“35. ການດູແລ ແລະ ການໃຊ້ອາຄານປະຊຸມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ (2023).
“35. ການດູແລ ແລະ ການໃຊ້ອາຄານປະຊຸມ,” ພາກສ່ວນທີ່ຄັດເລືອກມາຈາກຄູ່ມືທົ່ວໄປ
35.
ການດູແລ ແລະ ການໃຊ້ອາຄານປະຊຸມ
35.1
ຈຸດປະສົງ
ສາດສະໜາຈັກຈັດຫາອາຄານປະຊຸມໃຫ້ເພື່ອວ່າທຸກຄົນທີ່ເຂົ້າໄປໃນນັ້ນຈະສາມາດ:
-
ເຮັດ ແລະ ຮັກສາພັນທະສັນຍາຜ່ານທາງພິທີການສັກສິດ (ເບິ່ງ ຄຳສອນ ແລະ ພັນທະສັນຍາ 20:75; 59:9–12).
-
ພົບປະນຳກັນ (ເບິ່ງ 3 ນີໄຟ 18:22–23).
-
ນະມັດສະການ ແລະ ອະທິຖານນຳກັນ (ເບິ່ງ ໂມໄຊຢາ 18:25; ໂມໂຣໄນ 6:9).
-
ສິດສອນ ແລະ ປະຕິບັດສາດສະໜາກິດຕໍ່ກັນແລະກັນ (ເບິ່ງ ໂມໂຣໄນ 6:4–5).
-
ມີສ່ວນຮ່ວມໃນການໃຊ້ທາງອື່ນທີ່ອະນຸມັດຕາມທີ່ບັນຍາຍໄວ້ໃນບົດນີ້.
35.2
ບົດບາດ ແລະ ໜ້າທີ່ຮັບຜິດຊອບ
35.2.2
ຜູ້ຈັດການສະຖານທີ່ຂອງສາດສະໜາຈັກ
ຜູ້ຈັດການສະຖານທີ່ ທີ່ສາດສະໜາຈັກວ່າຈ້າງ ຊ່ວຍເຫລືອແຕ່ລະສະເຕກດຳເນີນການເລື່ອງອາຄານປະຊຸມ. ລາວຈັດການເລື່ອງການສ້ອມແປງຄັ້ງໃຫຍ່, ການທຳຄວາມສະອາດ, ແລະ ການບຳລຸງຮັກສາອາຄານຕາມປົກກະຕິ.
ເມື່ອຈຳເປັນ, ຜູ້ຈັດການສະຖານທີ່ຊ່ວຍແນະນຳຕົວແທນອາຄານສະເຕກ ແລະ ຫວອດໃຫ້ຮູ້ວິທີທຳຄວາມສະອາດອາຄານ ແລະ ເຮັດວຽກງານອື່ນໃນທ້ອງຖິ່ນ. ລາວໃຫ້ຄຳແນະນຳ, ຈັດຫາວັດສະດຸ, ແລະ ອຸປະກອນ.
ລາວອາດທົບທວນຄ່າໃຊ້ຈ່າຍຂອງອາຄານກັບຝ່າຍອະທິການ.
35.2.7
ຝ່າຍອະທິການ
ຝ່າຍອະທິການ (ຫລື ຕົວແທນອາຄານຫວອດ) ສິດສອນສະມາຊິກໃຫ້ຮູ້ວິທີໃຊ້, ດູແລ, ແລະ ເຮັດໃຫ້ອາຄານປອດໄພ. ຝ່າຍອະທິການກໍຍັງແຈກຢາຍກະແຈອາຄານໃຫ້ຜູ້ນຳຫວອດນຳອີກ.
ພວກເພິ່ນຕ້ອງແນ່ໃຈວ່າກິດຈະກຳໃນອາຄານ ແລະ ໃນບໍລິເວນດຳເນີນຢ່າງປອດໄພ (ເບິ່ງ 20.7).
ພວກເພິ່ນສື່ສານກັບຜູ້ຈັດການສະຖານທີ່ຂອງສາດສະໜາຈັກກ່ຽວກັບຄວາມຈຳເປັນຕ້ອງບຳລຸງຮັກສາ ແລະ ການດຳເນີນການ. ພວກເພິ່ນອາດຍັງຕ້ອງທົບທວນຄ່າໃຊ້ຈ່າຍທີ່ກ່ຽວຂ້ອງກັບຜູ້ຈັດການສະຖານທີ່ນຳອີກ.
