6.
Luhngse God, luhngse mwet tuhlan lom
Matthew 22:37–40
In kahsre kom oraclah sulaclah wowo, God El use masap. El oruh ma se inge mweyen El luhngse kom. Ac srihpac se ma yohk emet in ahkos masap luhn God ma ke srihpen kom luhngse El. Luhngse el pa yohk emet ke masap luhn God.
Ma Pwacye Wacngihn Sahflahiyac
God El luhngse kowos. El pa Pahpah tomowos. Luhngse wolacna Lal kuh in mokle kom in luhngse El. Ke luhngse lom nuh sin Pahpah Inkuhsrao pa ohiyac yohk srihpac se emet ke moul lom uh, sulaclah puhkwantwen eklac arulacna fihsracsr.
Masap fuhlwact luo emet pa in luhngse God ac luhngse mwet tuhlan lom. Ac piac mwet tuhlan lom uh? Mwet nuhkwewa! Ma nuhkwewa sahyac lutiyuck ke ma suhmuhslah ac sin mwet pahluh kuhpahsr nuhke masap luo inge.
Mwet nuhkwewa tamuhlwel ac tahmtahel—weacng, ahok, mwet ma sie liki kom kuh tiac insese nuh sum. Pahpah Inkuhsrao El luhngse mwet nuhkwewa in luhngse sie sin sie. Ke kom kuhlwacnsuhpuh tuhlihk Nahtuhl, kom Kuhlwacnsuhpwacl.
Solsol
Ahkkahlwemye luhngse nuh sin God pa ke liacacng masap Lal. Nuhke mwe srihkasrak, in liacacng lwen Sahpuht in muhtahl, weacng ahkolah wo in epeis ke kuhfa luhn Leum, kom ahkkahlwemye nuh sin God lah kom luhngse kisackuhnlah lwen se in wik se nuh Sel. Ke kom lalo ac moli sie tahfuh singucul ac mwe sang luhn lalo, kom ahkkahlwemye nuh sin God lah orekma Lal yohk srihpac nuh sum likina ma luhn facluh. Ke kom orekmakihn inen God ac Kraist ke ahkfuhlwact, tiac pihlesruh in oruh ke insiom nohfohn, kom ahkkahlwemye luhpan kaksak lom ke ma nuhkwewa Eltahl oruh nuh sum.
Oruh mwet nuhkwewa oacna tuhlihk se nuhtin God. Ekihn mwet tuhma lutlut se luhn Jisus Kraist, kom kuh in muhtwacwack met in oruh wo nuh sin mwet ke acn nuhkwewa, alu, ac kuhtwena u sahyac ke luhngse ac ahkfuhlwact—yohkiyac nuh selos ma kuhtuh pacl uh mwet ngalyak ke kahs kuh mukuikui. Kahsruh mwet ma sahp puhla suhpwacr, srwenglah, kuh koflah sifacna. Kahsreltahl in puhla luhngse luhn Pahpah Inkuhsrao keim. Akacsruhi nuh selos mwe insewowo El usot nuh sum, ac ngihsre elos in fahsr tukihn Jisus Kraist.
“Oruh sramsram lom an in fahkwack luhngse lom ke God ac mwet sahyac—lah kom ngetwacni sramsram kuh sramsram ohnlain. Fahk ma ac tahpuhk—wacngihn akuckucin, ahkngal, ahkmwekihn, fine nuh ke ahksruhksruhk. Kahs lom an oasr kuh kac. Lweah eltahl in fokoko nuhke ma wo.
Ahkkahlwemye luhngse nuh sin sucu lom an. Luhngse tuhlihk nuhkwewa nuhtin God muhtwacwacack lohm ah. Oruh ip kunom in oruh lohm sum an in acn se mwet nuhkwewa kuh in puhla luhngse luhn Mwet Lahngo.
Mwe Insewowo Ma Olwelah
Kuhpahsr lom yurin God fah yohkwelihk ke kom ahkkahlwemye luhngse lom ke kom ahkos masap Lal ac liacacng wuhlweacng lom Yohrohl.
