Na Kalou e via vosa vei iko

Na Yalotabu sa muataki iko kivua na Tamada Vakalomalagi kei Jisu Karisito. Oqo sa dua na itavi bibi ni Yalo Tabu. Ena vakauqeti iko talega o Koya mo veivutuni ka muri Jisu Karisito me rawa ni o ciqoma na veivakalougatataki ni Nona Veisorovaki. Nio veivutuni, ena vakasavasavataki iko na Yalotabu ka vukei iko mo veisau.

Na Yalo Tabu sa vosa ki na nomu vakasama kei na lomamu. Na itukutuku eso mai na Yalotabu sa rawa ni basika ki na nomu vakasama ena vuqa na sala—ena vakanananu veivakauqeti, veivakaroti, kilaka matata, kei na ivakananumi vakayalo eso. Na Yalo Tabu sa rawa ni vosa ki na lomamu ena veika veilaveti vaka na veivakacegui, yalonuidei, tiko sautu, loloma, reki, yalomalumalumu, vakavinavinaka, kei na vosota.

“Ciqoma na Yalo Tabu.” Era cavuti na vosa oqo ena gauna o a vakadeitaki kina mo lewe ni Lotu i Karisito. O dau ciqoma vakacava na Yalo Tabu? Ena muri ni vakavuvuli i Jisu Karisito. Sa nomu qaqa o Koya. Na muri Koya sa sureta na Yalo Tabu ki na nomu bula.

Qara na Tamamu Vakalomalagi ena masumasu. Talaucaka na lomamu ki Vua. Vakavinavinakataki Koya ena veivakalougatataki e vuqa esa solia vei iko. Wasea vata kei Koya na nomu marau, lomaleqa, kei na taro eso. Toka malua ka vakarogoca na Nona isaunitaro, e rawa ni veivakacegui tu, vakasama ni lomamu, se nanuma eso me qaravi tu.

Rogoca na domo ni Kalou ena ivolanikalou. Na ivolanikalou sa vosa ni Kalou kivei iko! Vulica kina e veisiga mo kila na Domona ka vakila na Nona loloma. Ni o wiliwili, vakasamataka vagumatua na ka e vakatavulici iko tiko kina o Koya, ka vola na veivakanananu e basika. Vakamatautaki iko e veisiga mo vulica na ivolanikalou—vakauasivi na iVola i Momani—ena nomu bula taucoko.

Cakacakataka na veivakauqeti vakayalo o ciqoma. Ke dua tiko na nomu vakasama se nanuma mo cakava e dua na ka vinaka ena vakalougatataka e dua, cakava sara! Na ka vinaka kecega sa vu mai vua na Kalou. Vakaraitaka vua na Tamamu Vakalomalagi ni sa rawa ni nuitaki iko mo muria na Nona veivakauqeti.

Na Yalo Tabu ena vakacegui iko ka tuberi iko. Sa kilai tu o Koya me Dauveivakacegui. Ena tokoni iko o Koya ena gauna ni veivakatovolei eso. Ena vukei iko o Koya ni kila na ka mo tukuna se cakava. Ena Nona veivakayarayarataki, sa rawa ni o vakatauvatana na ka e dina kei na ka e lasu. Sa rawa ni vukei iko o Koya ni raica na ka vinaka vei ira eso kei iko talega. Na Yalotabu sa rawa ni vakaroti iko talega ena veika rerevaki. Ena tuberi iko o Koya kivei Jisu Karisito ka yawaka na ivalavala ca.

O rawa ni ciqoma na isolisoli vakayalo eso. E vuqa na isolisoli e solia tu na Kalou vei ira na Luvena mai vua na Nona Yalotabu. Eso e tukuni tu ena ivolanikalou e okati kina na ivakatakila, vakabauti Jisu Karisito, ivakavuvuli, kilakila-ka, kei na yalomatua. Masu mo taroga na Tamada Vakalomalagi na isolisoli vakayalo eso esa solia vei iko, na sala o rawa ni vakatorocaketaka kina, kei na ivakarau e vinakata o Koya mo vakayagataka kina mo vakalougatataki ira na tani.