Otenanti ao berita aika a tabu a anganiko te kona ni karekei ana kakabwaia te Atua

A kairiko otenanti nakon Iesu Kristo. Te otenanti bon te bukamaru ae tabu ma kanikina aika a nano ake a reireiniko taekan Iesu Kristo. Te toa, n te katoto, bon tiaki tii te kariki ao te ran. E kauringiira ibukin te Tia Kamaiu.

Berita aika a tabu bon kanikinaean ana tangira te Atua, onimaki, ao ana kantaninga. A uota reitakim ma te Atua nakon te tia ae korakora riki. Karaoan te berita ae tabu e kaotia bwa ko tangira te Atua ao ko motinnano nakoina. Ko kona n onimakinna ao E kona n onimakiniko. Ma te motinnano ae korakora anne e kona ni karekea te kona ni karekea Mwaakana ao te ibuobuoki ngkai ko teimatoa ni kawakina am berita.

Ko kona ni karaoa te berita ae tabu ma te Atua ngke ko bwabetitoaki ao ni kamatoaki ao ngke ko kana te toa. Ngke ko bwabetitoaki, ko berita bwa ko na katoka iaom aran Iesu Kristo, ni beku ibukina, ao ni kawakin Ana tua inanon maium. N tain te toa, ko berita naba bwa ko na ururingnga n tainako. Aikai bon am berita. Ngkai ko tauraoi ni kawakini, te Atua e berita bwa e na anganiko te Tamnei ae Raoiroi bwa raom n tainako.

Karaoa te toa bwa te bwaintangira ae tabu. Kaota am motinnano nakon Iesu Kristo ni katauraoan am taneiai ae tabu n tain te toa. Iangoia bwa tera ae ko kona ni karaoia ni karika te toa bwa te kanikina ae raka ni kaira maium n tamnei n am wiiki anne.

Taraa te Tia Kamaiu inanon otenanti. Ngkana ko mataku ke ko ira karaoan otenanti, titirakiniko, “Tera ae I reiakinaki iai man aei n taekan Iesu Kristo?” ke “E kanga ni kaniiai riki nakoIna?” Kakauongo raoi nakon ana reirei te Tamnei nakoim.

Karaiaia bwa e na kairiko te berita ae tabu inanon am mwakuri. Ngkana ko na karaoa te rinerine, uringa am berita n reitakim ma te Atua. Bwaina te kakaonimaki Nakoina. Titirakiniko: E bootau aei ma au berita aika tabu? Te katoto, I tangiriia ao I ibuobuoki nakoia aomata, karau nanoia aomata ngkana a kainnanoa te raunnano, ao n tei bwa te tia kakoaua iroun Kristo—n tabo nako ao n tainako?

Ko kona ni karekea te mwaaka n tokanikai iaon te kaririaki, bure, ao te kataaki inanon maium. Karaoan ao kawakinan berita aika a tabu e anganiko te kona ni karekea mwaakan te Atua. Ma te mwaaka anne, ko kona ni katairai bwaai nako ma te mweengaraoi. Iesu Kristo bon korakoram!

Ko kona ni kaitiakaki ao ni kabwaraaki am bure. Mwakoron ana berita te Atua nakoim ibukin kawakinan am berita ae tabu n te bwabetito bon kabwaraakin am bure. Nanon anne bwa ngkai ko rairananom ao ko kawakin am berita ma te Atua, E na kabwarai am bure ao e na buokiko bwa ko na tamaroa riki.

Ko kona ni karekea te Tamnei bwa raom n taainako. Te berita teuana are e reitiko ma te bwabetito ao te toa bon raonakim n tainako iroun Tamneina ao aia ibuobuoki anera. Kona bon aki kaitarai kanganga nako n ti ngkoe. Te Atua e bon aki katikuia natina n te berita n tii ngaiia—ko kona n onimakina anne.

Ko kona ni karekea aia boutoka ana aomata ni berita te Atua. Ngkoe bon kain te komiunite ae ana aomata ni berita te Atua n ana Ekaretia te Tia Kamaiu. Kam tabekia ao kam kaungaunga imarenami. Kam uaia n ikotaki n tang ao ni kukurei. Kam tauraoi ni katokaa i aomi rawawataia raomi. Ami utu, bitiobi, taan kairiiri, ao kain te Ekaretia a mena ikai bwa a na buokiko, ao ko kona ni buokiia.