Kot a mochen aporous ngonuk

Ewe Ngun a emwenuk ngeni Samach won Nang me Jises Kraist. Iei eu aucehan wisen ewe Ngun mi Fel. I epwe pwan peseok kopwe aier me tapweno mwirin Jises Kraist pwe kopwe tongeni angei ekkewe feiochun An Achasefan. Nupwen ka aier, ewe Ngun epwe enimenimochuk me anisuk kopwe siwin.

Ewe Ngun mi Fel a kapas ngeni om ekiek me netipom. Porous seni ewe Ngun a tongeni feito ngeni om ekiek non chommong napanap—ren ekiek seni nang, fon, fatochun weweoch, me achechemen pekin ngun. Ewe Ngun mi Fel a kapas ngeni netipom seni memmef murinno usun ourur, epinukunuk, kinamwe, tong, meseik, tekison, kinisou, me tipepos.

“Angei ewe Ngun mi Fel.” Ekkei kapas ra katou nupwen ka kapunguno emon chon an Kraist Mwichefen. Ifa usun ka angei ewe Ngun mi Fel? Ren om aneasochisi ekkewe afanafanen Jises Kraist. I om pochokun. Tapweno mwirin I me etiwa ewe Ngun mi Fel non manauom.

Kutta Semom won Nang non iotek. Ounusau netipom ngeni I. Kinisou ngeni I ren ekkewe chommong amwararen feioch I a fen ngonuk. Apasa ngeni I om pwapwa, aurek me kapaseis. Mosonoson me ausening ngeni An kewe ponuwan, minne ir mi tongeni feito usun memmefin kinamwe, ekiek non mokurom, ika memmef om kopwe fori och mettoch.

Ausening mongungun Kot me non ekkewe pukefel. Ekkewe pukefel ir kapasen Kot ngonuk! Kaeo senir iteiten ran om kopwe kuna Mongungun me mefi An tong. Nupwen ka annea, ekipwichi met I epwe aituk, me makketiw memmef repwe toruk. Fori epwe eu orenien iteiten ran ne kaeo ekkewe pukefel—akkaewin ewe Puken Mormon—non unusen manauom.

Foffor won memmefin ngun ka angei. Ika a wor om ekiek ika memmef om kopwe fori och mettoch mi kirekiroch minne epwe efeiochu emon, fori! Mettoch meinisin mi och ra feito seni Kot. Pwar ngeni Semom won Nang pwe I mi tongeni epinukunukuk om kopwe fori memmef seni I.

Ewe Ngun mi Fel epwe oururu me emwenuk. I mi fatteno pwe ewe Chon Ekinamwei. I epwe anisuk non fansoun sossot. I epwe anisuk kopwe sinei met kopwe apasa ika fori. Ren An pochokun, ka tongeni esinna sokkofesenin nefinen met mi ennet me met mi muan. I a tongeni anisuk kopwe kuna met mi och non ekkoch me non pwisin en. Ewe Ngun a tongeni fonok usun feiengaw. I epwe emwenuk ngeni Jises Kraist me seni tipis.

Ka tongeni angei niffangen ngun. Mi chommong niffang Kot a ngeni Noun semirit seni Ngunun. Ekkoch mi nom non ekkewe pukefel mi pachenong pwarata, nuku non Jises Kraist, osukun, esisina, me mirit. Iotek ne eisini Samach won Nang usun ekkewe niffangen ngun I a fen ngonuk, ifa usun ka tongeni awattereno, me ifa usun I a mochen kopwe aea ir ne efeiochu ekkoch.