35.2.9
ຕົວແທນອາຄານຫວອດ
ຝ່າຍອະທິການພິຈາລະນາວ່າຈະເອີ້ນໃຜຜູ້ໜຶ່ງໃຫ້ເປັນຕົວແທນອາຄານຫວອດຫລືບໍ່. ຖ້າຫາກພວກເພິ່ນຕັດສິນໃຈມອບການເອີ້ນນີ້, ຝ່າຍອະທິການອາດເອີ້ນສະມາຊິກຜູ້ຊາຍ ຫລື ຜູ້ຍິງທີ່ເປັນຜູ້ໃຫຍ່ຄົນໜຶ່ງ. ຖ້າຫາກຕົວແທນອາຄານບໍ່ໄດ້ຖືກເອີ້ນ, ອະທິການອາດມອບໝາຍໜ້າທີ່ຮັບຜິດຊອບນີ້ໃຫ້ທີ່ປຶກສາຄົນໜຶ່ງຂອງເພິ່ນ, ໃຫ້ສະໝຽນຫວອດ ຫລື ຜູ້ຊ່ວຍສະໝຽນຫວອດ, ຫລື ເລຂານຸການສູງສຸດ.
ຕົວແທນອາຄານຫວອດຈັດກຸ່ມສະມາຊິກ ແລະ ຜູ້ອາສາສະໝັກ ເພື່ອທຳຄວາມສະອາດ ແລະ ບຳລຸງຮັກສາອາຄານ.
35.3
ການຈັດຫາອາຄານປະຊຸມ
ອາຄານປະຊຸມຕ່າງໆມີຫລາຍຂະໜາດ ແລະ ຫລາຍແບບອີງຕາມຄວາມຕ້ອງການໃນທ້ອງຖິ່ນ ແລະ ສະພາບການ. ອາຄານປະຊຸມອາດເປັນຕຶກທີ່ສາດສະໜາຈັກສ້າງຂຶ້ນ ຫລື ຊື້ເອົາ, ເປັນເຮືອນຂອງສະມາຊິກ, ເປັນໂຮງຮຽນໃນທ້ອງຖິ່ນ ຫລື ເປັນສູນຊຸມຊົນ, ເປັນພື້ນທີ່ເຊົ່າ, ຫລື ທາງເລືອກອື່ນທີ່ຖືກອະນຸມັດ.
ຜູ້ນຳເຂດ ແລະ ຜູ້ນຳໃນທ້ອງຖິ່ນໃຊ້ອາຄານປະຊຸມທຸກບ່ອນທີ່ມີຢູ່ ແລະ ຮອບຄອບໃນການສະເໜີຂໍພື້ນທີ່ເພີ່ມເຕີມ.
35.4
ການບຳລຸງຮັກສາອາຄານປະຊຸມ
35.4.1
ການທຳຄວາມສະອາດ ແລະ ການບຳລຸງຮັກສາອາຄານປະຊຸມ
ຜູ້ນຳໃນທ້ອງຖິ່ນ ແລະ ສະມາຊິກ, ລວມທັງຊາວໜຸ່ມ, ມີໜ້າທີ່ຮັບຜິດຊອບຊ່ວຍຮັກສາອາຄານແຕ່ລະແຫ່ງໃຫ້ສະອາດ ແລະ ຢູ່ໃນສະພາບດີ.
ຕາຕະລາງທຳຄວາມສະອາດບໍ່ຄວນເປັນພາລະໃຫ້ແກ່ສະມາຊິກ. ຍົກຕົວຢ່າງ, ຖ້າຫາກການເດີນທາງໄປຫາອາຄານເປັນການທ້າທາຍ, ສະມາຊິກອາດທຳຄວາມສະອາດທຸກອາທິດເມື່ອເຂົາເຈົ້າຢູ່ທີ່ອາຄານນັ້ນຢູ່ແລ້ວ.
35.4.2
ການຮຽກຮ້ອງໃຫ້ສ້ອມແປງ
ສະມາຊິກສະພາຫວອດ ຫລື ສະມາຊິກສະພາສະເຕກສາມາດລາຍງານຄວາມຈຳເປັນຕ້ອງສ້ອມແປງ. ສິ່ງນີ້ສາມາດເຮັດໄດ້ໂດຍການໃຊ້ເຄື່ອງມື Facility Issue Reporting (FIR).
