumi blong kam moa kolosap long Hem mo kasem sore, fogivnes, mo paoa blong Hem we i moa bigwan (luk long Eksodas 19:5; 3 Nifae 20:25–26). Blong stap kipim ol kavenan blong yumi wetem God, i helpem yumi blong kam moa olsem Hem mo i rere long yumi blong laef wetem Hem blong taem we i no save finis.

Ol kavenan oli impoten insaed long wok blong God blong fasin blong sevem man mo fasin blong kam olsem wan god.

Long plan blong Papa long Heven, yumi mekem ol kavenan taem yumi kasem ol prishud odinens we i nid blong mekem blong kasem fasin blong sevem man mo kam olsem wan god. Ol odinens ia oli:

• Baptaes.

• Konfemesen mo presen we I Tabu Spirit.

• Pasem Melkesedek Prishud mo odinesen long wan ofis (blong ol man).

• Endaomen long tempol.

• Tempol siling.

Taem yumi kipim ol kavenan we i go wetem ol odinens ia, yumi save kam moa olsem God mo kasem ol blesing blong laef we i no save finis (luk long Doktrin mo Ol Kavenan 84:19–22; luk tu long 3.5.3 insaed long hanbuk ia).

Wok blong God blong fasin blong sevem man mo fasin blong kam olsem wan god i tekem ol fofala responsabiliti we God i givim blong mekem. Blong stap tekpat long ol responsabiliti ia i helpem yumi blong kipim ol kavenan blong yumi wetem God. Yumi sapotem tu ol narawan taem oli stap mekem mo kipim ol tabu kavenan ia. Ol responsabiliti ia oli stap long aotlaen andanit ia:

1.4.1

Stap Laef Folem Gospel blong Jisas Kraes

Blong stap laef folem Gospel blong Jisas Kraes i minim tu blong:

• Stap praktisim fet long Kraes, sakem sin evri dei, stap mekem ol kavenan wetem God taem yumi stap kasem ol odinens blong fasin blong sevem man mo fasin blong kam olsem wan god, mo stap strong kasem en taem yumi kipim olgeta kavenan ia (luk long 1.2; 3.5.3).

• Stap lanem mo tijim gospel blong Jisas Kraes long hom mo long Jos.

• Stap dipen long yumiwan, o kam indipenden blong lukluk long evri samting we yumi nidim blong yumiwan mo blong famli blong yumi, tugeta, long saed blong spirit mo long saed blong laef long wol ia.

Jisas Kraes i bin stanemap Jos blong Hem blong mekem se ol blesing blong laef we i no save finis, i save stap blong evriwan tru long ol tabu odinens mo kavenan. Tru long Jos blong Hem, Hem i mekem se wanwan man mo woman mo famli i kasem ol blesing ia blong helpem God blong mekem ol wok blong Hem long saed blong fasin blong sevem man mo kam olsem wan god (luk long Efesas 4:11–13; luk tu long 2.2 long hanbuk ia). Blong help blong mekem tabu stamba tingting ia i kamtru, tru long Jos mo ol lida blong hem, Jisas Kraes i givim:

• Atoriti mo ol ki blong prishud.

• Daereksen we i kam long profet.

• Ol skripja.

• Stap lanem gospel mo tijing sapot.

• Janis blong givim seves mo blong lidasip.

• Wan komuniti blong Ol Sent.

1.5.1

Atoriti mo Ol Ki blong Prishud

Tru long prishud, God i mekem wok blong Hem blong fasin blong sevem man mo fasin blong kam olsem wan god, i hapen. Prishud atoriti ia mo ol ki we oli nidim blong mekem ol odinens mo kavenan mo blong daerektem wok blong God long wol, i kambak bakegen long Profet Josef Smit (luk long Doktrin mo Ol Kavenan 110:11–16; 112:30; luk tu long 3.1 insaed long hanbuk ia). Ol lida blong tedei oli holem atoriti mo ol ki ia. Ol lida ia oli singaotem mo givim raet long ol narawan blong help insaed long wok ia blong God (luk long Doktrin mo Ol Kavenan 107:8, 65–67

1.5.2

Daereksen we I Kam long Profet

Tru long ol profet we Hem i bin jusum, God i soemaot trutok mo i givim, tru long insperesen, ol toktok blong soem rod mo ol woning (luk long Amos 3:7; Doktrin mo Ol Kavenan 1:4). Help ia blong soem rod, i helpem yumi blong kam wokbaot insaed, mo stastap wokbaot long rod ia we i go kasem laef we i no save finis.

1.5.3

Ol Skripja

Anda long daereksen blong ol profet mo ol aposol blong Lod, Jos i givim mo i holemtaet toktok blong God olsem we yumi faenem insaed long ol tabu skripja. Ol skripja oli testifae abaot Kraes, oli tijim gospel blong Hem, mo oli helpem yumi praktisim fet long Hem (luk long Jekob 7:10–11; Hileman 15:7).

1.5.4

Stap Lanem Gospel mo Tijing Sapot

Jos i sapotem wanwan man, woman mo famli insaed long ol responsabiliti blong olgeta blong lanem ol trutok blong gospel mo tijim olgeta trutok ia long ol memba blong famli mo long ol narawan (luk long Doktrin mo Ol Kavenan 88:77– 78,118; luk tu long 2.2.3 insaed long hanbuk ia).

1.5.5

Janis blong Givim Seves mo blong Lidasip

Tru long ol koling mo ol asaenmen insaed long Jos, God i givim ol janis long ol memba blong oli givim seves mo blong oli lidim rod. Jos i givim fasin blong help blong kea long ol memba we oli stap long nid, mo blong givim yumaniterian help long ol narawan (luk long Mosaea 18:27–29).

1.5.6

Wan Komuniti blong Ol Sent

Olsem wan komuniti blong Ol Sent, ol memba blong Jos oli kam tugeta oltaem blong wosipim God mo blong tingbaot Sevya taem oli tekem mo kaekae sakramen (luk long Moronae 6:4–6; Doktrin mo Ol Kavenan 20:77). Ol memba oli stap kea tu mo oli stap givhan long wanwan long olgeta (luk long Efesas 2:19).

Olsem wan lida insaed long Jos, oli singaotem yu blong tijim mo sapotem olgeta we yu stap wok blong olgeta taem oli helpem God long wok blong Hem blong fasin blong sevem man, mo fasin blong kam olsem wan god (luk long 1.2). Blong gat wan klia andastaning abaot wok ia blong God, o abaot wanem Hem i stap invaetem yumi blong mekem, mo abaot stamba tingting blong Jos blong Hem, bae i helpem yumi blong lukluk nomo long ol hadwok blong yumi blong tekem ol sol oli kam long Kraes.

Prea mo askem blong save olsem wanem bae yu save help blong mekem ol stamba tingting blong God i hapen insaed long laef blong olgeta we yu stap givim seves long olgeta. God bambae i daerektem yu tru long ol kwaet toktok blong Tabu Spirit (luk long 2 Nifae 32:5). Blong stap wok wetem Lod insaed long plantesen blong Hem bae i mekem se yu yu gat bigfala glad (luk long Jekob 5:70–72