Та санваарын түлхүүр, эрх мэдлээр адислагдсан

Санваарын бүх түлхүүр, эрх мэдэл Есүс Христээр дамжин ирдэг. Бүх санваар атгагчийн эрх мэдэл Түүнээс эхтэй. Аврагч хэн энэхүү эрх мэдлийг авч, хэн санваарын түлхүүр хүлээн авахыг шийддэг. Бид Түүний төгс мэдлэгт итгэдэг.

Есүс Христ манай эрин үед санваараа сэргээсэн. Тэрээр санваарыг хэрхэн ашиглахыг удирдан чиглүүлдэг. Түүхийн туршид Адам, Мосе, Петр болон бусад бошиглогч санваарын түлхүүр хүлээн авч байсан. Манай эрин үед Иосеф Смит Баптисч Иохан, Петр, Мосе, Елиас, Елиа нараас болон бусдаас санваарын түлхүүрүүдийг хүлээн авсан. Тэргүүн зөвлөлийн болон Арван хоёр төлөөлөгчийн чуулгын гишүүд эдүгээ дэлхий дээрх санваарын бүх түлхүүрийг атгадаг. Түүнчлэн орон нутгийн санваарын удирдагчид болон чуулгын ерөнхийлөгчид өөрсдийн дуудлагад санваарын түлхүүрийг атгадаг. Санваарын түлхүүрүүдээр Бурханы ажлыг удирддаг. Тэд эрэгтэй, эмэгтэйчүүдэд тэрхүү ажилд туслах эрх мэдлийг олгож, боломжтой болгодог.

Санваарын эрх мэдэл Бурханы бүх хүүхдийг адисалдаг. Санваар сэргээгдсэн учраас та ёслол хүлээн авах, Бурхантай гэрээ байгуулах боломжтой. Та эрх мэдэлтэй хүнээс даалгавар эсвэл дуудлага хүлээн авах үедээ Бурханы нэрээр үйлдэж болно.

Сүмийн дуудлагыг хүлээн авч, үнэнч үйлчил. Та Сүмийн дуудлага авах үедээ тэрхүү үүрэгт үйлчлэхийн тулд Бурханы эрх мэдлээр онцгойлон адислагддаг. Та мөн үйлчлэхийн тулд Бурханаас удирдамж хүлээн авах боломжтой. Та үйлчилж байхдаа Есүс Христийг төлөөлдөг. Түүнд хамгийн сайнаа өг.

Бурханы үйлчлүүлэхээр дуудсан хүмүүсийг дэмж. Дэмжин батлах гэдэг нь Сүмийн цуглаан дээр нэр уншихад гараа өргөх төдийхнөөс хавьгүй илүү зүйл юм. Энэ нь дэмжих, туслах гэсэн утгатай. Есүс Христийн Сүмд үйлчлэхээр Есүс Христийн дуудсан хүмүүсийг дэмжиж буйгаа харуулах арга замыг хай.

Чуулгынхаа болон ангийнхаа ерөнхийлөгчийн зөвлөлийг оролцуулан Сүмийн удирдагчдынхаа даалгаврыг биелүүл. Тэд Бурханаас эрх мэдэл хүлээн авсан бөгөөд тэрхүү даалгаврынхаа хүрээнд энэ эрх мэдлийг танд даатгаж өгдөг. Та хэн нэгэнд тохинуулах үүрэг хүлээн авсан байж магадгүй. Хүмүүсийг ариун ёслолд хүрэлцэн ирэхэд нь угтан авах эсвэл ямар нэгэн үйл ажиллагаанд туслах үүрэгтэй байж болно. Ямар ч даалгавар байсан үүнийг Есүс Христийн шавь болох, Бурханы хүүхдүүдэд үйлчлэх боломж гэж үзээрэй.

Та хүлээн авсан ёслолуудыг тань Есүс Христ зөвшөөрсөн гэдэгт итгэж болно. Энэ бол Есүс Христийн Сүмийг өвөрмөц болгодог зүйлсийн нэг. Санваарын ёслолоор дамжуулан Бурханы хүч илэрдэг.

Та Их Эзэний мутар дахь зэмсэг болно. Таныг Их Эзэнд Түүний эрх мэдлээр болон санваарын түлхүүр атгадаг Түүний үйлчлэгчдийн удирдлаган доор үйлчлэх үед Тэрээр Түүний ажилд бусдад хэрхэн үйлчлэхээ мэдэхэд тань туслах болно. Есүс Христ бол таны хүч чадал. Таны үйлчлэл таныг Түүнд илүү ойртуулж, танд баяр баясгалан авчирна.