35.4.5
ຄວາມປອດໄພ ແລະ ການຮັກສາຄວາມປອດໄພ
ຜູ້ນຳ ແລະ ສະມາຊິກຄວນ:
-
ຮັກສາຫ້ອງໂຖງທາງຍ່າງ, ຂັ້ນໄດ, ທາງອອກ, ແລະ ຫ້ອງເຄື່ອງໃຊ້ໃຫ້ຮຽບຮ້ອຍສຳລັບຄວາມປອດໄພຂອງການເຂົ້າອອກ.
-
ບໍ່ໃຊ້ ຫລື ເກັບວັດຖຸອັນຕະລາຍ ຫລື ໄວໄຟໄວ້ໃນອາຄານ.
-
ກຳນົດ ແລະ ເຮັດຕາມຂັ້ນຕອນການປິດອາຄານ.
-
ເກັບອຸປະກອນທີ່ສາດສະໜາຈັກເປັນເຈົ້າຂອງໄວ້ໃຫ້ປອດໄພຈາກການຖືກລັກ.
-
ຮູ້ຈັກວິທີປິດສິ່ງອຳນວຍຄວາມສະດວກ ດັ່ງເຊັ່ນ ນ້ຳ, ໄຟຟ້າ, ແລະ ແກັສ ຫລື ນ້ຳມັນເຊື້ອໄຟ.
ຖ້າຈຳເປັນ, ຜູ້ຈັດການສະຖານທີ່ສາມາດຈັດຫາແຜນທີ່ສະແດງຈຸດອຸປະກອນດັບເພີງ, ເຄື່ອງປະຖົມພະຍາບານ, ແລະ ສະຖານທີ່ປິດເຄື່ອງໃຊ້ຕ່າງໆ. ຂໍ້ມູນເພີ່ມເຕີມກ່ຽວກັບຄວາມປອດໄພມີຢູ່ໃນ “Security and Lockup Procedures” ໃນ “Maintaining Meetinghouses” (Meetinghouse Facilities Guide). ເບິ່ງ 20.7 ນຳອີກ.
35.5
ນະໂຍບາຍເລື່ອງການໃຊ້ອາຄານປະຊຸມຂອງສາດສະໜາຈັກ
35.5.1
ຫລັກທຳພື້ນຖານ ແລະ ຂໍ້ກຳນົດສຳລັບການໃຊ້ອາຄານປະຊຸມຂອງສາດສະໜາຈັກ
ການໃຊ້ອາຄານປະຊຸມຂອງສາດສະໜາຈັກທັງໝົດ ຕ້ອງເປັນໄປຕາມຂໍ້ກຳນົດພື້ນຖານດັ່ງຕໍ່ໍ່ໄປນີ້:
-
ສອດຄ່ອງກັບຄຳສອນ, ນະໂຍບາຍ, ແລະ ການປະຕິບັດຂອງສາດສະໜາຈັກ, ລວມທັງລັກສະນະອັນສັກສິດ ແລະ ຈຸດປະສົງຂອງອາຄານປະຊຸມຂອງສາດສະໜາຈັກ.
-
ຢູ່ໃນຂອບເຂດຂອງກົດໝາຍ.
-
ສອດຄ່ອງກັບສະຖານະໄດ້ຮັບການຍົກເວັ້ນພາສີເມື່ອເໝາະສົມ.
-
ດຳເນີນຂັ້ນຕອນທີ່ເໝາະສົມ ເພື່ອຫລີກລ້ຽງ, ຫລຸດຜ່ອນ, ແລະ ຈັດການກັບຄວາມສ່ຽງດ້ານຄວາມປອດໄພ, ລວມທັງແນວທາງຊີ້ນຳ ແລະ ນະໂຍບາຍຂອງສາດສະໜາຈັກໃນການປົກປ້ອງເດັກ ແລະ ຊາວໜຸ່ມ (ເບິ່ງ 12.5.1 ແລະ 20.7.1)
-
ປະຕິບັດຕາມເງື່ອນໄຂ ແລະ ຂໍ້ຈຳກັດອື່ນໆ ທີ່ປະທານສະເຕກ ຫລື ອະທິການກຳນົດ.
