Perëndia dëshiron të komunikojë me ju

Shpirti ju çon drejt Atit Qiellor dhe Jezu Krishtit. Ky është një rol i rëndësishëm i Frymës së Shenjtë. Ai gjithashtu do t’ju frymëzojë të pendoheni dhe ta ndiqni Jezu Krishtin që të mund të merrni bekimet e Shlyerjes së Tij. Kur pendoheni, Shpirti ju pastron dhe ju ndihmon të ndryshoni.

Fryma e Shenjtë i flet mendjes dhe zemrës suaj. Mesazhet nga Shpirti mund t’ju vijnë në mendje në shumë mënyra: nëpërmjet mendimeve të frymëzuara, paralajmërimeve, kuptueshmërisë së qartë dhe kujtimeve shpirtërore. Fryma e Shenjtë mund t’i flasë zemrës suaj nëpërmjet ndjenjave lartësuese moralisht, të tilla si ngushëllimi, vetëbesimi, paqja, dashuria, gëzimi, përulësia, mirënjohja dhe durimi.

“Merrni Frymën e Shenjtë.” Këto fjalë u thanë kur u konfirmuat anëtar/e i/e Kishës së Krishtit. Si e merrni Frymën e Shenjtë? Duke iu bindur mësimeve të Jezu Krishtit. Ai është forca juaj. Ndjekja e Tij e fton Frymën e Shenjtë në jetën tuaj.

Kërkojeni Atin tuaj Qiellor në lutje. Hapjani zemrën Atij. Falënderojeni Atë për bekimet e shumta dhe të mrekullueshme që ju ka dhënë. Tregojani Atij gëzimet, shqetësimet dhe pyetjet tuaja. Qëndroni të qetë dhe mbani vesh për përgjigjet e Tij, të cilat mund të vijnë si ndjenja paqeje, mendime në mendjen tuaj ose mbresa për të bërë diçka.

Dëgjojeni zërin e Perëndisë në shkrimet e shenjta. Shkrimet e shenjta janë fjalët e Perëndisë për ju! Mësoni prej tyre çdo ditë për të zbuluar zërin e Tij dhe për të ndier dashurinë e Tij. Teksa lexoni, përsiateni atë që Ai mund të jetë duke jua mësuar dhe shkruajini mbresat që vijnë. Bëjeni zakon të përditshëm që të studioni shkrimet e shenjta, veçanërisht Librin e Mormonit, gjatë gjithë jetës suaj.

Veproni sipas mbresave shpirtërore që merrni. Nëse keni një mendim ose mbresë për të bërë diçka të mirë që do ta bekojë dikë, bëjeni atë! Të gjitha gjërat e mira vijnë nga Perëndia. Tregojini Atit tuaj Qiellor se Ai mund të ketë mirëbesim se ju do të ndiqni mbresat prej Tij.

Fryma e Shenjtë do t’ju ngushëllojë dhe udhërrëfejë. Ai njihet si Ngushëlluesi. Ai do t’ju përkrahë në kohë sprove. Ai do t’ju ndihmojë të dini se çfarë të thoni ose të bëni. Me ndikimin e Tij, mund të dalloni ndryshimin ndërmjet asaj që është e vërtetë dhe asaj që është e rreme. Ai mund t’ju ndihmojë të gjeni mirësinë tek të tjerët dhe tek vetja. Shpirti gjithashtu mund t’ju paralajmërojë për rrezikun. Ai do t’ju udhërrëfejë drejt Jezu Krishtit dhe larg nga mëkati.

Ju mund të merrni dhurata shpirtërore. Ka shumë dhurata që Perëndia ua jep fëmijëve të Tij nëpërmjet Shpirtit të Tij. Disa dhurata të përmendura në shkrimet e shenjta përfshijnë zbulesën, të besuarit te Jezu Krishti, mësimdhënien, dallimin dhe urtësinë. Lutuni për t’i kërkuar Atit Qiellor rreth dhuratave shpirtërore që Ai jua ka dhënë, se si mund t’i zhvilloni ato dhe se si Ai dëshiron që t’i përdorni ato për të bekuar të tjerët.