Kuhpahsr lom yurin mwet sahyac fah yohkwelihk ke kom ahkkahlwemye luhngse lom ke kuhlwacnsap lom oacna Kraist. Kom fah konwacack engan ke kom oraclah facluh in sie acn ma oasr luhngse we.
Kihsensiyuck ac Topukyac
Ngac puhla fuhkah luhngse luhn God? Luhngse luhn Pahpah Inkuhsrao oasr pacl nuhkwewa. Sramsram nuh Sel in fusus ke pruhe. Akacsruhi puhla lom an nuh Sel, ac lohacng nuhke mwe fahk Yohrohl me. Riti kahs lal ke ma suhmuhslah. Nuhnkuh ke ma nuhkwewa ma El oruh nuh sum. Sislah pacl lom ke acn ac mukuikui ma Nguhn Lal oasr we.
Yac Leum El motko ngan luhngse mwet nuhkwewa, finne elos ma oruh koluk nuh sihk? Leum El motko kom in luhngse mwet lokoalok lom ac pruhe kaclos suc oruh koluk nuh sum. Tuhsruhktuh, tiac kalmac pa kom enenuh in muhta ke ohiyac ma oruh kom in nuhnak, muhnahs ke mahno, kuh ahkkolukye ma luhn nguhn. Akiac Kom fin ahksahngengyeyuck kuh orekmakihnyuck ke ohiyac koluk, kuh kom etuh lah sikyak nuh sin mwet se, sramsram nuh sin mwet mahtuh luhlahlfongiyuck se.
Piac pacl se kuh ngac oruh ngan etwaclah fuhkah mwet ma transgender uh? Inkacnek sefanna in etwalah mwet sahyac pa ke kawuck pwacye. Ke kom srackna fuhsr, muhsahi kawuck wowo yurin mwet puhkwantwen. Ke kuhtuh facsin sahyac, mwet fuhsr matwac etwaclah mwet transgender ke mukuikui ma oracni u se nuh sie. Nuhke nuhnak ac kapakpwack luhn nguhn ac sefti lom, foskackuhnlah mukuikui ma met-se-met-se nekena kom sun matwac fal, matwac 16 el akwuck wowo se. Eis kahs in kahsruh sin sucu lom ac mwet kol. Fihliac inmahsrlo ma inseselac nuhke kom mahtuhlah kuhtuh. Sislah pacl lom yurin mwet ma kahsre kom liacacng olwelah lom nuh sin Jisus Kraist.
Meac nga kuh in oruh fin lohm sihk ac wacngihn luhngse we? Mwet Lahngo lom El etuh elyah lom an, ac El luhngse kom. Muhtweng, sikalweni in liacacng masap luhn God, ac oruh kom in srihkasrak wowo se nuh in sucu lom an. Mukuikui srihsrihk ke luhngse kuh in oraclah ma yohk se. Kom kuh pac in muhsahi kuhpahsr yurin sucu sucu ke ward lom an. Ahkolah ingena in muhsahi sucu lom an ke ma konweyuck yak ke luti luhn Jisus Kraist. Esam: Jisus Kraist pa kuh lom!
Liye Isaiah 58:3–11 (srihpac luhn lalo); 58:13–14 (mwe insewowo ke ahkfuhlwactye lwen Sahpuht); Malachi 3:8–10 (mwe insewowo ke moli sie tahfuh singucul); Luke 6:27–28 (luhngse mwet kasekom); 10:25–37 (suc mwet tuhlan luhk?); John 3:16–17 (God El luhngse kuht, pwacnacng El suhpacma Wen Nahtuhl); 14:15 (kuht karihngihn masap ke srihpen kuht luhngse God); Sie John 4:19 (kuht luhngse God ke srihpen El luhngse kuht); Mosiah 2:17 (ke kuht kuhlwacnsuhpuh mwet sahyac, kuht kuhlwacnsuhpuh God).
Kihsensiyuck Nuhke Pwepuh In Lwelah Nuh Tempuhl
-
Kuh kom fahsr tukun mwe luti ke Alu luhn Jisus Kraist ke elah lom ke kom muhkwena ac ke kom oasr inwalihl wi mempuhr ke sucu lom an ac mwet sahyac?
-
Kuh kom mwet ahkfalye sie-tahfuh singucul uh?