35.5.2
ການໃຊ້ອາຄານປະຊຸມໂດຍສາດສະໜາຈັກ
ການປະຊຸມ, ໂຄງການ, ແລະ ກິດຈະກຳຂອງສາດສະໜາຈັກ ມີຄວາມສຳຄັນຫລາຍກວ່າການໃຊ້ອາຄານປະຊຸມສຳລັບກິດຈະກຳອື່ນໆ ຖ້າຫາກມີຂໍ້ຂັດແຍ້ງ.
ຫວອດ ແລະ ສະເຕກອາດສະເໜີໂຄງການອື່ນໆຂອງສາດສະໜາຈັກ ທີ່ເປັນປະໂຫຍດຕໍ່ສະມາຊິກ ແລະ ຊຸມຊົນນຳອີກ. ບັນທຶກເຫລົ່ານີ້ລວມທັງ:
35.5.3
ການໃຊ້ອາຄານປະຊຸມໂດຍສະມາຊິກ—ສ່ວນຕົວ ແລະ ຄອບຄົວ
ສະມາຊິກອາດຂໍໃຊ້ອາຄານປະຊຸມພາຍໃນສະເຕກສຳລັບກິດຈະກຳສ່ວນຕົວ ຫລື ກັບຄອບຄົວ. ເພື່ອຂໍອະນຸມັດ, ເຂົາເຈົ້າຕິດຕໍ່ສະມາຊິກຄົນໜຶ່ງໃນຝ່າຍອະທິການຂອງຫວອດ ທີ່ປະຊຸມໃນອາຄານປະຊຸມນັ້ນ (ຫລື ບຸກຄົນທີ່ເພິ່ນກຳນົດໄວ້). ເງື່ອນໄຂດັ່ງຕໍ່ໄປນີ້ກ່ຽວຂ້ອງ:
-
ການໃຊ້ຕ້ອງຖືກດູແລດ້ວຍຕົວເອງໂດຍສະມາຊິກຜູ້ໃຫຍ່ທີ່ຮັບຜິດຊອບຂອງຫວອດທີ່ປະຊຸມໃນອາຄານປະຊຸມນັ້ນ.
-
ຜູ້ໃຊ້ມີໜ້າທີ່ຮັບຜິດຊອບທັງໝົດຕໍ່ຄວາມເສຍຫາຍໃດໆຂອງອາຄານ ຫລື ການບາດເຈັບ ຫລື ມີຄວາມຮັບຜິດຊອບທີ່ກ່ຽວຂ້ອງກັບການໃຊ້ດັ່ງກ່າວ.
-
ຜູ້ໃຊ້ຕ້ອງທຳຄວາມສະອາດ ແລະ ຈັດສະຖານທີ່ໃຫ້ຄືນສູ່ສະພາບເດີມ.
-
ຜູ້ໃຊ້ຕ້ອງປະຕິບັດຕາມການຊີ້ນຳ ແລະ ຂໍ້ຮຽກຮ້ອງຈາກຜູ້ນຳທ້ອງຖິ່ນ, ລວມທັງຂໍ້ຮຽກຮ້ອງໂດຍຜູ້ໃຫ້ຕິດຕາມກວດກາເບິ່ງການໃຊ້.
-
ຜູ້ນຳໃນສາດສະໜາຈັກອາດຂໍໃຫ້ບຸກຄົນ ຫລື ກຸ່ມໃດໆຢຸດໃຊ້ຊັບສິນນັ້ນ ຖ້າຫາກເຂົາເຈົ້າບໍ່ປະຕິບັດຕາມແນວທາງຊີ້ນຳ.
-
ສຳລັບກິດຈະກຳທີ່ຖືກອະນຸມັດ, ຜູ້ນຳຫວອດ ແລະ ສະເຕກຄວນຈັດກຽມການເຂົ້າໃຊ້ອາຄານປະຊຸມ. ກະແຈອາຄານຄວນຖືກມອບໃຫ້ສະເພາະສະມາຊິກຫວອດ ຫລື ສະເຕກທີ່ຖືກມອບໝາຍເທົ່ານັ້ນ.
ເບິ່ງ 38.3.4 ສຳລັບການໃຊ້ອາຄານປະຊຸມສຳລັບພິທີແຕ່ງງານ ແລະ ງານດອງ.
ເບິ່ງ 29.5 ສຳລັບການໃຊ້ອາຄານປະຊຸມສຳລັບພິທີສົ່ງສະການ ແລະ ພິທີອື່ນໆສຳລັບຜູ້ເສຍຊີວິດ.
35.5.4
ການໃຊ້ອາຄານປະຊຸມຂອງສາດສະໜາຈັກໂດຍອົງການທີ່ບໍ່ສະແຫວງຫາຜົນກຳໄລ ຫລື ໂດຍກຸ່ມ ຫລື ບຸກຄົນອື່ນໆ
ຜູ້ນຳເຂດອາດອະນຸຍາດໃຫ້ອົງການທີ່ບໍ່ສະແຫວງຫາຜົນກຳໄລ, ຊຸມຊົນ ແລະ ກຸ່ມອື່ນໆ (ດັ່ງເຊັ່ນ ທີມກິລາ), ຫລື ບຸກຄົນທີ່ບໍ່ໄດ້ອະທິບາຍໄວ້ໃນ 35.5.3 ໃຊ້ອາຄານປະຊຸມຂອງສາດສະໜາຈັກ ເພື່ອກິດຈະກຳ ຫລື ການຮັບໃຊ້ທີ່ເປັນປະໂຫຍດ. ເງື່ອນໄຂທີ່ລະບຸໄວ້ໃນ 35.5.3 ມີຜົນບັງຄັບໃຊ້.
ເພື່ອຂໍອະນຸມັດການໃຊ້ສຳລັບການໃຊ້ດັ່ງກ່າວຈາກຜູ້ນຳເຂດ, ປະທານສະເຕກຈະຕິດຕໍ່ຜູ້ຈັດການສະຖານທີ່.
35.5.5
ພາວະສຸກເສີນ
ອາຄານປະຊຸມຂອງສາດສະໜາຈັກອາດຖືກໃຊ້ສຳລັບການຮັບໃຊ້ຊຸມຊົນລະຫວ່າງພາວະສຸກເສີນ. ຍົກຕົວຢ່າງ, ປະທານສະເຕກອາດອະນຸຍາດໃຫ້ອົງການບັນເທົາທຸກໄພພິບັດ ແລະ ໜ່ວຍງານອື່ນໆທີ່ກ່ຽວຂ້ອງ ໃຊ້ອາຄານປະຊຸມໃນສະເຕກຂອງເພິ່ນ (ເບິ່ງ 35.5.4).
35.5.6
ການໃຊ້ອາຄານປະຊຸມທີ່ບໍ່ອະນຸຍາດໃຫ້ໃຊ້
35.5.6.1
ການໃຊ້ທາງການຄ້າ
ຊັບສິນຂອງສາດສະໜາຈັກບໍ່ຖືກອະນຸຍາດໃຫ້ໃຊ້ສຳລັບຈຸດປະສົງການຄ້າ. ການໃຊ້ເຊັ່ນນັ້ນບໍ່ສອດຄ່ອງກັບຈຸດປະສົງຂອງຊັບສິນຂອງສາດສະໜາຈັກ. ມັນກໍຍັງຂັດກັບກົດໝາຍບ້ານເມືອງ ແລະ ກົດໝາຍປະເທດນຳອີກ ທີ່ໄດ້ຍົກເວັ້ນພາສີຊັບສິນໃຫ້ສາດສະໜາຈັກ.
35.5.6.3
ຈຸດປະສົງທາງການເມືອງ
ສາດສະໜາຈັກເປັນກາງທາງການເມືອງ. ຊັບສິນຂອງສາດສະໜາຈັກບໍ່ຖືກອະນຸຍາດໃຫ້ໃຊ້ສຳລັບຈຸດປະສົງທາງການເມືອງ ຫລື ການສະໜັບສະໜູນ. ກິດຈະກໍາທີ່ຖືກຫ້າມແມ່ນລວມທັງການປະຊຸມທາງການເມືອງ ແລະ ການນໍາໃຊ້ໂດຍກຸ່ມໂຄສະນາທາງການເມືອງ ແລະ ກຸ່ມສະໜັບສະໜູນ.
ເຖິງຢ່າງໃດກໍຕາມ, ການໃຊ້ຊັບສິນນັ້ນສຳລັບການລົງທະບຽນ ຫລື ການລົງຄະແນນສຽງອາດຖືກອະນຸຍາດເປັນຂໍ້ຍົກເວັ້ນ (ເບິ່ງ 38.8.30). ປະທານສະເຕກອາດໄດ້ຮັບຂໍ້ຍົກເວັ້ນດັ່ງກ່າວຜ່ານທາງຜູ້ຈັດການສະຖານທີ່ (ເບິ່ງ 35.5.4).